Fransanın Avropa və xarici işlər naziri Katrin Kolonna 26-28 aprel tarixləri ərzində Azərbaycana və Ermənistana səfər edəcək. Bu barədə Fransa XİN-in mətbuat xidməti xəbər verib.
"Nazir səfər zamanı Fransanın ədalətli, davamlı, ərazi bütövlüyünə və beynəlxalq hüququn prinsiplərinə hörmətlə yanaşan sülh naminə iki ölkə arasında danışıqların dəstəklənməsinə sadiqliyini ifadə edəcək"- xəbərdə deyilir.
Səfər çərçivəsində K.Kolonnanın azərbaycanlı həmkarı Ceyhun Bayramovla görüş keçirməsi gözlənilir.
Fransanın Azərbaycana qarşı nümayiş etditdiyi bu qədər qərəzin və erməniləri açıq dəstəkləməsinin fonunda, hətta bu ölkənin başçısının erməni dilində Ermənistana açıq dəstək ifadə etməsinə rəğmən, belə bir ölkənin rəsmisinin vasitəçilik səylərinə hansı inam ola bilər? Yaxşı olmazdı ki, bu səfərdən əvvəl Fransanın prezidentinin özü tərəfindən indiyə qədər aparılan qərəzli siyasətə bir düzəliş edilərdi?
Politoloq Yeganə Hacıyeva “Bakı-Xəbər”ə bildirdi ki, Fransanın ermənipərəst ölkə olmasının bir neçə vacib əsası var: “Burada çoxsaylı etnik erməni vətəndaş, onların geniş lobbi qrupu mövcuddur. Hətta Fransanın bəzi bölgələrində seçki nəticələrinə həlledici təsir edən, ölkə mediasında fikrin formalaşdırılmasında iştirak edən, o cümlədən qanunverici orqanlarda ermənilərdən ibarət siyasi qruplar var. Fransanın daxili siyasətinə təsir gücünə malik bələdiyyə strukturlarında da kifayət qədər geniş erməni şəbəkəsi mövcuddur. Məsələn, ermənilərin sıx yaşadığı bir çox yerlər, xüsusilə Marsel Fransanın bahalı turizm şəhəridir. Ümumiyyətlə, varlı ermənilər maliyyə hesabına Fransada fikir formalaşdıra bilirlər. Bu və digər səbəblərdən erməni lobbisinin Fransa qanunverici orqanları adından Azərbaycana hücumları, böhtan kampaniyaları mütəmadi xarakter alıb.
Fransa qanunverici orqanları, XİN Fransa dövlətinin deyil, erməni iddialarının marağına xidmət edir. Bu məqamda onu da xatırlatmaq istəyirəm ki, xarici siyasət üzrə Fransanın məşhur siyasətçisi, deputat Jerom Lamber hələ iki il öncə Fransa xalqının maraqlarının bır qrup erməninin girovuna çevrilməsinə etiraz etmişdi.
Fransa XİN-i daxili siyasətdə kök salmış erməni qrupunun diqtə etdiyi nöqteyi-nəzərlərdən çıxış edir”.
Politoloqun sözlərinə görə, Fransa qlobal geosiyasətdə aparıcı rola malik olmaq niyyətindədir: “Bu baxımdan da, Cənubi Qafqazda formalaşan yeni geosiyasi düzəndə rol almaq istəyir. Bu rolu da Ermənistan vasitəsilə əldə etməyə çalışır. Nəyə görəsə Fransa fikirləşir ki, bölgənin ən zəif və ən gücsüz ölkəsi – Ermənistan vasitəsilə, yaxud Azərbaycana təzyiq etməklə regionda formalaşan nizamda özünə yer edə bilər. Bu səhv yanaşmadır.
Cənubi Qafqazdakı mövcud geosiyasi durum hansısa kənar oyunçunun burada gedən prosesdə yer almaq səylərini heçə endirir. Daxili oyunçuların - Gürcüstan, Rusiya, Azərbaycan və Türkiyənin bölgədəki rolları kənar oyunçuların bura daxil olmasına imkan vermir.
Aİ-nin missiyasında 60-70 silahlı fransız jandarmının bura gəlməsi də burda heç nəyi Fransanın xeyrinə dəyişmir. Odur ki, fransız nazirin səfər zamanı Fransanın ədalətli, davamlı, ərazi bütövlüyünə və beynəlxalq hüququn prinsiplərinə hörmətlə yanaşan sülh naminə iki ölkə arasında danışıqların dəstəklənməsinə sadiqliyi kimi səslənən, bu prosesə töhfə verən hər hansı bir konstruktiv yanaşmanın gözlənilməsi sadəlöhvlükdür. Fransa prezidentindən isə bu səfərdən öncə hansısa yumşaldıcı jest gözləməyə də dəyməzdi. Bunu etsəydi, indiyə qədər yürütdüyü siyasətin əksinə getmiş olardı”.
Məhəmmədəli QƏRİBLİ
