Bugünlərdə Qarabağa qanunsuz səfər edən Ermənistan Təhlükəsizlik Şurasının katibi Armen Qriqoryanın Azərbaycandan üzr istədiyinə dair məlumat yayılıb. Bu barədə erməni saytı "168.am" xəbər dərc edib. Məlumatda bildirilir ki, dünən Qarabağdakı qondarma qurumun saxta bayramı münasibətilə Ermənistan Təhlükəsizlik Şurasının katibi Armen Qriqoryan Qarabağa gedib və oradan fotolar dərc edib.
“Sentyabrın 2-də mən Xankəndidə “qardaşlıq memorial-panteonunu” ziyarət etdim və müharibə zamanı həlak olmuş “qəhrəmanların” abidəsinin podstamenti önünə gül dəstələri qoydum” - Qriqoryan Facebook-da foto paylaşaraq yazıb.
Məlum olduğu kimi, Qriqoryanın qanunsuz səfərinə Azərbaycan Xarici İşlər Nazirliyi dərhal reaksiya verib, onu kəskin şəkildə pisləyib.
Saytın məlumatına görə, Armen Qriqoryan Azərbaycanın onun səfərinə reaksiyasından o qədər şoka düşüb ki, qapalı kanallar vasitəsilə Qarabağa səfərinə görə Azərbaycan tərəfindən üzr istəməyə tələsib.
Armen Qriqoryan izah edib ki, mənşəcə Qarabağ vətəndaşıdır və Qarabağa səfəri siyasi deyil, şəxsi məqsədlər üçündür: atasının evini və məzarını ziyarət etmək istəyib.
“Bu da Ermənistanın riyakarlıqdan əl çəkdiyinin göstəricisi yox, Azərbaycanın real gücünün göstəricisidir”
Qriqoryanın Azərbaycandan üzr istəməsi məsələsinə şərh verən AVCİYA-nın vitse-prezidenti, siyasi şərhçi, professor Məhərrəm Zülfüqarlı “Bakı-Xəbər”ə bildirdi ki, erməni separatizmi Azərbaycana qarşı 1988-ci ilin fevralından güclənməyə başlayandan indiyə qədər Ermənistan respublikası adlı qurum riyakarlıqla məşğuldur: “Yəni bütün bu separatizmin, Azərbaycana qarşı təxribatların başında duran Ermənistan respublikası proseslərdə daim özünü arxa planda saxlamağa çalışıb. Əlbəttə, bu məsələdə ona Rusiya dəstək verib. Proseslər Ermənistanın əleyhinə işləyəndə isə yaxasını kənara çəkib “burada bizlik bir şey yoxdur, Ermənistan respublikası heç qondarma rejimin müstəqilliyini tanımır və biz bu işlərə qarışımırıq, bütün bu işləri görən Qarabağdakı ermənilərdir, siz onlarla danışın” deyirlər. Yəni riyakarlıqla bizi qondarma rejimin tör-töküntüləri, separatçılarla bilavasitə danışıqlara cəlb edilməsi təxribatına çəkmək istəyirlər. Əlbəttə, bunun heç bir nəticəsi yoxdur. Çünki Azərbaycan tərəfi erməni riyakarlığınının tarixinə, kökünə bələddir. İndi də dediyimiz məsələ həmin siyasətin tərkib hissəsidir. Amma burada fərqli cəhət ondan ibarətdir ki, artıq Ermənistan o Ermənistan deyil, “Dağlıq Qarabağ” yoxdur, oradakı separatçılar da yalan təbliğatla, şər-böhtanla dünyanı çaşdıra bilmir. 44 günlük Vətən müharibəsində qələbədən sonra dünya düzənində dəyişiklik olduğu kimi, (mən əsasən Ukrayna və Rusiya müharibəsini nəzərdə tuturam-M.Z) Qafqazda da böyük dəyişikliklər olub. Azərbaycan dünyaya öz real gücünü sübut edib, bu da Ermənistanın riyakarlığının qarşısını almağa kömək edir”.
M.Zülfüqarlının fikrincə, Qriqoryanın Qarabağa qanunsuz səfərinin mahiyyətində heç də “atasının qəbrini ziyarət” dayanmayıb, onun bu səfəri pozuculuq mahiyyəti daşıyıb. M.Zülfüqarlının sözlərinə görə, əgər o oraya iddia etdiyi kimi atasının qəbrini ziyarətə gəlmişdisə, bəs onda qondarma “qəhrəmanların” məzarlarını niyə ziyarət edib, gəlib atasının məzarını ziyarət edib gedə bilərdi: “Ermənistan Təhlükəsizlik Şurasının katibi Armen Qriqoryanın Qarabağa səfərinin şəxsi mahiyyət daşımadığı məlumdur. Ermənistanın riyakarlığı hər zaman özünü büruzə verir. Bu adam atasının məzarını ziyarətə gəlsəydi də belə, yenə Azərbaycan dövlətindən rəsmi icazə almalı idi. Əlbəttə, Azərbaycanın rəsmi qurumlarının onun səfərinə reaksiyası sərt oldu, bundan da Qriqoryan və onun kimiləri ciddi nəticə çıxarmalıdır. Qriqoryanın hansısa kanallar vasitəsilə Azərbaycandan üzr istəməsi o deməkdir ki, Ermənistan ətəyindən daşı töküb reallıqla barışmağa başlayır. Təbii, bu da Ermənistanın riyakarlıqdan əl çəkdiyinin göstəricisi yox, Azərbaycanın real gücünün göstəricisidir. Bundan sonra da Azərbaycan ayıq-sayıq olmalıdır, erməni təxribatını anındaca dəf etməyi bacarmalıdır ki, sonradan bu proseslər güclənib Azərbaycana qarşı təxribatlarla ayaq açıb yeriməsin”.
M.Zülfüqarlı hesab edir ki, yaxın gələcəkdə Azərbaycanın uğurları regionda daha da artacaq və ermənilər əvvəlki riyakarlıqlarını etmək gücündə olmayacaqlar.
İradə SARIYEVA
