ABŞ Konqresi tərəfindən Azərbaycanın ərazi bötövlüyünə qarşı təxribat törədilib. Yerli medianın yaydığı məlumata görə, ABŞ konqresinin Erməni İşləri Komitəsinin üzvləri Frenk Fallon, Qus Bilirakis, Ceki Spir, Devid Valdao və Adam Şiff erməni separatçılarının rəhbəri Arayik Arutyunyana təbrik məktubu göndərib.
Sözügedən məktubda Azərbaycanla bağlı təxribat və böhtan xarakterli fikirlər yer alıb.
“Amerika Birləşmiş Ştatları Konqresi hər zaman sizə öz dəstəyini göstərir. Azərbaycandan gələn təhdidlər və davam edən çağırışlara dözümlülük göstərirsiniz, sizin yanınızdayıq. Biz ABŞ hökumətini 2020-ci ildə hücuma və bugünə qədər davam edən ölümcül hərəkətlərə görə Azərbaycan və Türkiyə rejimlərini cəzalandırmaq üçün bütün mövcud diplomatik tədbirlərdən istifadə etməyə çağırırıq. Sizinlə işləməyi səbirsizliklə gözləyirik” - Arutyunyana göndərilən məktubda deyilir.
Separatçıbaşına ünvanlanan məktubda konqresmenlərin erməni separatçılarına aşkar şəkildə dəstək verdikləri və Azərbaycanın ərazi bütövlüyünə qarşı olduqları ifadə olunub.
Qeyd edək ki, ABŞ konqresindən zaman-zaman Azərbaycana qarşı bənzər təxribatlar baş verib.
“ABŞ konqresmenlərinin köhnə qeyri-konstruktiv mövqeni davam etdirməsi sülh müqaviləsinin imzalanmasına qarşı cəhdlərdir”
Bəzi ABŞ konqresmenlərinin separatçıbaşı Artunyunyana göndərdiyi “şanlı məktubla” bağlı şərh verən AMEA-nın Qafqazşünaslıq İnstitutunun ermənişünaslıq şöbəsinin müdiri, professor Qasım Hacıyev “Bakı-Xəbər”ə bildirdi ki, ermənilər tarixən həmişə məqam gözləyir və imkan düşən kimi, öz mənfur niyyətlərini ortaya qoyurlar. “Onlar bu təxribatların adını “mübarizə” qoysalar da, niyyətləri göz önündədir. Bu təxribatları da Azərbaycana və Türkiyəyə qarşı həyata keçirirlər. Harada türk varsa, harada türk xalqı ilə bağlı müzakirə varsa, ermənilər dərhal ora müdaxilə etməyə, əks çıxışlar səsləndirməyə, təxribatlar törətməyə tələsirlər. Elə şeylər yazırlar ki, adam məəttəl qalır. Biz bunu Vətən müharibəsi dövründə də gördük. Onlar bu müharibədə məğlub olandan sonra bizə qarşı təxribat məsələsində daha çox fəallaşıblar. Belə ki, gördüyünüz kimi, özlərinin məğlubiyyətinin səbəblərini şərh edərkən böhtanlar atırlar. Bu gün Qarabağda mövcud olan separatçılarla bağlı ermənilər elə uydurmalar ortaya atırlar ki, adama qəribə gəlir. Erməni lobbisinin həmişə ABŞ Konqresində muzdlu konqresmenləri olub, indi də var. Separatçı Araik Artunyunyana məktub yazıb ona hanısa dəstəyi “vəd” edənlər də erməni lobbisinin puluna satılanlardır. ABŞ və Azərbaycanın əlaqələri inkişaf edir, bu ölkədə Azərbaycan həqiqətlərini bilənlər çoxdur. Amma təəssüf ki, erməni lobbisi bu konqresmenlərdən bəzilərini ya pulla, ya şantaj, hədə-qorxu, terror yolu ilə ələ keçirib, onlar da Azərbaycanın ərazi bütövlüyünə qarşı təxribat xarakterli çıxış edirlər. Erməni təbliğat maşını gecə-gündüz şər-böhtan uydurub yayır. Konqresmenlər isə az qala öz cəfəng fikirlərini ABŞ-ın “rəsmi” mövqeyi kimi təqdim etməyə çalışırlar. Erməniləri yazıq, məzlum, “əzilən” xalq kimi qələmə verən konqresmenlər bununla ABŞ-ı Azərbaycana qarşı qaldırmağa çalışırlar. Təsəvvür edin ki, bu adamlar Qarabağ probleminin mahiyyətini bilmirlər, ermənilərin separatçı addımlarını, Ermənistanın işğalçılığını etiraf etmirlər, kimin kimin ərazisini işğal etdiyini dilə gətirmirlər. Vətən müharibəsindən sonra bəzi ABŞ konqresmenləri erməni fitnəsinə uyub Azərbaycanın ərazi bütövlüyü əleyhinə çağırışlar edirlər. Bütün bunlar bir dövlət kimi ABŞ-ın da nüfuzunun zədələnməsinə xidmət edir”.
