Brüssel görüşündə, Ermənistanın müqavimətinə baxmayaraq, Azərbaycan Prezidenti, Müzəffər Ali Baş Komandan İlham Əliyev konkret nəticələr əldə etdi. Razılığa əsasən, yaxın günlərdə sülh müqaviləsinin mətninin hazırlanmasına başlanacaq.
Bu isə o deməkdir ki, Ermənistan sülhə məcbur edilir və münasibətlərin normallaşmasına böyük ümidlər yaranıb. Bu, Prezident İlham Əliyevin danışıqlarda qazandığı növbəti diplomatik uğurdur. Ermənistan xeyli vaxtdır qeyri konstruktivlik nümayiş etdirsə də, Azərbaycan Prezidenti barışmaz və qətiyyətli mövqeyi ilə danışıqlarda uğurla addımlayır.
Danışıqlar zamanı Qarabağ, status və ya ATƏT-in Minsk Qrupu ilə bağlı heç bir ifadə işlədilməyib və bu bir daha onu göstərir ki, masada şərtləri Azərbaycan diqtə edir. Azərbaycan Prezidenti İlham Əliyev bu konteksdə konkret mövqeyini bildirib: Qarabağda yaşayan ermənilərin statusundan söhbət gedə bilməz, Minsk qrupu adlı qurum artıq tarixdə qalıb.
Aİ rəhbərinin üzərinə böyük missiya götürməsi, Ermənistanla Azərbaycan arasında münasibətlərin normalllaşmasına çalışması ölkəmiz tərəfindən yüksək qiymətləndirilir. Görüşün yekun bəyanatında Minsk qrupu, Dağlıq Qarabağ, statusla bağlı ifadələrin işlədilməməsi onu deməyə əsas verirmi ki, iki ölkə arasında normallaşma üçün məhz Avropa Birliyi vasitəçiliyi həlledici format xarakteri alır?
Müstəqil siyasətçi Bünyamin Qəmbərli “Bakı-Xəbər”ə açıqlamasında bildirdi ki, Avropa Komissiyasının prezidenti Şarl Mişelin vasitəçiliyi ilə keçirilən görüş ümumi nəticənin əldə olunması baxımından olduqca faydalıdır: “Çünki Qarabağ məsələsilə bağlı Azərbaycanla Ermənistan arasında danışıqların aparılması prosesi Rusiyanın monopoliyasından çıxarılıb. Bizim bir atalar sözü var. Deyir ki, yarı gör, özün danış, ev yıxar ara sözü. Hər zaman bu fikirdə olmuşam ki, Azərbaycan və Ermənistan prezidentlərinin birbaşa təması məsələlərin həllində daha ciddi təsirə malik ola bilər. Mişelin vasitəçiliyilə keçirilən görüşlər Azərbaycanın Avropa üçün rolunun artması zamanına təsadüf edir. Bilirsiniz ki, hazırda Azərbaycan Avropanın enerji təminatına ciddi töhfə verir. Biz görürük ki, Avropanın indiki enerji böhranı şəraitində Azərbaycanın maraqları daha çox təmin edilir. Avropanın vasitəçiliyilə keçirilən 4-cü görüşdü. Artıq Avropa Birliyi, hətta Ermənistan da status məsələsinin olmayacağı ilə barışıb. Bizim özümüz də bu terminləri qabartmamalıyıq. Status məsələsi Prezident dediyi kimi gorbagor olub. Ermənistan bunu dərk etdiyi üçün Qarabağın statusundan deyil, ordakı əhalinin hüquqlarından danışmağa başlayıb. Biz də başqa ölkələrdə olan soydaşlarımızın hüququndan danışırıq. Burada qəbahət sayıla biləcək heç nə yoxdur. Minsk qrupuna gəldikdə, Avropa Birliyinin özü də bu təsisatın bir işə yaramadığını dərk edir ki, vasitəçiliyi öz üzərinə götürüb. Minsk qrupunu qəbul etsəydilər onların bu vasitəçiliyinə ehtiyac olmazdı. Mən düşünmürəm ki, ABŞ və ya Fransa da Minsk qrupunu yenidən dirçəltmək istəyir. Sadəcə, Azərbaycan hakimiyyətinin hansısa addımları onlarda qıcıq yaratdığı üçün bu kartdan təzyiq vaitəsi kimi istifadə edirlər. Brüssel görüşünün ümumi nəticəsini müsbət dəyərləndirə bilərik”.
Məhəmmədəli QƏRİBLİ
