Rusiya ilə münasibətlərində müəyyən gərginliklər yaşayan Ermənistan bu istiqamətdə daha bir addım atıb. Söhbət BMT və Avropa Şurası arasında əməkdaşlığa həsr olunmuş bu qətnaməyə münasibətdən gedir. Ermənistan Rusiyanın Ukraynaya tammiqyaslı müdaxiləsini “təcavüz” adlandıran qətnamənin lehinə səs verib.
Əslində BMT və Avropa Şurası arasında əməkdaşlığa həsr olunmuş bu qətnamədə Rusiyanın Ukraynaya qarşı təcavüzü cəmi bir paraqrafda yer almışdı. Avropa ölkələri, Kanada və ABŞ tərəfindən dəstəklənən bu qətnamə 122 lehinə, 18 bitərəf nisbəti ilə qəbul olunub. Ermənistanla yanaşı, bu dəfə Çin Qazaxıstan, Braziliya və Hindistanla birgə qətnamənin lehinə səs verib. Qətnamənin əleyhinə Rusiyadan başqa yalnız Belarus və Suriya səs veriblər. Budəfəki səsvermədə ümumiyyətlə iştirak etməyən ölkələrin sayı daha çox olub. Bir sıra şərhçilər qeyd edirlər ki, bu qətnaməyə əslində ötən həftə səsvermə keçirilsə də, səsi, necə deyərlər, indi çıxıb. Çünki bu sənəddə yalnız preambulanın bir yerində, 9-cu paraqrafda Rusiyanın adı çəkilirdi: “Rusiya Federasiyasının Ukraynaya qarşı, ondan əvvəl isə Gürcüstana qarşı təcavüzünə görə Avropanın misilsiz çətinliklərlə üzləşməsi və Rusiya Federasiyasının Avropa Şurasında üzvlüyünün dayandırılması ilə bağlı biz BMT və Avropa Şurası arasında gücləndirilmiş əməkdaşlığa çağırırıq”. Ermənistanın qətnamənin lehinə səs verməsi, şübhəsiz ki, Moskva-İrəvan münasibətlərinə mütləq öz təsirini göstərəcək. Bu xüsusda “armenianreport” portalı yazır: “Baş verənlər, ümumiyyətlə diplomatiyamıza, xüsusən də Ermənistanın BMT-dəki nümayəndə heyətinə bir qədər fərqli nəzər salmağa vadar edir. Özümüzdə öz fikrimiz olduğunu və bundan sonra rusların diqtəsi ilə hərəkət etmədiyimizi göstərmək üçün güc tapdıq. Rusiyanın təcavüzkar adlandırıldığı qətnaməyə “lehinə” səs verərək, biz özümüzü dünyanın əksər dövlətləri sırasında gördük – 122 ölkə bu qətnaməyə “lehinə” səs verdi. Lakin “əleyhinə” səslər yalnız beş dövlətdən - Rusiya, Belarus, Konqo, Nikaraqua və Suriyadan gəlib. Və sadəcə əladır ki, Ermənistan əvvəlki kimi üçüncü dünyadan olan bu yaramaz dövlətlər sırasında deyil. Son vaxtlara qədər bunu təsəvvür etmək çətin idi. Bəli-bəli, bu yaxınlarda, məsələn, bu ilin fevralında bizim nümayəndə heyətimiz BMT-də Ukraynada sülhlə bağlı qətnaməyə biabırçılıqla bitərəf qaldı. İndi gördüyümüz kimi, vəziyyət yaxşılığa doğru dəyişməyə başladı. Amma əhalinin rusiyapərəst təbəqəsi belə düşünmür (ədalət naminə etiraf etmək lazımdır ki, Moskvanın hər bir xəyanətkar addımı ilə onların sayı getdikcə daha az olur) və Kremlin nəzarətində olan müxalifətin gülünc ittihamlarla ölkə hakimiyyətinə hücumu müşahidə edilir. Necə ki, bununla biz yeganə “müttəfiqimizə” “xəyanət edirik” və Rusiya “sülhməramlıları” tərəfindən “mühafizə olunan” Qarabağ sakinlərini təhlükəyə məruz qoyuruq. Bu ittihamlar və daha da artığı, onlarda səsləndirilən arqumentlərin heç bir dəyəri yoxdur. Birincisi, Rusiya uzun müddətdir Ermənistanın müttəfiqi deyil. 2016-cı ilin aprelindən, Moskvanın Bakı və Ankara tərəfinə keçdiyi məlum olandan o bizimlə müttəfiq olmayıb. O bizi müdafiə etmədi, əksinə, bunun Ermənistana qarşı yönəldiyini yaxşı bildiyi üçün Azərbaycana silah tədarükünü artırmağa başladı. İkincisi, İrəvan Ermənistanın maraqlarına səs verir. Bunu o qədər də anlayışlı olmayan həmkarlarımızın hücumlarına qarşı mübarizə aparan hakim “Vətəndaş müqaviləsi” partiyasından olan deputat Arman Eqoyan da vurğuladı. O haqlıdır, hər bir dövlət öz ölkəsinin maraqlarını düşünür. Əgər bu qətnamədə onun üçün müsbət bir şey varsa, o da “lehinə” səs verə bilər. Ermənistan Rusiyanın əyaləti deyil ki, bizim maraqlarımız Moskva ilə 100 faiz üst-üstə düşsün. Ermənistanın isə Kremlin xarici siyasətinin fonunda Rusiyadan üz döndərməkdə və artıq onun arxasınca getmək istəməməsində yalnız ruslar günahkardır”.
