Ermənistan Laçın dəhlizinin girişində Azərbaycan nəzarət-buraxılış məntəqəsinin quraşdırılması ilə bağlı BMT məhkəməsinə müraciət edib.
Bu barədə aprelin 26-da Ermənistanın Beynəlxalq Hüquq Məsələləri üzrə Nümayəndəliyinin mətbuat katibi Hasmik Samvelyan mətbuata açıqlamasında deyib.
Onun sözlərinə görə, Azərbaycanın bu addımı Ermənistandan Haaqa məhkəməsinə göndərilən məktubda vurğulanan 22 fevral məhkəmə qərarının pozulmasıdır.
Ermənistanın bu müraciətinin hansı hüquqi perspektivləri ola bilər?
Hüquqşunas Şəmsəddin Əliyev “Bakı-Xəbər”ə açıqlamasında bildirdi ki, bu, acı təəccüb doğurur: “Qarşı tərəf beynəlxalq hüquq normaları ilə bağlı, hamılıqla tanınan insan hüquq və azaldlıqları ilə bağlı, ərazi, suverenlik iddiaları ilə bağlı bütün konversiyalara aşkar şəkildə qarşı çıxıb, pozub. Əslinə baxanda, Ermənistan tərəfin beynəlxalq hüquq və münasibətlərə zidd davranışları həm BMT Təhlükəsizlik Şurasına daimi üzv olan dövlətlərin qarşısında, həm də Beynəlxalq hüququn subyekti olan dövlətlərin gözü qarşısında baş verib. Təbii ki, hüquqi dildə belədir. Susqunluğun özü də razılıq əlamətidir. Ermənistan tərəfin soyqırımla, vandallıqla, insan hüquq və azadlığı ilə bağlı addımları ilə barışmaq deməkdir. Azərbaycan xalqının öz müqəddəratını həll etmək, dövləti idarə etmək formasını müəyyən etmək öz suveren hüququdur. Konstitusiya da, beynəlxalq normalar da bunu qəbul edib. Azərbaycanın Laçın dəhlizində sərhəd keçid məntəqəsini formalaşdırması əslinə baxanda çox düzgün qərardı. Uzun illər öz çirkin niyyəylərini həyata keçirən ermənilərə qarşı bir məsuliyyət hesab oluna bilər bu sərhəd. Ermənilər ordan minalar gətirib Azərbaycan ərazisində basdırırdılar və nə qədər insan tələfatına səbəb ola biləcək addımlar atılırdı. Ermənistan tərəfi törətdiyi bütün cinayətlərə görə beynəlxalq hərbi məhkəmədə cavab verməli olduğu halda, onlar öz vandallıqlarını şikayət etmək adı ilə pərdələmiş oldular. Onların şikayətlərinə baxılması ilə bağlı, təbii ki, hüquqi prosedurlar var. Amma düşürünürəm ki, sosial ədalətin bərpası istiqamətində atılan addımlara tərəf dönsək, ümumiyyətlə onların şikayəti icraata qəbul olunmamalıdır. Qəbul olunsa da, baxılmamış saxlanılmalıdır. Ermənistan tərəfin Azərbaycanı bu məsələ ilə bağlı beynəlxalq məhkəməyə verməsində heç bir hüquqi əsas yoxdur. Düşünəm ki, onlar öz xüsusi amansızlıqla törətdikləri əməlləri bir növ pərdələmək istəyirlər. Azərbaycan Respublikası başqa dövlətlərlə münasibətlərini hamılıqla qəbul edilmiş beynəlxalq hüquq normalarının prinsipləri əsasında qurub. Bu prinsiplər Ermənistan və bütün dövlətlər tərəfindən tanınır. Azərbaycan dövləti də bu prinsiplərə uyğun davranır. Ermənistan tərəfi isə ancaq hörmətsizlik edir. Bu özü beynəlxalq öhdəliklərin vicdanla yerinə yetirilməsinə tam ziddir. Azərbaycanın ərazisi toxunulmazdır, bölünməzdir. Ölkənin Prezidenti bütün beynəlxalq danışıqlarda da Laçın dəhlizinin saxlanmasını və Laçın yolunun saxlanması şərti ilə Ermənistan tərəfində qalmasını qəti şəkildə rədd edib. Çünki bizim ərazimiz toxunulmaz, bölünməzdir. Ona görə də Azərbaycanın bu addımları tamamilə normaldır, heç bir mübahisə doğurmamalıdır. Düşünürəm ki, Ermənistan tərəfinin beynəlxalq məhkəməyə müraciəti də beynəlxalq hüquq baxımından ya baxılmamış saxlanılmalı, ya da müraciətə qəbul edilməməlidir. Qəbul ediləcəyi halda Azərbaycan tərəfinin kifayət qədər arqumentləri var ki, onların tələblərini asanlıqla rədd etsin”.
Məhəmmədəli QƏRİBLİ
