Rusiya Xarici İşlər Nazirliyi Ermənistan-Azərbaycan münasibətlərinin normallaşması prosesindəki vəziyyətlə bağlı bəyanat yayıb.
Rusiya XİN Qarabağda, Ermənistan-Azərbaycan qoşunlarının təmas xəttində, eləcə də rəsmi Bakı ilə İrəvan arasında dialoqda yaranmış vəziyyətdən ciddi narahat olduğunu bildirib:
“Biz mövcud vəziyyətdən ciddi narahatlığımızı bildiririk.
Son dərəcə narahatlıqla atəşkəs rejiminin pozulması hallarının və hər iki tərəfdən mütəmadi olaraq itkilərlə nəticələnən müxtəlif insidentlərin artmasını qeyd edirik.
Biz Azərbaycanın və Ermənistanın ictimai məkanında ittihamedici və aqressiv ritorikanın artmasını heç də az təhlükəli hesab etmirik.
Tərəfləri dərhal mövcud razılaşmalara qayıtmağa çağırırıq.
Biz hesab edirik ki, yaranmış problemlərin bir çoxu uzun müddətli boşluq və Rusiya, Azərbaycan və Ermənistan liderləri arasında üçtərəfli sazişlərin əsas yolları üzrə danışıqlar prosesində irəliləyişin olmaması, xüsusilə regionda kommunikasiyaların açılmamasından irəli gəlir.
Ümid edirik ki, Bakı və İrəvan siyasi iradə nümayiş etdirəcək və yaxın gələcəkdə bu mənfi tendensiyanın öhdəsindən gələ biləcəklər.
Rusiya tərəfi Azərbaycana və ona yaxın olan Ermənistana bütün lazımi yardımı göstərməyə hazırdır.
Biz həmçinin xarici Qərb oyunçularına və öz fürsətçi gündəmləri üzərində işləyən yerli rusofob elementlərinə xəbərdarlıq edirik: Rusiyaya qarşı qarayaxma kampaniyası da daxil olmaqla, vəziyyəti qarışdırmağa cəhd etməsinlər”.
Göründüyü kimi, bəyanatda bildirilir ki, indiki gərginliyin yaranmasının başlıca səbəbi danışıqlar prosesində fasilənin yaranması və regional kommunikasiyaların açılmamasıdır. Bəllidir ki, qeyri-konstruktivlik göstərən, görüşlərdən yayınan biz yox, məhz Ermənistandır. Buna baxmayaraq, Rusiya yenə də məsələyə balanslı yanaşır, tərəflərin məsuliyyətini eyniləşdirir. Belə yanaşmanın prosesə nə kimi təsiri ola bilər?
Demokratik Dəyişim Partiyasının sədri Əli Mustafa “Bakı-Xəbər”ə bildirdi ki, Rusiyanın yaydığı bəyanat doğrudan da maraqlı məzmundadır: “Bir çox məqamlarda birinci dəfədir ki, belə mülahizələr irəli sürülür. Anlaşılan odur ki, Rusiya sanki özünü arbitr kimi görür, heç bir məsuliyyətinin olmadığı qənaəti ilə danışır. Amma əslində elə deyil. Üçtərəfli razılaşmada Rusiya çox ciddi bir məsuliyyəti üzərinə götürüb. Mən düşünürəm ki, indi yaranmış problemlər əsas da Rusiyanın payına düşür. Söhbət ondan gedir ki, Zəngəzur dəhlizinin açılmaması, eyni zamanda Ermənistan silahlı qüvvələrinin Qarabağdan çıxarılmaması, Qarabağdan qovulan azərbaycanlıların qaytarılmaması və s. kimi məsələlərdə Rusiyanın məsuliyyəti Ermənistanın məsuliyyəti ilə eynidir. Ona görə də, daha çox ümumi, müəmmalı mülahizələr irəli sürülür, çünki Rusiya öz məsuliyyət məsələlərinin görünməsini istəmir. Anlaşılan odur ki, Rusiya regionda olmaq istəyir, amma münaqişənin həllində də xüsusi fədakarlıq etmək niyyətində deyil. Rusiya münaqişənin qalmasını, donmasını istəyir, kimsənin də bura müdaxiləsini istəmir. Qərbin də iştirak cəhdləri Rusiyanın ürəyincə deyil. Hətta orda qarşıdurmanın, gərginliyin yaranması, atəşkəsin pozulması halları da daha çox Rusiyanın məsuliyyətini müəyyən edən amillərdəndir. İstər Ermənistan, istər Azərbaycan tərəfdən atəşkəsin pozulmasında iştirak edən elementlər yəqin ki, daha çox 5-ci kolon, yəni Rusiyaya bağlı qüvvələr tərəfindən törədilir. Ona görə də, bu məsələlərdə də Rusiya səmimi deyil. Qısası, hətta tərəflərin dialoqunun belə olması Rusiyanın ürəyincə deyil. Bütün bunlardan çıxan qənaət odur ki, Rusiya sadəcə olaraq regionda olmaq istəyir və münaqişənin həllində maraqlı deyil. Fürsət olarsa, yenidən bu regionda hakimlik statusunda qalmaq arzusundadır. Ona görə də, mən düşünürəm ki, əslində burda Rusiyanın, Fransanın və başqa dövlətlərin nə deməsindən asılı olmayaraq Azərbaycan konkret öz milli maraqlarına, dövlət süverenliyinə uyğun olaraq zəruri addımları atmalıdır və Qarabağın süverenliyinin bərpası bu gün dövlətin bir nömrəli məsələsi olmalıdır. Bizim öz suveren ərazimizdə nəzarət-buraxılış məntəqəsi düzəltmək haqqımız və hüququmuz var. Heç bir ölkənin bəyanatı bizi bu məsələdən soyuda bilməz”.
Məhəmmədəli QƏRİBLİ