Portal belə bir məqama da diqqət çəkir ki, Rusiya Ermənistanı Azərbaycanla sülh müqaviləsi imzalamaqdan çəkindirməyə çalışır: “Bakı və İrəvan bu ay ərzində sülh müqaviləsi imzalayacaq. Əgər Vaşinqtonda Azərbaycan və Ermənistan XİN rəhbərləri arasında danışıqlarda uğur qazanılarsa, bu ay ərzində Bakı ilə İrəvan arasında sülh müqaviləsinin bağlanmasını gözləmək olar. Qərb bu gün Ermənistanla çox maraqlanır. Rusiya Qərbin bu planlarına müqavimət göstərmək istəyəcək. Ermənistanın “yeni Ukrayna” olmaq risqi böyükdür. Rusiya Ermənistan-Azərbaycan münasibətlərinin nizamlanması prosesinə Qərbin müdaxiləsini özü üçün təhlükə hesab edir. Və onun bütün bunlara necə qarşı çıxdığını biz Ukraynanın timsalında görürük. Ona görə də çox narahatıq”. Erməni analitik Artur Ovhannisyan isə qeyd edir ki, Rusiyaya qarşı hər hansı yanlış münasibət Ermənistan üçün fəlakətli nəticələr verəcək. Onun sözlərinə görə, Ermənistanın hazırkı hakimiyyəti ölkəni Rusiya ilə üz-üzə qoyur. Rus ekspert Sergey Voronin isə hesab edir ki, Qərb Ermənistan-Rusiya münasibətlərində eynən Ukrayna ssenarisini tətbiq edir və bunun reallaşmasına İrəvan da yardım göstərir: “Hər şeydən öncə qeyd etmək lazımdır ki, Paşinyan artıq ölkəsini əminliklə Qərbə tərəf aparır. Bu, Rusiyadan qopmaq deməkdir. Fikir verin, Avropa İttifaqının Ermənistan-Azərbaycan sərhədinə göndərdiyi missiyanın da konkret qalma müddətinə riayət olunmur. Bu isə o deməkdir ki, həmin missiya Ermənistanda daha çox qala bilər. Üstəlik, nəzərə alaq ki, mülki missiya pərdəsi altında Ermənistana NATO ölkələrinin hərbi müşavirləri, kəşfiyyatın nümayəndələri göndərilir. Çox qəribədir ki, məhz Ermənistanın xahişi ilə, tələbi ilə Azərbaycan tərəfinin iştirakı olmadan Ermənistanla Azərbaycan arasında mümkün münaqişə alovunu söndürmək vəzifəsini icra etməlidir. Rusiya Qafqazda özünə yeni cəbhənin açılmasına qarşı çıxdığı bir vaxtda Ermənistanda əks addımlar atılır”. Erməni politoloq Davit Stepanyan isə vurğulayır ki, bu, İrəvana baha başa gələcək: “Düşünmürəm ki, Rusiyanın bu gün təxribatlara əl atmaq, hücumlar təşkil etmək üçün resursları var. Rusiyada tez-tez qeyd olunur ki, Ermənistan vektoru dəyişmək niyyətindədir. Ümid edirəm ki, bu proses davam edəcək, çünki Rusiya hər şeyə qadirdir ki, bu vektor dəyişikliyinin davam etməsi baş verməsin. Ermənistan çox ayıq olmalıdır. Ölkə daxilində hər şey mümkündür. Ölkə daxilində müxtəlif ssenarilər mümkündür və o ssenarilərin arxasında Rusiya dayanacaq”.
Nahid SALAYEV
