Erməni əsilli rusiyalı iş adamı Ruben Vardanyan Rusiyadan qaçmaq niyyətindədir. Bu barədə Vardanyan özü açıqlama verib. O, Rusiya vətəndaşlığından imtina etmək niyyətində olduğunu bildirib. Təbii ki, Vardanyan bu addımı qaçmaq kimi yox, guya Qarabağdakı ermənilərin ağır vəziyyəti səbəbindən atdığını deyib:
“Qarabağa köçmək qərarına gəldim. Bu gün Qarabağ erməniləri ağır psixoloji böhran yaşayır, sabaha inamları yoxdur. Onlar özlərini tərk edilmiş və unudulmuş hiss edirlər. Düşünürəm ki, 2020-ci il müharibəsindən sonra biz bütün dünya erməniləri onların yanında olmağa borcluyuq. Biz onlara təkcə simvolik olaraq deyil, həm də əməli işlərdə kömək etməliyik”.
Qeyd edək ki, Qərbin sanksiyaları səbəbindən bir çox iş adamı Rusiyadan gedir. Ruben Vardanyan da Qərbin sanksiyalarına məruz qalmış rusiyalı biznesmenlərdən biridir.
3 il öncə Vardanyanın rəhbərliyi ilə Ermənistan və erməni əsilli Rusiya vətəndaşlarının yaratdığı çirkli pulların yuyulması - “Troyka” sxemi üzrə Rusiyadan 9 milyard dollarlıq vəsaitin çıxarılması haqqında araşdırma ilə ifşa hesabatı dərc olunub.
Erməni əsilli milyarderin bu niyyətinin arxasında hansı maraqlar dura bilər və Azərbaycan bu qanunsuzluğun qarşısını almaq üçün nə etməlidir?
Politoloq Yeganə Hacıyeva “Bakı-Xəbər”ə bildirdi ki, Ruben Vardanyan və onun kriminal fəaliyyəti haqqında Azərbaycan mediasında 2016-ci ildə silsilə yazılarla çıxış edib:
“2019 cu il martın 4 isə OCCRP- Korrupsiyaya və Mütəşəkkil Cinayətkarlığa qarşı Jurnalistika Layihəsi Rusiyada Ermənistanın və erməni əsilli Rusiya vətəndaşlarının yaratdıqları çirkli pulların yuyulması sxemi üzrə ölkənin hakim elitası ilə sıx əlaqəli böyük investisiya bankı vasitəsi ilə ölkədən 9 milyard dollarlıq vəsaitin çıxarılması haqqında hesabat dərc etdi.
Hesabatda “Troyka” pulyuyan maşını adlandırılan bu sxem korrupsiyalı siyasətçilərə və mütəşəkkil cinayətkarlıq fiqurlarına çirkli vəsaitlərin yuyulması, vergilərdən boyun qaçırılması, mülkiyyətin xaricdə gizlədilməsi kimi fəaliyyət imkan yaratması haqqında məlumatlar dərc olunub. “Troyka” sxemi üzərə mənfəət götürən Rusiyanın “Troyka Dialog” kimi tanınan özəl investisiya bankı və onun rəhbəri, Rusiyada qərbyönlü reputasiyaya malik erməni Ruben Vardanyan idi. Vardanyanın həmçinin Qarabağda çirkli daşınmalar, narko və silah trafiki, Qarabağın təbii resurslarının talanmasında, Qarabağın qeyri-qanunu məskunlaşdırılmasında aktiv iştirak edib. Qarabağda talanlarda və qanunsuz məskunlaşmada onun iş ortağı əslən Livandan olan Kanada, ABŞ və Ermənistan vətəndaşı milyarder Nubar Afoyan olub.
Qarabağa Yaxın Şərqdən, Suriya və Livandan erməni ailələrinin köçürülməsinə də bu cütlük patronajlıq edib. Vardanyan Qarabağda “ekoloji kəndlərin salınması” adı altında məxfi və şübhəli layihələr həyata keçirirdi. Azərbaycanın işğal olunmuş Dağlıq Qarabağ bölgəsində erməni əhalinin yerləşdirilməsi üçün kəndlər salınmasını maliyyələşdirir, bu kəndlərdə məktəb və kilsə tikdirir. Rusiya vətəndaşı olan oğlu David Vardanyan “Dağlıq Qarabağ”da əsgərlik xidməti çəkib.
Ruben Vardanyan Rusiyadan oğurladığı vəsaitlərlə dünyanın bir çox yerlərində erməni yalanlarının yayılmasını maliyyələşdirib. Daha çox erməni milləti və onun gələcəyi üçün xidmət göstərir, humanitar fondlar adı altında formalaşdırdığı təsisatlar Qarabağda, Livan və Suriyada erməni kəndlərinin salınması, kilsələrinin və məktəblərinin tikilməsi, Maltada yerli tarixi abidələrin restavrasiya layihələrini maliyyələşdirib.
Burda onu da əlavə edim ki, istər işğal altında olan Azərbaycan torpaqlarında kəndlərin salınmasında, istərsə də diğər yerlərdə Maltada və s. tarixi abidələrin restavrasiyası layihələrində yerli xalqların tarixi izlərinin itirilməsi isə bu fəaliyyətin tərkib hissəsi olub.
Livanda Beyrut Limanının partlamasından sonra isə Livan ermənilərinin Qarabağa köçürülməsinin maliyyə qaynağı Vardanyan və onun biznes şəriki, Livan əsilli kanadalı milyarder Nubar Afoyan idi.
Hər ikisi həmtəsisçisi olduqları “Avrora Humanitar Təşəbbüsü” qrupunun nümayəndəsi kimi beynəlxalq humanitar, donor təşkilatlara müraciət edərək, Livan xalqına dəstək təşəbbüsü adı altında Livan ermənilərinin köçürülməsinin maliyyə qaynaqlarının toplanmasında iştirak edirlər.
“Avrora Humanitar Təşəbbüsü” humanitar təşkilat kimi təqdim olunsa da, daha çox erməni yalanları və qondarma “genosidin” tanınması və Türkiyəyə qarşı sanksiyaların tətbiq olunması kimi mövzuların təbliğatçısı olan bir təşkilatdır.
Vardanyan, həmçinin, uzun illər çirkli pulları vastəsi ilə Azərbaycana qarşı beynəlxalq təşkilatlarda fəaliyyətin maliyyələnməsində iştirak edib, Azərbaycanla bağlı siyasi məhbuslar mövzusunda yalanların təşkilini maliyyələşdirib.
Belə bir kriminal ünsürün Errmənistanda hökümətin də elan etdiyi sülh sazişinə hazırlıq ərəfəsi Qarabağa köçməsini elan etməsi, əlbəttə, təsadüfi deyil. Ancaq kriminal ünsürün hüquqi təqibi üçün kifayət qədər əsaslar var. Azərbaycan Qarabağ və ətraf rayonların mülki infrastrukturlarının, təbii və ekoloji resurslarının talanmasında, Qarabağdan çirkli daşlnmalarda iştirak edən bu şəxslərə qarşı hüqiqi təqib başlamalıdır”.
Məhəmmədəli QƏRİBLİ
