Sentyabrın 1-də Romada Azərbaycan Respublikasının İtaliya Respublikasındakı səfirliyinin yeni binasının açılışı olub.
Prezident İlham Əliyev açılışda iştirak edib və səfirliyin həyətində ağac əkib, sonra binanın rəmzi açılışını bildirən lenti kəsib.
Qeyd edək ki, Azərbaycan Prezidenti İlham Əliyev 2020-ci ilin fevralında İtaliyaya dövlət səfəri zamanı birinci xanım Mehriban Əliyeva ilə Roma şəhərində səfirliyimiz və onun tabeliyində Azərbaycan Mədəniyyət Mərkəzi üçün nəzərdə tutulan bina ilə tanış olub, binanın əsaslı təmiri ilə bağlı tapşırıq və tövsiyələrini veriblər.
Binanın 1-ci və 2-ci mərtəbələri Azərbaycan Mədəniyyət Mərkəzi, 3-5-ci mərtəbələri isə səfirlik üçün nəzərdə tutulub.
Azərbaycan Mədəniyyət Mərkəzində Heydər Əliyev Fondu tərəfindən italyan dilində nəşr olunmuş Azərbaycanın mədəniyyəti, incəsənəti, sənətkarlığı, qayaüstü rəsmlər, miniatür sənəti, milli musiqimiz, zərgərlik məmulatları, xalçalar ilə bağlı kitablar nümayiş etdirilir. Mərkəzdə, həmçinin Azərbaycanın tarixi, mədəniyyəti, ədəbiyyatı, xarici siyasəti ilə bağlı son illər İtaliyada nəşr edilmiş kitablar da təqdim olunur.
Prezident İlham Əliyev mərkəzin açılışı münasibətilə təşkil edilən “Mənim Azərbaycanım” adlı rəsm sərgisi ilə də tanış olub. Sərgidə realizmdən tutmuş modernizm və postmodernizmədək Azərbaycanın təsviri sənətinin nadir nümunələri nümayiş etdirilir.
Səfirliyin binasının həyətində “Xarı bülbül” beynəlxalq incəsənət festivalının qaliblərinin müəllifi olduqları “Xarı bülbül” maketləri nümayiş olunur.
Eyni gündə Romada İtaliya-Azərbaycan Universiteti üzrə əməkdaşlıq çərçivəsinin müəyyən edilməsi, fakültə və proqramların yaradılması ilə bağlı ADA Universiteti ilə İtaliyanın beş aparıcı ali təhsil müəssisəsi - Luiss Guido Carli Universiteti, Romanın Sapienza Universiteti, Turin Politexnik Universiteti, Alma Mater Bolonya Universiteti və Milan Politexnik Universiteti arasında akademik əməkdaşlığa dair imzalanmış sazişlərin mübadiləsi mərasimi də keçirilib.
Prezident İlham Əliyev tədbirdə iştirak edib.
Əvvəlcə iki ölkə universitetləri arasında sazişlərin mübadiləsi olub. Ardınca dövlət başçısı çıxış edərək deyib ki, bu gün İtaliya-Azərbaycan əlaqələrinin yeni səhifəsi açılır .
İtaliya ilə Azərbaycan arasında strateji tərəfdaşlığa dair iki sənəd imzalandığını deyən dövlət başçısı bildirib ki, İtaliya Azərbaycanın birinci ticarət tərəfdaşıdır.
“Bugünkü mərasim isə onu göstərir ki, biz gələcəkdə təhsil sahəsində də strateji tərəfdaş kimi fəaliyyət göstərəcəyik. Heç kimə sirr deyil ki, hər bir ölkənin inkişafını təbii resurslar yox, bilik, savad, texnoloji tərəqqi müəyyən edir. Biz Azərbaycanda təbii resurslardan əldə edilmiş gəliri insan kapitalına yönəldirik və bugünkü tədbir bunun əyani sübutudur. Eyni zamanda, əminəm ki, İtaliya-Azərbaycan Universiteti İtaliya-Azərbaycan dostluğu mərkəzi olacaq” – o deyib.
Sonra İtaliya Respublikası Ekoloji Keçid Nazirliyinin dövlət katibi xanım Vannia Qava, Luiss Guido Carli Universitetinin vitse-prezidenti professor Paola Severino, ADA Universitetinin rektoru professor Hafiz Paşayev çıxış edərək ürək sözlərini səsləndiriblər.
Sonda xatirə şəkli çəkdirilib.
Azərbaycan Prezidenti İlham Əliyevin sentyabrın 1-də İtaliya Respublikasının Prezidenti Sercio Mattarella ilə görüşü olub.
İtaliya Prezidenti Sercio Mattarella dövlət başçısı İlham Əliyevi qarşılayıb.
Prezident İlham Əliyev dəvətə və qonaqpərvərliyə görə İtaliya Prezidentinə minnətdarlığını bildirib.
“Biz keçən dəfə Sizinlə burada görüşəndə strateji tərəfdaşlığa dair mühüm sənəd imzalamışıq. Eyni zamanda, Azərbaycan-İtaliya Universitetinin yaradılması haqqında söhbət etmişik. Bu gün isə İtaliya-Azərbaycan Universitetinin yaradılması istiqamətində önəmli addım atıldı” – o deyib.
Həmin gün Prezident İlham Əliyevin İtaliya Respublikasının Nazirlər Şurasının sədri Mario Draqi ilə də görüşü olub.
Baki-xeber.com
