Beynəlxalq Respublikaçılar İnstitutu mart ayında Ermənistanda keçirdiyi sorğunun nəticələrini dərc edib.
Erməni mediasının verdiyi mılumata görə, respondentlərə “Bu bazar günü seçki olsa, hansı qüvvəyə səs verərdiniz” sualı ünvanlanıb. Sorğu iştirakçılarının 21%-i hakim partiyaya – “Mülki müqavilə”yə səs verəcəyini açıqlayıb. Köçəryanın “Ermənistan” bloku 4%, Sərkisyanın “Şərəf duyuram” bloku isə 1% səs toplayıb. Digər partiyalar da 1-3% civarında səs alıb. Respondentlərin 12%-i bülleteni korlayacağını, 30%-i seçkidə iştirak etməyəcəyini, 20%-i cavabda çətinlik çəkdiyini bildirib. Yalnız İrəvanda keçirilən sorğuda isə Paşinyanın partiyası 17%, “Ermənistan” bloku 5%, “Şərəf duyuram” bloku 1%, Daşnaksütyun 2% və s. səs qazanıb.
Qeyd edilir ki, ümumilikdə seçkilərə maraq azalsa da, Paşinyanın partiyası digər bütün partiyaların ümumilikdə topladığı səsdən daha yuxarı reytinqə malikdir, əsas rəqiblərini isə qat-qat üstəliyir. Xatırladaq ki, müxalifətin aylarla tənqid və təzyiqlərinə baxmayaraq, Paşinyanın mövqelərini nəinki qoruması, hətta reytinqini yüksəltməsi ciddi müzakirəyə səbəb olub.
Deməli, müharibəni uduzmasına rəğmən, Paşinyanın reytinqi yüksəkdi. Buradan belə nəticəyə gəlmək olarmı ki, Ermənistan cəmiyyəti Azərbaycanın yaratdığı yeni reallıqları tam qəbul edir və buna müqavimət göstərmək fikri yoxdur?
Cümhuriyyət Xalq Partiyasının sədri Bədrəddin Quliyev “Bakı-Xəbər”ə açıqlamasında bildirdi ki, bölgədə baş verən proseslərlə əlaqədar olaraq Ermənistan reallığı qəbul edir: “Çünki bölgədə Rusiya faktorunun gərginliyi, Rusiyanın yaratdığı reallıqlar dəyişir. Bölgədə Cənubi Qafqaz uğrunda Qərblə Rusiya müharibəsindən kənara çəkilir. Ermənistanın özünün tərkibində Rusiya qüvvələrinin bazaları var. Onlar Qarabağda separatçıları dəstəkləyir və ondan istifadə etməyə çalışır. Moskva öz hərbi - sənaye kompleksini Ermənistanda, Qarabağda, Cənubi Qafqazda yerləşdirməsi ilə münasibətlərin korlanmasında rol oynayır. Ümumiyyətlə, erməni projesi, ermənilərin potensialı artıq tükənib. 44 günlük müharibədən sonra isə onların cəsarətli addım atmaq imkanları yoxdur. Məsələnin ikinci mahiyyəti də odur ki, Paşinyan sülh danışıqları fonunda gedən proseslərdə mövcud reallığı nəzərə alaraq, Qərblə birlikdə hərəkət etmək istəyir. Amerika vasitəsilə bölgədə münasibətlərin həll olunması, sərhədlərin açılması ilə bağlı yeni dövrə başlayır. Bu prosesləri, bu reallığı, bu əlaqələri dərk edirlər. Bölgədə Rusiyanın elə bir iqtisadi vəziyyəti var ki, Ermənistan ondan üz döndərməyi məqbul sayır. Birmənalı olaraq onlar, kim güclüdürsə, onun yanındadırlar. Qərb projesi ilə Amerika projesinin olması onların özünün də bu bölgədə yeni müttəfiqlərlə əlaqələrinin qurulmasına, sərhədlərin açılmasına səbəb olacaq. Həmçinin, bölgədə kreditlərin artırılması məsələsi var. Söhbət 2,6 milyarddan gedir. Bu proseslərin hamısına Ermənistan cəmiyyəti maliyyə mənbəyi gözü ilə yanaşır və hazırlaşır. Ona görə də, Azərbaycanın şərtlərini qəbul etmək və sülh sazişinə getmək qaçılmazdır. Bölgədə əvvəlki kimi rusun oyunu proseslərdən kənarda qalır. Bu, Azərbaycanın gücünü göstərir. Bölgədə gələcəkdə əməkdaşlıq, nəqliyyat-kommunikasiya xətlərinin açılması, münasibətlərin qurulması, sülh sazişinə getməsi ilə bağlı erməni cəmiyyətinin yeni projeyə hazırlığı reallaşır. Çünki erməni cəmiyyəti hətta 44 günlük müharibədən sonra da Paşinyana etimad göstərdi. Onlar müharibə istəmirlər, onlar bölgədə yaşamaq istəyirlər. Biz də bizim şərtlərimizi qəbul edən qüvvələrlə əməkdaşlığımızı davam etdirəcəyik. Getdikcə Azərbaycanın imkanları, əlaqələri gücləndiriləcək. Bölgədə Rusiya zəiflədikcə, bütün xalqlar əminamanlıq tapacaq”.
Məhəmmədəli QƏRİBLİ
