“Biz heç bir zaman özümüzü nəhəng qonşularımızın siyasətinə uyğunlaşdırmamışıq”. Bu barədə Prezident İlham Əliyev İtaliyada keçirilən 48-ci beynəlxalq Çernobbio Forumunda sualları cavablandırarkən bildirib.
Dövlət başçısı qeyd edib ki, bu çətin görünə bilər. Lakin bu bizim tariximizdir, bizim coğrafiyamızdır və biz bu coğrafiyada hər zaman yaşamışıq: “Nə biz, nə də qonşularımız bu coğrafiyanı dəyişə bilməz. Düşünürəm ki, ölkəmizin uğuru siyasi inkişafda, müstəqilliyin gücləndirilməsindədir. Biz keçən il müstəqilliyimizin 30-cu ildönümünü qeyd etdik. Bu göstərir ki, qonşularla normal münasibətləri saxlamaq mümkündür. Eyni zamanda, bizim ölkəmizdən çox böyük olan qonşularla da münasibətləri saxlayaraq öz milli kimliyimizi, müstəqilliyimizi və müstəqil siyasi mövqeyimizi qorumaq da mümkündür. Qonşularımızla münasibətlərə gəldikdə isə deyə bilərəm ki, biz hər zaman əməkdaşlıq sahələrini tapmağa çalışırıq. Problemli sahələri və yaxud da fərqli mövqelərimiz olan məsələləri hər zaman ifadə etmişik. Biz heç bir zaman özümüzü nəhəng qonşularımızın siyasətinə uyğunlaşdırmamışıq. Bizim hər zaman öz siyasətimiz olub, hansı ki, beynəlxalq hüquq, ədalət, beynəlxalq təşkilatların qərarları və sənədləri, həmçinin müdriklik üzərində formalaşıb. Buna görə də düşünürəm ki, biz uğur əldə etmişik. Azərbaycan artıq sabit siyasi mövqeyə malikdir, həmçinin iqtisadiyyatımız da sabitdir. Biz müstəqil olmaq üçün iqtisadi anlamda yatırımlar etmişik. Yoxsa biz özümüzü asılı hiss edərdik. Azərbaycan imperiyaların hissəsi olub, biz Sovet İttifaqının bir parçası olmuşuq. Artıq 30 ildir ki, bizim insanlarımız müstəqildir və biz əbədi olaraq müstəqil yaşamaq istəyirik. Bunun üçün biz güclü olmalıyıq. Bizim yaxşı dostlarımız olmalıdır".
“… biz hansısa xarici ölkələrin maraqları ilə uzlaşdırılmış siyasət aparmırıq”
Siyasi şərhçi Azər Həsrət “Bakı-Xəbər”ə açıqlamasında qeyd etdi ki, uzun illərdir bəzi qüvvələr iddia edir ki, Azərbaycan dövləti qonşuların maraqları ilə hesablaşır, onların müəyyən etdiyi yolla gedir. Ancaq dövlət başçısı İlham Əliyev dəfələrlə çıxışında qeyd edib ki, Azərbaycan dövlətinin öz maraqları var. Bu maraqlar nəyi tələb edirsə, biz də ona uyğun davranırıq: “Azərbaycan dövlətinin öz marağı var. İstənilən böyük və ya kiçik qonşunun maraqlarından üstündür, başqa cür də ola bilməz. Prezident İlham Əliyevin bu məsələni yenidən gündəmə gətirməsinin səbəbi bəzi qüvvələrin yenə də Azərbaycan dövlətinin kiminsə göstərişi ilə idarə edilməsini iddia etməsidir. İlham Əliyev bu məsələni bir daha xatırlatmağa zərurət duydu ki, Azərbaycan dövləti heç kimin arxasınca sürünmür. Bu həm də böyük qonşular üçün bir mesaj idi. Çünki onlar Azərbaycanda icrası mümkün olmayan tələblər irəli sürüblər”.
Həmsöhbətimiz onu da əlavə etdi ki, Azərbaycan hər bir addımında sərbəstdir, qərarları yalnız özü verir və böyük dövlətlərin maraqları Azərbaycan üçün indikator rolunu oynaya bilməz: “Hesab edirəm ki, cənab Prezidentin bu mesaji yerində deyilib və vaxtında deyilib. Bununla Rusiya, İran və Qərb dövlətləri öz hesabını götürməlidir. Azərbaycanla münasibət quran, onu inkişaf etdirmək istəyən dövlətlər nəzərə almalıdır ki, biz hansısa xarici ölkələrin maraqları ilə uzlaşdırılmış siyasət aparmırıq. Azərbaycanın dövlət maraqları hər şeydən öndə dayanır”.
Günel CƏLİLOVA
