Aprelin 23-ü saat 12:00-da Azərbaycan Respublikası Dövlət Sərhəd Xidmətinin bölmələri tərəfindən ölkəmizin suveren ərazilərində, Ermənistan ilə sərhəddə, Laçın-Xankəndi yolunun başlanğıcında sərhəd-buraxılış məntəqəsi qurulması Qarabağdakı separatçı rejimi təşvişə salıb. Separatçı rejimin rəhbəri Araik Arutunyan bu gün təcili müşavirə keçirib.
Daha sonra Araik Arutunyan separatçıların blokadasının aradan qaldırılması üçün Rusiyaya müraciət edib. Separatçı rejim artıq anlayır ki, Azərbaycanın separatizmin bütün təzahürlərinə qarşı sərt mövqeyi geriyə dönüşü olmayan bir addımdır. Ermənistanın özündə də ciddi narahatlıq hiss edilir. Hakimiyyət qurumları bütün dünyaya car çəkirlər ki, güya Qarabağdakı ermənilər “blokada” və “soyqırım” təhlükəsi ilə üzləşiblər. Bizim öz ərazimizdə nəzarət-buraxılış məntəqəsi qurmağımızdan ermənilər niyə belə narahat olur?
Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki, Azərbaycan bu addımın atılması üçün bugünə qədər bütün zəruri hərəkətləri edib: “ Bütün yollar ordumuzun tam nəzarətindədir. Separatçıların istifadəsində olan yeganə yolun keçdiyi Həkəri çayı üzərində olan körpüdə artıq Azərbaycan Respublikasının sərhəd-buraxılış məntəqəsi qurulub.
Xatırladaq ki, bu nəzarət-buraxılış məntəqəsi Rusiya sülhməramlılarının məsuliyyət zonasına daxildir. Lakin Azərbaycan tərəfinin dəfələrlə xəbərdarlıq etməsinə baxmayaraq, bu məntəqədən separatçı rejimin həvəsləndirilməsinə hesablanmış hərbi təyinatlı yüklər və hərbi təyinatlı Ermənistan vətəndaşlarının keçməsinin qarşısı alınmayıb”.
Hərbi şərhçinin sözlərinə görə, ermənilərin narahatlığının digər amili isə psixolojı məsələ ilə bağlıdır: “Azərbaycan artıq sübuta yetirdi ki, öz ərazisini tamamilə nəzarət altında saxlamaq imkanına malikdir. Paralel olaraq, Ermənistan-Azərbaycan şərti dövlət sərhədi istiqamətindəki Azərbaycanın Kəlbəcər və Laçın rayonlarında, digər sərhəd zolaqlarında da Dövlət Sərhəd Xidmətinin fəaliyyəti gücləndiriləcək. Bunun nəticəsində Ermənistanın qaçaqmalçılıq yolu ilə Azərbaycan ərazisinə qanunsuz hərbi avadanlıqlarının keçidi və separatçıların gediş-gəlişi məhdudlaşdırılacaq. Bu hadisə Ermənistanda çox ciddi narahatlıqla qarşılanıb. Qarabağdakı separatçı ermənilərdə isə ikiqat artıq narahatlıq doğurub. Çünki artıq həm Ermənistan hakimiyyəti, həm separatizmi dəstəkləyən erməni silahlıları və təşkilatları, cinayətkar qruplar vəziyyətin köklü şəkildə dəyişdiyinin şahidi oldular. Onlar bugünədək Azərbaycanın səsləndirdiyi rəsmi fikirlərə məhəl qoymurdu.
Üçüncü amil isə Azərbaycanın siyasi iradə nümayiş etdirməsidir. Bu siyasi iradə həm Ermənistana, həm Qarabağdakı separatçılara, həmçinin təcavüzkarı dəstəkləyən ölkələrə, paralel olaraq münaqişənin həlli ilə bağlı vasitəçilik missiyasını üzərinə götürən Rusiya Federasiyasına və Avropa İttifaqına yönələn mesaj idi. Bundan sonra Azərbaycanın artıq bu məsələ ilə bağlı səsləndirdiyi fikirlər daha ciddi qəbul olunacaq. Bu hadisə danışıqlar prosesində yeni bir dövrün başlanğıcı olacaq. Sərhəd-keçid məntəqəsinin qurulması Ermənistanla Azərbaycan arasında aparılan danışıqların yeni dövrünün başlanğıcı olacaq. Düşünürəm ki, bu, geniş və qlobal mənada da həmin prosesə fayda verəcək. Ermənilər üçün heç bir genosid təhlükəsi yoxdur. Azərbaycan dəfələrlə bu mövzu ilə bağlı mövqeyini açıqlayıb”.
Məhəmmədəli QƏRİBLİ
