Ukrayna rəsmisindən Azərbaycanla bağlı gözlənilməz xoşagəlməz mövqe. Ukrayna Milli Təhlükəsizlik və Müdafiə Şurasının katibi Oleksiy Danilov iştirak etdiyi “1+1” telekanlının marafonunda Azərbaycana qarşı qərəzli mövqe ilə çıxış edib.
Danilov həmin verilişdə digər məsələlərlə yanaşı, çox həssas mövzunu - Avropa ölkələrinin enerji böhranı kontekstində Ukraynaya dəstəyi azaldıb-azaltmayacağı məsələsini şərh edib. O, bildirib ki, Ukrayna Rusiya ilə müharibədə çox yüksək məbləğdə qiymətlər ödəyir və onlar müttəfiqlərinin dəstəyinə ümid edir: “Mən dəqiq bilirəm ki, Böyük Britaniya bunu etməyəcək, onlar və ABŞ xəyanət etməyəcək. Lakin ruslar bunu edə bilər: çünki onlar ermənilərə də belə xəyanət etdilər. Beləliklə də, Azərbaycan özünün hesab etdiyi ərazilərə daxil oldu. Görürsünüz, bu gün ruslar Suriyaya da xəyanət edib və orada müəyyən proseslər gedir. Mən həqiqətən istəmirəm Avropa bunu bizə etsin. Amma düşünmürəm ki, dünya bunu təkcə izləməklə qalacaq”.
Danilovun “Azərbaycan özünün hesab etdiyi ərazilərə daxil oldu” ifadəsi sosial şəbəkələrin Azərbaycan seqmentində birmənalı qarşılanmayıb. Buna sərt etiraz edilib. Bütün hallarda Ukrayna Azərbaycanın ərazi bütövlüyünü dəstəklədiyi halda bu cür riyakar açıqlama nə deməkdir? Necə yəni “Azərbaycan özünün hesab etdiyi ərazilərə daxil oldu”?
“Azərbaycan özünün hesab etdiyi yox, beynəlxalq hüquqda tanınan ərazilərini işğaldan azad edib”
Məsələyə münasibət bildirən politoloq Tural İsmayılovun fikrincə, Ukrayna siyasi hakimiyyətində müəyyən qeyri-peşəkar insanlar təmsil olunur: “Hesab edirəm ki, Qərbin Ukraynada həyata keçirdiyi rəngli inqilab ssenarisi bu xalqa böyük zərbə vurub. Bunlardan biri də Ukrayna siyasi hakimiyyətinə diplomatiyadan, siyasətdən anlayışı olmayan qeyri-peşəkarların gəlməsidir. Dəfələrlə Ukrayna rəsmiləri nəinki Azərbaycanla bağlı, o cümlədən Türkiyə ilə bağlı belə yanlış açıqlamalar veriblər. Proseslərin fərqinə varmadan qeyri-peşəkar açıqlamalarla çıxış ediblər. O baxımdan hesab edirəm ki, Danilov və onun timsalındakı bəzi rəsmilər regionda Azərbaycan kimi dövlətin həqiqi dəyərini başa düşə bilmirlər. Ümumiyyətlə, Ukrayna siyasi hakimiyyətində ikitirəlik mövcuddur. Nəzərə almaq lazımdır ki, Ukrayna prezidenti Zelenski Azərbaycanın ərazi bütövlüyünü dəstəkləyib. O cümlədən, Azərbaycan dəfələrlə Ukraynaya humanitar yardım göstərib. Bütün bunlardan sonra hansısa Ukrayna rəsmisinin belə riyakar açıqlaması qəbuledilməzdir. Bununla belə, rəsmi Kiyev bununla bağlı Azərbaycana izahat verməlidir. Bununla bağlı Danilova xəbərdarlıq olunmalıdır. Azərbaycan özünün hesab etdiyi yox, beynəlxalq hüquqda tanınan ərazilərini işğaldan azad edib. O baxımdan ukrayna rəsmiləri açıqlamalarına diqqət etməlidilər”.
Bir sözlə, politoloq hesab edir ki, bu cür məsuliyyətsiz açıqlamalarla çıxış edən Ukrayna rəsmiləri cəzalandırılmalıdır.
Vidadi ORDAHALLI
