Qarabağ separatçılarının "Müdafiə Ordusunun" keçmiş komandanı, general-leytenant Mikayel Arzumanyan həbs edilib. Ermənistan İstintaq Komitəsinin yaydığı məlumata görə, o, “Şuşa şəhəri və ona bitişik ərazilərin müdafiəsində səhlənkarlıq” işi ilə bağlı saxlanılıb.
İşin materiallarına görə, general-leytenant (İstintaq Komitəsinin hesabatında onun adı M.A. kimi göstərilib) oktyabrın 30-dan noyabrın 9-dək Şuşa və ona bitişik ərazilərin müdafiəsi üzrə üzərinə düşən vəzifələri lazımınca yerinə yetirməyib.
Bununla Ermənistanın Qarabağda müharibə apardığını təsdiqləyirlər. Qabaq deyirdilər ki, orada “özünümüdafiə ordusu” döyüşür. Şuşadakı uğursuzluğa görə generalı Ermənistanda istintaqa cəlb edirlərsə, deməli, İrəvan müharibənin onun tərəfindən aparıldığını da boynuna almış olur.
Qarabağdakı separatçı qüvvələrin rəhbərinin “baş müşaviri”, keçmiş “müdafiə naziri” Mikayel Arzumanyanın Şuşaya görə Ermənistanda həbsi ermənilərin 30 illik “Dağlıq Qarabağ müstəqildir”, “biz onların işinə qarışmırıq”, “Qarabağ ordusu” kimi nağıllarına da son qoydu. Əgər İrəvan “Dağlıq Qarabağı müstəqil” sayırdısa, başqa “dövlət”in “müdafiə naziri”ni bölgə içərisindəki şəhərin müdafiəsini düzgün təşkil edilmədiyinə görə Ermənistanda niyə həbs ediblər?
Ana Vətən Partiyası sədrinin müavini Arzuman Abdulkərimov “ Bakı-Xəbər”ə açıqlamasında bildirdi ki, Ermənistan uzun illərdir işğalda əlinin olmasını və törədilən vəhşiliyin müəllifi olduğunu danır: “Avropa Məhkəməsinin çıxardığı bir sıra qərarlarla bağlı Ermənistan proseslərə aidiyyətinin olmadığını əsaslandırmağa çalışır. Deyirlər ki, həmin proseslərə “ Qarabağ özünümüdafiə ordusu” rəhbərlik edib. Təkzibedilməz faktlarla sübut olunur ki, hər iki müharibəni Azərbaycana qarşı Ermənistan dövləti aparıb. Bu məsələdə Qarabağdakı ermənilər bir alət olaraq istifadə olunub. Hətta Qarabağda proseslərə rəhbərlik edən şəxslər sonra Ermənistanda prezident seçilib. Həm Sarkisyan, həm də Köçəryan məhz müharibədə etdikləri vəhşiliklərə görə həmin postlara seçilə biliblər. Bütün bunlar Ermənistanın birbaşa işğalda iştirak etdiyini sübutlayır. Sonuncu fakt bunu bir daha təsdiqlədi. Qarabağda döyüşlərə rəhbərlik edən şəxsi tutublar ki, döyüşü düzgün təşkil etməyib. Sual ortaya çıxır: Şuşa bəyəm onların şəhəri olub ki, onu bizim geri almağımıza görə kimlərisə məsuliyyətə cəlb edirlər? Həmin adamın Ermənistan rəsmi dairələri tərəfindən xain kimi həbs edilməsi İrəvanın saxtalığını bir daha ifşa edir. Görürlər ki, əhalini sakitləşdirməyin başqa yolu yoxdur. Paşinyan bununla bir güllə ilə iki dovşan vurur. Həm Ermənistandakı, həm də Qarabağdakı müharibə tərəfdarlarına bununla deyir ki, hər birini bu aqibət gözləyə bilər. Bütün bu faktlar əsas verir ki, biz Ermənistanı cavabdeh kimi göstərək. Ərazimizdə törədilən bütün qətliam və dağıntılara görə beynəlxalq hüquqi məsuliyyət onun üzərinə yüklənsin. Bizim buna görə kompensasiya tələb edəcəyimiz ölkə məhz Ermənistan olacaq. Bunu öz rəsmi açıqlamaları ilə təsdiq edirlərsə, əlavə sübuta ehtiyac qalmır. Biz bunu bilirik, amma özlərinin rəsmi etirafı bizim üçün olduqca faydalı dəlildir”.
Məhəmmədəli QƏRİBLİ
