Brüssel səfərindən dönər-dönməz, Ermənistan Baş naziri Nikol Paşinyan yenə də köhnə havanı çalmağa başlayıb. Belə ki, o, Qarabağ separatçılarının “müstəqilliyinin 31-ci ildönümü” ilə bağlı açıqlama verib və açıqlamasında yenidən “status” sayıqlamasını dilə gətirib.
Ermənistanın Baş naziri “Dağlıq Qarabağ”ın ərazi vahidi kimi mövcud olduğunu, məsələnin həll edilmədiyini bildirib.
“Paşinyanın pozucu bəyanatına baxmayaraq, Brüssel görüşü də bir daha göstərdi ki, məsələ bitib...”
Paşinyanın yenidən köhnə havanı çalmasına şərh verən Azad Vətən Partiyasının sədri Akif Nağı bizimlə söhbətində bildirdi ki, Ermənistanın birmənalı mövqeyi yoxdur: “Təbii ki, Ermənistanın mövqeyi ikili, üçlü mövqedir. Ermənistan çalışır ki, nəyin bahasına olursa-olsun, regionda ən azından gələcəkdə bir situasiya yaranacaqsa, özünə tutacaq yeri saxlasın. Ona görə də Ermənistan gah nala, gah da mıxa vurur, gah o tərəfə, gah bu tərəfə əyilir. Brüsseldəki açıqlamalardan məlum oldu ki, orada nə “status” məsələsindən, nə də Qarabağdakı ermənilərin hansısa siyasi qurumlarından, gələcəklərindən söhbət gedib, bu barədə ümumiyyətlə danışılmayıb. Paşinyanın pozucu bəyanatına baxmayaraq, Brüssel görüşü də bir daha göstərdi ki, məsələ bitib və Azərbaycanın mövqeyi beynəlxalq təşkilatlar, böyük dövlətlər tərəfindən qəbul olunur. Artıq Azərbaycanla Ermənistan arasında münasibətlərin normallaşdırılmasından söhbət gedir. Yəni Brüsseldə məsələ bu şəkildə qoyulub, başqa şəkildə qoyulmayıb. Azərbaycan aydın şəkildə bildirir ki, Qarabağ Azərbaycanın ərazisidir, ermənilərin də yaşadığı ərazi Azərbaycanın ərazilərindən biridir, onun da statusu və sair başqa bölgələrimizdəki kimidir. Bunu da dünya ölkələri qəbul edib. Amma ermənilər öz xislətlərindən əl çəkə bilmirlər, onlar hansısa bir hadisədən sonralar özlərinin xeyrinə istifadə etmək istəyirlər. İndiyə qədər onların siyasəti bundan ibarət olub. Onlar anlayır ki, Azərbaycan hər şeyə nail olacaq və orada erməni quldurlarının, separatçıların izi-tozu qalmayacaq. Onlar orada ya Azərbaycan vətəndaşı olaraq yaşayacaqlar, ya da çıxıb gedəcəklər. Onlar gedəndən sonrakı vəziyyəti düşünürlər ki, sabah ortaya qoyacaqları iddianın müəyyən “elementlərini” indidən ortaya qoysunlar. Onlar hansısa Avropa ölkəsində qondarma “Arsax Respublikasının” hansısa qondarma qolunu yaradıb, oradan Azərbaycana qarşı təbliğat vasitəsi kimi istifadə edəcəklər. Bunların işi budur. Paşinyan da bu gün həmin oyunları oynayır. Paşinyan həmin o müraciətdə “yekun status hələ müəyyənləşməyib” ifadəsini işlədib, Minsk qrupu ilə bağlı mövqeyini təkrar edir. Əlbəttə, o bununla Ermənistanın pozuculuq davranışlarını nümayiş etdirir. Ona görə də hesab edirik ki, Azərbaycan birmənalı şəkildə onun mövqeyini rədd etməlidir. Ermənilər çabalayırlar, nə isə etməyə çalışırlar. Son hadisələrə baxsaq görərik ki, heç kəsin indiyə qədər tanımadığı Vardanyan soyadlı iş adamı Rusiya vətəndaşlığından çıxıb Qarabağa gəlib. Bu da Rusiyanın Ermənistanla birgə oyunudur. Məsələyə bu mövqedən yanaşmalıyıq. Senytabrın 2-də İrəvandan müxalif qüvvələr Qarabağa gəlib burada müəyyən işlər həyata keçirməyə çalışdılar. Buna da Rusiya imkan verdi. Hardan gəldi onlar? Bu məsələyə görə Rusiya sülhməramlıları tam məsuliyyət daşıyır. Nə üçün oradan kimlərsə gəlib siyasi alverlə məşğul olur? Ermənistan rəsmilərindən təhlükəsizlik şurasının katibi Armen Qriqoryanın da Qarabağa gəlməsi Azərbaycana qarşı çox böyük təhdiddir, Rusiya sülhməramlıları tərəfindən hörmətsizlikdir. Onlar buna nə üçün şərait yaradıblar?”
A.Nağı deyir ki, ermənilər bu kimi təxribatçı addımlarla Qarabağda ermənilərlə bağlı mümkün qədər çox şey saxlamağa çalışırlar. “Tör-töküntülər oradan rədd olub gedəndən sonra təbliğatları üçün indi “tezislər” yaradırlar ki, gələcəkdə istifadə etsinlər. Azərbaycan buna imkan verməməlidir. Danışıqlarda bunu şərt olaraq ortaya qoymalıdır. Əgər danışıqlara Rusiya vasitəçilik etmək istəsə, Azərbaycan konkret şərt irəli sürməlidir ki, Ermənistan “status”, “Minsk qrupu” kimi artıq iflasa uğrayan məsələlərə son qoymalıdır. Eyni zamanda, əgər Brüssel, Şarl Mişel bu danışıqlara vasitəçilik etmək istəsə, burada da şərt qoyulmalıdır ki, Ermənistan danışıqlar prosesini pozursa və danışıqlarda əldə olunmuş razılıqdan kənar hərəkətlər edib ortaya mövqe qoyursa Azərbaycan danışıqlardan çıxacaq. Fikrimcə, Azərbaycanın mövqeyi bu şəkildə olmalıdır”-deyə partiya sədri qeyd etdi.
İradə SARIYEVA
