Ermənistanın keçmiş ombudsmanı Arman Tatoyan Sünik vilayətində faktların toplanması üzrə işlərin nəticələrini təqdim edərkən bildirib ki, güya 2022-ci il sentyabrın 13-14-də Azərbaycan silahlı qüvvələrinin müdaxiləsi nəticəsində Ermənistanın Sünik rayonunun Qafan icmasının 2700 hektar ərazisi “işğal” edilib:,
“Yalnız Qafan icmasının ərazisindən aşağıdakılar Azərbaycanın nəzarətinə keçib:
1) 2.400 hektar xüsusi mühafizə olunan torpaqlar
2) 170 hektar əkin sahəsi
3) 130 hektar kommunal torpaq.
Ümumilikdə - 2.700 hektar.
Göstərilən 2700 hektardan əlavə, 1000 hektardan çox ərazi təhlükəli zonada yerləşir, burada ya hər hansı kənd təsərrüfatı və digər işlərin görülməsi mümkün deyil, ya da real həyat təhlükəsi səbəbindən bu iş xeyli mürəkkəbləşib”.
Ermənistan ictimai rəyinə sızdırılan bu infpomasiyanı nə dərəcədə əsaslı saymaq olar?
Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki, Azərbaycan Naxçıvana dəhliz tələb edir və bu haqda üçtərəfli bəyanatda yazılıb: “Azərbaycan, əlbəttə ki, Naxçıvana yolu açacaq. Biz nəzərə almalıyıq ki, 44 günlük Vətən müharibəsində Ermənistan ciddi məğlubiyyətə uğrasa da, orada müəyyən revanşist əhval-ruhiyyə qalmaqdadır. Bu təkcə oradakı revanşist müxalifətlə bağlı olan məsələ deyil. Paşinyanın komandasında da bu mövqedə olanlar var. Biz nəzərə almalıyıq ki, Ermənistan formal olaraq müstəqil dövlətdir. Xarici oyunçuların bu ölkəyə təsir imkanları böyükdür. Ermənistan birtərəfli şəkildə Avropa İttifaqı monitorinq missiyasını sərhədə gətirməklə, regionda geosiyasi qarşıdurmanı körükləyir. Çalışır ki, regionda marağı olan böyük güclər toqquşsun. Ötən ilin sentyabrında Ermənistan Azərbaycanla sərhəddə genişmiqyaslı təxribat törətdi. Buna cavab olaraq ordumuz düşmənə güclü zərbə endirib, sərhəddəki hakim yüksəklikləri nəzarətə götürdü. Ondan sonra Ermənistanda belə fikirlər var ki, güc yolu ilə əldən verilən yüksəkliklər geri alınmalıdır. Ermənistan tərəfi elə hesab edir ki, Aİ missiyasının çətiri altında istənilən təxribata gedə bilərlər. Sərhədə yaxın məntəqələrdən mülki insanları çıxarıb hücüma keçə bilərlər. Hesab edirəm ki, belə bir təxribata gedərlərsə, bu onlara baha başa gələcək. Ordumuzun düşmənə vurduğu zərbə ötən ilin sentyabrından da ağır olacaq. 2020-ci il müharibəsində olduğu kimi, bu dəfə də himayədarları erməniləri xilas edə bilməyəcəklər. Bu baxımdan Ermənistanın müharibəyə hazırlıq cəhdlərini perspektivsiz hesab edirəm. Hazırda Azərbaycanla Ermənistan arasında sərhəd xətti konkret müəyyənləşməyib. Söhbət yalnız şərti dövlət sərhədindən gedə bilər. Ermənistan bundan istifadə edib, sərhəddəki vəziyyəti öz xeyrinə dəyişmək istəyir. Deyilən vaxtda da bənzər təxribatı törətdi və layiqli cavabını aldı. Bizim kiminsə ərazisində gözümüz yoxdur ki, işğalçılıq edək. Bu, ermənilərə xas olan xislətdir. Zəngəzur dəhlizi ilə bağlı məsuliyyətdən yayınmaq üçün məhz həmin ərazidə belə təxribata əl atdılar. Lakin istəkləri alınmadı. Ermənistan yalan işğal faktından danışmaq əvəzinə, öz öhdəliklərini yerinə yetirsə yaxşı olar. Bu öhdəliklərdən biri də hazırda erməni işğalı altında olan bizim 8 anklav kəndimizin geri qaytarılmasıdır. Bununla bağlı üçtərəfli müqavilədə də xüsusi bənd var. Ermənistan sərhəddə sakitlik istəyirsə, təxribatdan əl çəkməlidir. Sərhədlərin dəqiqləşməsilə bağlı prosesi sabotaj etməməlidir. Sərhəd boyu hakim yüksəkliklər bizim əlimizdədir. Biz vizual olaraq böyük ərazilərə nəzarət edirik. Bu heç də o anlama gəlmir ki, işğal həyata keçirmişik”.
Məhəmmədəli QƏRİBLİ
