Ermənistan Azərbaycanın ərazi bütövlüyünü tam şəkildə tanıyır və biz Ermənistan SSR-in bütün ərazisini Ermənistan kimi tanımaqla Azərbaycanın da eyni addımı atmasını gözləyirik.
Bunu baş nazir Nikol Paşinyan parlamentdə 2022-ci il üçün hökumət proqramının icrası ilə bağlı hesabatla çıxış edərkən deyib. Daha sonra o bildirib:
“Ermənistan və Azərbaycan arasında sülh sazişi o zaman realdır ki, hər iki ölkə bir-birinin ərazi bütövlüyünü birmənalı şəkildə, qeyri-müəyyənlik və hiylə olmadan tanısın və bu gün və əbədi olaraq bir-birinə ərazi iddiası irəli sürməyəcəyinə söz versin”.
O, bu barədə Azərbaycan Prezidenti İlham Əliyevlə Praqa və Soçi görüşlərində razılaşdığını bildirib.
“...Bir daha təsdiq etmək istəyirəm ki, Ermənistan ərazi bütövlüyünü tam şəkildə tanıyır və Ermənistan ərazisini Ermənistan SSR-in ərazisi kimi tanıyaraq Azərbaycanın da eyni addımı atmasını gözləyir”.
Əslində, Paşinyanın irəli sürdüyü “şərt” gülməli görünür. Məgər Azərbaycan indiyə kimi Ermənistanın ərazi bütövlüyünü tanımırdı ki, Paşinyan belə “şərt” irəli sürür?
Siyasi şərhçi Elşad Həsənov “Bakı-Xəbər”ə bildirdi ki, 44 günlük zəfər qələbəsindən sonra Azərbaycan dövlətinin tələbi ilə 5 bənddən hazırlanmış sülh müqaviləmiz bu gün də ortadadı: “Sülh müqaviləsinin bağlanması haqqında keçən il bir neçə dəfə danışıqlar aparıldı. Paşinyan iki dəfə bildirdi ki, keçən ilin sonuna kimi sülh müqaviləsi imzalanacaq. Ancaq Ermənistanda olan müəyyən qüvvələr, 5 - ci kolon sülh müqaviləsinin bağlanmasına mane oldu, sərhəddə təxribatlar törətdilər. Paşinyanın aprelin 30-da olan çıxışı nə deməkdir? Biz bunu əvvəllər də eşitmişik - 91-ci il xəritələrinə istinadən sərhədlərin müəyyən edilməsi və sülh müqaviləsinin imzalanması. Biz bunu keçən il Praqada bəyan etdik. Azərbaycan Ermənistanın, Ermənistan da Azərbaycanın ərazi bütövlüyünü tanıdı və bu haqda da bəyanat verildi. Ancaq Ermənistan bu məsələləri yubatdı, təxribatlar törətdi və sülh müqaviləsi bağlanmadı. İndi Paşinyanın bu məsələdəki fikri nədir? Hazırki dövrdə dünyanın xəritəsi yenidən çəkilir. Dünya güclər arasında bölünür və artıq 3-cü dünya müharibəsi astanasındayıq. Demək olar ki, artıq 3-cü dünya müharibəsi gedir. Çünki Rusiyaya qarşı 50 - dən çox dövlət birləşib, Ukraynanı müdafiə edir. Eyni zamanda dünyanın digər bölgələrində də vəziyyət gərgindir, müharibə hıddindədir. Qonşumuz İran bizi təhdid edir, Ermənistana köməklik göstərir. Rusiya, Ermənistan və Azərbaycan arasında bağlanan 2020-ci il 10 noyabr üçtərəfli bəyənnaməsində göstərilən maddə - Azərbaycanın Naxçıvanla birləşməsi üçün Zəngəzur dəhlizi hələ də açılmayıb. İran bunu özünün qırmızı xətti hesab edir. Ancaq biz öz hədəflərimizə addım-addım irəliləyirik. Artıq biz Zəngəzur dəhlizinin açılmasını qətiyyətlə istəyirik və tez bir zamanda bu istəyimizə nail olacağıq. Keçən ildən artıq hərəkətə başlayan Qərbi azərbacanlılar hərəkatı Ermənistanda bir təşviş yaradıb”.
Ekspertin sözlərinə görə, bizim 1988 - ci ildə 260 mindən artıq deportasiya olunmuş həmyerlilərimiz öz yurdlarına qayıtmaq üçün beynəlxalq təşkilatlara, BMT - yə müraciət ediblər: “Bunlar da Ermənistan siyasilərini qorxuya salıb. Təsəvvür edin ki, Ermənistanda adamların sayı 2 milyonu ötmür. Bizim 250 – 300 min azərbaycanlımız o torpaqlara qayıtsa, qısa müddətdə say tərkibimiz artacaq və ermənilər əriyib gedəcəklər. Bunu dərk edən ermənilər, Paşinyan ona görə bir daha bu təklifi irəli sürür ki, biz sizinlə sülh müqaviləsi bağlamağa hazırıq, bu şərtlə ki, Azərbaycanla bir - birimizin ərazi bütövlüyümüzü tanıyaq, bu gün və gələcəkdə də heç vaxt ərazi iddiasında olmayaq. Azərbaycan müstəqillik qazanandan sonra heç vaxt Ermənistana qarşı ərazi iddiasında olmayıb. Baxmayaraq, torpaqların böyük əksəriyyəti Azərbaycan torpaqlarıdır. Ancaq biz həmişə sakit olmuşuq, işğal edilmiş torpaqlarımızın azadlığı uğrunda çalışmışıq. Nəhayət, 2020 - ci ildə buna nail olduq və bu gün də biz Azərbaycan torpaqlarında SSRİ miqyasında olan 91-ci il xəritəsinə əsaslanan torpaqlarımızdan erməni silahlı qüvvələrinin çıxarılmasını tələb edirik, sərhədlərin delimitasiya və demarkasiyasının aparılmasını istəyirik. Bunu cənab prezident dəfələrlə qeyd etdi. Ancaq ermənilər dəfələrlə təxribat törətdilər və etmədilər. Ancaq bu gün onları təşvişə salan əsas məsələ Azərbaycanın güclənməsi, iqtisadiyyatının inkişafı, dünyada artan nüfuzudur. Gələcəkdə Azərbaycanın torpaqlarını geri alacağından qorxuya düşən Paşinyan bu müqaviləni bağlamaq istəyir ki, bu gün və gələcəkdə heç vaxt torpaq iddiası olmasın. Mən düşünürəm ki, Azərbaycan Ermənistanı sülhə məcbur edəcək. Ermənistan məcburdur ki, biz dediyimiz maddə ilə sülh müqaviləsi bağlasın, yollar açılsın. Əgər ermənilər yenə də hər hansı bir təxribat törədib aranı qarışdırmasa, çox güman sülh müqaviləsi hər iki tərəfdən imzalanacaq”.
Məhəmmədəli QƏRİBLİ
