Ermənistanın xarici işlər naziri Ararat Mirzoyan İrəvanda Rusiya xarici işlər nazirinin müavini Mixail Qaluzinlə görüşüb. M.Qaluzin və A.Mirzoyan regional və ikitərəfli məsələlərə də toxunublar. İkitərəfli münasibətlərin problemləri ilə bağlı fikir mübadiləsi də diqqət mərkəzində olub.
Tərəflər Rusiya-Ermənistan müttəfiq əməkdaşlığının müsbət dinamikasını qeyd ediblər. Parlament xətti, regionlararası təmaslar və mədəni əlaqələr vasitəsilə ən yüksək və yüksək səviyyələrdə dialoqun mütərəqqi inkişafı, o cümlədən müvafiq idarələr arasında əməkdaşlığın artırılması vurğulanıb. Ticarət-iqtisadi əlaqələrin rekord dinamikası qeyd olunub. Rusiya ilə Ermənistanın beynəlxalq təşkilatlarda koordinasiya səviyyəsindən məmnunluq ifadə olunub. Rusiyalı diplomat Ermənistan xarici işlər nazirinin müavinləri Vaqe Gevorkyan və Mnatsakan Safaryanla da məsləhətləşmələr aparıb.
Rusiyanın rəsmi dairələri Ermənistana gəlib-gedir. Burada diqqət çəkən məqam odur ki, Ermənistanla görüşlərdə həmişə Rusiya rəsmiləri iki ölkə münasibətlərinin yüksək səviyyədə olduğunu, dinamik və hərtərəfli inkişaf etdiyini bəyan edirlər. Bir sözlə, bununla bağlı ancaq pozitiv bəyanatlar verirlər. Bu biri tərəfdən də Ermənistan cəmiyyətində rusafobiya getdikcə güclənib. Bu, müxtəlif səviyyələrdə özünü çox açıq formada göstərir.
Maraqlıdır, Rusiyanın siyasi rəhbərliyi Ermənistanla münasibətlərin əsl mahiyyəti haqqında niyə danışmaq istəmir? Niyə Rusiya hakimiyyəti Ermənistanın qərbyönümlü siyasətini malalayır?
“Azərbaycanın parlaq qələbəsindən sonra Rusiyadan "küsmüş" cəmiyyət yeni "arxa-dayaq" axtarışına çıxdı”
Sözügedən məsələ ilə bağlı fikirlərini “Bakı-Xəbər”lə bölüşən AMİP-in sədr müavini Afsəddin Nəbiyev Rusiyanın Ermənistanla bağlı əsl reallıqları görməzdən gəlməsini bir sıra amillərlə əlaqələndirdi: “Ermənistan hakimiyyətinin son illərdə anti-Rusiya siyasəti aparmasının bir çox səbəbləri var. Onlardan biri, deyərdim ən başlıcası 2020-ci ildə Azərbaycan dövlətinin öz haqq davasında Ermənistan üzərində parlaq qələbəsi oldu. O vaxta qədər erməni cəmiyyəti elə düşünürdü ki, Ermənistanla Azərbaycan arasında müharibə baş verərsə onların əvəzinə Rusiya praktiki olaraq müharibəyə cəlb olunacaq. Yəni Ermənistanın yerinə Azərbaycanla savaşa girəcək. Necə deyərlər, “Ac toyuq yuxuda darı gördüyü kimi”. Təbii ki, Azərbaycan fraqmental gücə çevrilməklə geosiyasi anlamda balanslı siyasət apararaq ermənilərin mifik təsəvvürlərini darmadağın etdi. Azərbaycanın parlaq qələbəsindən sonra Rusiyadan "küsmüş" cəmiyyət yeni "arxa-dayaq" axtarışına çıxdı. Üzünü Qərbə çevirən Ermənistan üçün bu "axtarışların" da bir nəticəsi olmadı. Çünki Ermənistan yeni dünya nizamında bir çox dövlətlər üçün əlavə yükə çevrildi. İqtisadi cəhətdən tamamilə çökmüş Ermənistan faktiki olaraq Qərbin və Rusiyanın əlində bir alət olaraq qalmaqdadır”.
Sədr müavini hesab edir ki, Ermənistanın qərbyönümlü siyasətini Rusiya daxilən rahatlıqla həzm edə bilmir: “Ona görə də son günlər Ermənistan hakimiyyəti ilə təmasları intensivləşdirməsi müşahidə olunur. Düşünürəm ki, Rusiyanın özünün böyük problemləri olduğunu dərk edən erməni tərəfi bundan öz mənafeyi naminə istifadə edir. Bununla Ermənistan Qərb dövlətləri və Rusiya arasında siyasi manevrlər edə bilir. Hətta iş o yerə çatdı ki, Ermənistanda özünü anti-Rusiya cəbhəsində təqdim edən qüvvələr Putinin İrəvana səfər edəcəyi halda həbs olunacağını dilə gətirdilər. Bu dairələr Rusiyaya meydan oxumaqla Qərbin "etimadını" qazanmağa cəhd etdilər. Bu onu göstərir ki, Ermənistan siyasi dairələri ikili oyunları ilə hər zaman Qərbə və Rusiyaya öz "gərəkliyini" nümayiş etdirməyə çalışır. Tamamilə iqtisadiyyatı iflic olmuş, hərbi infrastrukturu darmadağın olunmuş Ermənistan hazırda bölgədə mövcudluğunu qorumaq üçün bütün vasitələrdən istifadə etməyə çalışır. Rusiya dövləti Ermənistanla münasibətlərin ən yüksək səviyyədə olduğunu dilə gətirməklə "sınmış" erməni elektoratının rəğbətini qazanmağa çalışır. Ancaq bu mümkün olacaqmı? Bunu zaman göstərəcək. Kreml Ermənistanın tamamilə Qərbin yanında yer alacağından ehtiyat edir. Ona görə də iki ölkə arasında olan kəskin ziddiyətləri ört-basdır edirlər. Ermənilərin ən doğru seçimi Azərbaycanın irəli sürdüyü sülh şərtlərini qəbul etməsi ola bilər. Ermənistan bizimlə sülh sazişini imzalasa, düşdüyü ağır iqtisadi vəziyyətdən özünü xilas edə bilər. Ermənilər nə qədər bölgədən kənarda özünə arxa-dayaq axtarışnda olacaqsa, çox böyük şanslarını itirmiş olacaqlar. Onların yeganə çıxış yolu qonşu dövlətlərlə sülhə gəlib dinc yanaşı yaşamaq yoludur. Bunu etməsələr, Ermənistan daha böyük fəlakətlə üz-üzə qalacaq”.
Vidadi ORDAHALLI
