Məlum olduğu kimi, Azərbaycan Avropanın enerji təhlükəsizliyinə töhfə verir. Bu istiqamətdə bütün imkanlarından maksimum istifadə etməyə çalışır. 2027-ci ilə qədər Avropa İttifaqı ölkələrinə ixrac ediləcək qazın 27 milyard kubmetrə çatdırılması nəzərdə tutulub.
Bütün bunlara rəğmən, Avropa İttifaqının xarici siyasət və təhlükəsizlik məsələləri üzrə ali nümayəndəsi Cozef Borrel Laçın yolunun başlanğıcında nəzarət-buraxılış məntəqəsinin yaradılmasını dialoqa “zidd” addım hesab edir: “Azərbaycanın Laçın dəhlizi boyunca birtərəfli qaydada nəzarət-buraxılış məntəqəsi yaratması Avropa İttifaqının gərginliyin azaldılması və məsələlərin dialoq yolu ilə həlli çağırışlarına ziddir. Qarabağ ermənilərinin hüquqları və təhlükəsizliyi təmin edilməlidir”.
Maraqlıdır, Avroittifaq rəsmilərinin Azərbaycanın öz ərazi bütövlüyünü, suverenliyini təmin etməsinə belə ədalətsiz yanaşması nədən irəli gəlir? Niyə Azərbaycanın enerji və tranzit-nəqliyyat təchizatı sahələrində Avropaya verdiyi töhvə nəzərə alınmır?
“Borreldən soruşmaq lazımdır ki, Qarabağ ermənilərinin təhlükəsizliyini və azadlığını məhdudlaşdıran nədir?”
Sözügedən məsələni “Bakı-Xəbər”ə şərh edən Demokratik Dəyişim Partiyası Təşkilat Komitəsinin sədri Əli Mustafayev bunun səbəbini bir sıra amillərlə əlaqələndirdi: “Əvvəla, Borreldən soruşmaq lazımdır ki, Qarabağ ermənilərinin təhlükəsizliyini və azadlığını məhdudlaşdıran nədir? Azərbaycanla Ermənistan arasında münaqişə var. Üstəlik, sözügedən məsələ ilə bağlı iki ölkə arasında sülh sazişi imzalanmayıb. Belə olan halda Azərbaycan-Ermənistan sərhədi niyə nəzarətsiz olmalıdır? Digər tərəfdən, Laçın yolu ilə iki ildən artıqdır ki, Qarabağın ermənilər yaşayan hissəsinə silah-sursat, minalar daşınır. Bu müddət ərzində 300 nəfərə yaxın vətəndaşımız minaya düşərək həlak olub, şikəst qalıb. Bütün bunların nəticəsində Azərbaycanın təhlükəsizliyi zədələnib. Maraqlıdır, bəs Borrel niyə bunları görmür və nəzərə almır? Bəlkə Avroittifaq və Borrel istəyir ki, sərhəd nəzarətsiz qalsın? Belə olarsa, o zaman Qarabağa nəinki Ermənistandan, İrandan da terrorçular gələcək. Məgər Avropa İttifaqına belə vəziyyət lazımdır? Burada qarşılıqlı dialoqun getməsindən söhbət gedirsə, Qarabağda yaşayan ermənilər Azərbaycan vətəndaşıdır. Onlar rəsmi Bakı ilə dialoq aparmağa hazırdılarmı? Azərbaycan dəfələrlə təklif edib ki, Bakıda görüşsünlər, amma onlar gəlməyib. Deməli, burada dialoq yoxdu. Qarabağda yaşayan erməni əhali Azərbaycan vətəndaşı olduqları üçün ölkəmizin qanunlarına tabe olmalıdılar. Ancaq biz görürük ki, onlar Azərbaycan qanunlarına tabe olmurlar. Dövlətimizlə danışıqlar aparmırlar. O zaman hansı dialoqdan söhbət gedir? Ermənistanla Azərbaycan arasında dialoqdan söhbət gedirsə, o zaman bu başqa məsələ. Biz Ermənistan ərazisindən istədiyimiz kimi Naxçıvana keçib gedə bilirikmi? Yox. O zaman biz Laçın yolu ilə Ermənistandan Qarabağa sərbəst gediş-gəlişə niyə icazə verməliyik? Üstəlik, həmin yolla silah-sursat, terrorçu gətirilir. Ona görə də Aİ rəsmisinin yanaşması qərəzli və ədalətsizdir. Konkret olaraq Avropa İttifaqının xarici siyasət və təhlükəsizliyinə cavabdeh olan bir şəxsin belə bir münasibət bildirməsi son dərəcə qərəzli və ikili standartlara uyğun yanaşmadır. Bu, xristan həmrəyliyinə, erməni təəssübkeşliyinə söykənən açıqlamadır. Bəli, Azərbaycan Avropanın enerji təhlükəsizliyində kifayət qədər rol oynayır. Hətta Aİ ölkələrinin üçdə biri ilə bizim tərəfdaşlıq razılaşmamız var. Ancaq bütün bunlara baxmayaraq, Aİ yenə də Ermənistana daha yaxındır və Azərbaycanın pozulan haqlarını görməzdən gəlir. Qarabağdan minlərlə qovulmuş azərbaycanlının haqları Aİ-nin yadına düşmür. Ona görə də, kimin nə deməsindən asılı olmayaraq, Azərbaycan öz sərhədlərini gücləndirməlidir”.
Vidadi ORDAHALLI