Vətən müharibəsindən sonra Azərbaycanın azad ərazilərinə xarici ölkələrin səfirlərinin, diplomatlarının səfərlərinin təşkil edildiyinə diqqət çəkən Q.Hacıyev xatırlatdı ki, Şuşaya təşkil edilən səfərə başqa ölkələrin səfirləri getdiyi halda ABŞ və Fransa səfirlərinin bundan imtina etməsi bizə çox şey deyir: “Onlar azad Şuşaya getmədilər. Bu da nədən qaynaqlanır? Bundan belə anlaşılır k, həm ABŞ-ın, həm də Fransanın Azərbaycana, Azərbaycan dövlətinə rəğbəti yoxdur. Bunlar bölgədə sanki erməniləri, separatçıları müdafiə etmək üçün durublar. Dəfələrlə açıqlanıb ki, ATƏT-in Minsk qrupu 30 ildə heç bir iş görmədi, o artıq yoxdur, onu “diriltmək” cəhdləri əbəsdir. Amma bunlar yenə də buna cəhd edirlər. Amma ölünü diriltmək mümkün deyil. ABŞ da, başqa ölkələr də bir daha bilməlidir ki, separatçıların yaşadığı ərazi Azərbaycanın tarixi torpağıdır, ayrılmaz parçasıdır, beynəlxalq hüquqla tanınan ərazisidir.
Əlbəttə, bu məsələdə ABŞ-ın mövqeyi məlumdur. Təəssüflər olsun ki, obyektivlikdən, demokratiyadan, insan haqlarından danışan bu dövlətlər Azərbaycan dövlətinə, xalqına gəldikdə bunları unudurlar və ermənipərəstlik mövqeyindən çıxış edirlər. ABŞ konqresindəki ermənipərəst qrup Azərbaycana qarşı bilərəkdən, qəsdən təxribatlar aparır. ABŞ konqresinin Erməni İşləri Komitəsinin üzvləri arasında ermənilər də, erməni olmayanlar da var, onları ermənizmə, terrora xidmət birləşdirir. ABŞ-ın bəzi konqresmenləri yeni heç nə deməyib, köhnə havanı çalırlar. ABŞ konqresmenlərinin köhnə qeyri-konstruktiv mövqeni davam etdirməsi sülh müqaviləsinin imzalanmasına qarşı cəhdlərdir. Bu gün nə “Dağlıq Qarabağ” var, nə də “Arsax” adlı qondarma rejim mövcuddur, iflasa uğrayıb, yerində isə bir ovuc tör-töküntü qalıb. Yenə deyirəm, ora Azərbaycan ərazisidir. Dövlətimizin içində saxta, qondarma “dövlətlərin” yaradılmasına nə Azərbaycan dövləti və xalqı, nə də dünya razı ola bilər. Bir-iki dövlətin bu cür cəhdləri isə həqiqətən də beynəlxalq prinsiplərə ziddir. Bu, ABŞ kimi dövlətin qazandığı imicə, Azərbaycanla münasibətinə ziyan vuran hərəkətdir. Ona görə də hesab edirəm ki, anti-Azərbaycan mövqeyində olan konqresmenlərin ABŞ dövlətinə təqdim etdikləri cəfəng təkliflər rədd edilməlidir. Separatçılara verilən hər hansı bir dəstək Azərbaycanın ərazi bütövlüynə qarşı böyük qəsddir. Fikrimcə, ABŞ konqresindəki ermənipərəst qüvvələrin ziyanlı fəaliyyətinə qarşı ABŞ hökuməti addım atmalıdır. Konqersmenlərin separatçıbaşı Araikə göndərdikləri məktubda ifadə etdikləri cəfəng fikirlər Azərbaycana qarşı təxtibatdır”- deyə Q.Hacıyev qeyd etdi.
İradə SARIYEVA
