Hesab edirik ki, KTMT Ermənistan qarşısındakı vəzifələrini icra edə bilmədi. Bu sözləri Ermənistan Baş naziri Nikol Paşinyan Praqada Transatlantik Əlaqələr Mərkəzində çıxışı zamanı deyib.
O bildirib ki, KTMT ilə münasibətlərdə çətinliklər var: “Ötən il KTMT ilə konsensus əldə edə bilmədik. Mövqeyimizi və təşkilatla bağlı narazılığımızı bildirdik. Biz səmimi və şəffafıq və bu da əlavə çətinliklər yaradır”.
Paşinyanın Avropada KTMT-dən açıq mətnlə şikayət etməsi Ermənistanın bu təşkilatla bağlarını tam qırmaq istədiyinin göstəricisi ola bilərmi?
Hərbi-siyasi ekspert Daşdəmir Əliyev “Bakı-Xəbər”ə açıqlamasında bildirdi ki, 2020-ci ildə baş verən 44 günlük Vətən müharibəsinin ardından öz məğlubiyyətinə səbəb axtaran Ermənistanın hədəflərindən biri müttəfiqi Rusiya və üzv olduğu Kollektiv Təhlükəsizlik Müqaviləsi Təşkilatı oldu: “Ermənistan müxalifətinin qərbyönümlü qolu, hətta Rusiya ilə əlaqələrin tam kəsilməsi ilə bağlı mitinqlər belə keçirdi. Sonradan proses zəifləsə də, son günlər yenidən bunun alovlandığını müşahidə etmək mümkündür. Görünən budur ki, Ermənistan ictimaiyyəti də artıq müxalifətin bu arzularını dəstəkləməyə başlayıb. Hətta bəzi maraqlı dairələr müxtəlif strukturlar vasitəsilə ictimai rəyi Qərbin maraqlarına uyğun formalaşdırmağa çalışır. Erməni ictimaiyyətində NATO blokunun nüfuzu Kollektiv Təhlükəsizlik Müqaviləsi Təşkilatının nüfuzunu üstələyir. Belə ki, respondentlərin 34,1% hesab edir ki, Ermənistan NATO-ya daxil olmalı və məhz bu təşkilat ölkənin təhlükəsizliyini təmin etməlidir. Respondentlərin 29,1%-i isə KTMT-yə səs verib. Buna baxmayaraq, Ermənistan KTMT-ni tərk etməyəcək. Çünki KTMT faktiki olaraq Rusiyanın partonajlığı altında yaranan və fəaliyyət göstərən qurumdur. KTMT-dən çıxmaq üçün də Rusiyanın razılığı alınmalıdır. Kremldən icazəsiz bunu etmək qeyri-mümkündür”.
Ekspertin sözlərinə görə, Rusiya hakimiyyəti KTMT-yə üzv digər ölkələrlə birgə Paşinyanın oynadığı riyakar siyasəti yaxşı anlayır və buna adekvat tədbirlər görür: “Onlar anlayır ki, hərbi bloku Azərbaycanla üzbəüz qoymağa cəhd edən Nikol Paşinyan, eyni zamanda, təşkilatı daxildən parçalamağa cəhd edir. Bu baxımdan, ona təşkilat daxilində heç bir etimad yoxdur. Əksinə, KTMT liderləri Azərbaycan dövlət başçısı İlham Əliyevlə sıx dostluq və əməkdaşlıq münasibətindədir. Bu əməkdaşlıq yalnız hərbi, siyasi, yaxud iqtisadi müstəvidə deyil, həm də xalqlar səviyyəsində, Ermənistandan fərqli olaraq, səmimidir. Ermənistanın KTMT və Rusiyaya qarşı mübarizəsinin növbəti nümunəsi kimi İrəvanda KTMT Təhlükəsizlik Şurasının iclası çərçivəsində Vladimir Putinin səfərinə qarşı keçirilən etirazı göstərmək olar. Əllərində ABŞ, Avropa ölkələri, Aİ və Ukraynanın bayraqlarını tutan yüzlərlə etirazçı “KTMT rədd ol!”, “Rusiya bizim düşmənimizdir!” və s. şüarlarla şəhərin mərkəzində polislərin müşayiəti ilə aksiya keçirdi. Paşinyan açıq şəkildə NATO-ya meylləndiyini nümayiş etdirdi. Bütün baş verənlər onu göstərir ki, Ermənistan heç vaxt heç kimə qarşı dürüst davranmır, hər an müttəfiqlik və əməkdaşlıq münasibətlərinin üstündən xətt çəkməyə hazırdır. Bircə qalır Rusiya və digərlərinin, nəhayət ki, bunu anlaması. Amma təəssüf ki, Rusiya buna konkret addımlarla deyil, bədii ritorika ilə cavab verir. Ola bilər ki, Rusiya Ukrayna amilinə görə Ermənistanla bir qədər sərt davranmır. Paşinyanın Çexiyada səsləndirdiyi "ultimatum", daha doğrusu, onun cəsarətlənərək İrəvanın KTMT-ni tərk edə biləcəyini vurğulaması Moskvaya xəbərdarlıq sayıla bilər”.
Məhəmmədəli QƏRİBLİ
