Məlum olduğu kimi, avqustun 31-də Belçikanın və Avropanın paytaxtı Brüsseldə Azərbaycan Prezidenti İlham Əliyev və Ermənistanın baş naziri Nikol Paşinyan arasında Avropa İttifaqı Şurasının Prezidenti Şarl Mişelin vasitəçiliyi ilə növbəti, sayca 4-cü görüş olub.
Ş.Mişel bildirib ki əhalini uzunmüddətli davamlı sülhə hazırlamaq vacibdir: "Aİ uzunmüddətli davamlı sülhə doğru dəstəyini daha da gücləndirməyə hazırdır. Aİ həm də hər iki ölkənin və onların əhalisinin rifahı naminə iqtisadi inkişafın irəliləyişinə təkan verməyə davam edəcək".
Maraqlıdır, Ermənistan hakimiyyəti öz xalqını sülhə hazırlamaq üçün lazımi işlər görürmü? Doğrudanmı onların məqsədi xalqı sülhə hazırlamaqdır? Ümumiyyətlə, bu məsələ nə yerdədir?
Aydın Mirzəzadə: “Xalqları sülhə hazırlamaq Ermənistan üçün olduqca vacibdir, ancaq bu proses...”
Millət vəkili Aydın Mirzəzadə “Bakı-Xəbər”ə açıqlamasına qeyd etdi ki, Brüssel görüşü Azərbaycan diplomotiyasının, Prezident İlham Əliyevin xarici siyasət kursunun növbəti qələbəsidir: “Ermənistan yeni reallığı qəbul etmək məcburiyyətindədir. Ermənistanın özünə qalsa, hələ də Dağlıq Qarabağı öz ərazisi hesab edir və Qarabağdan əl çəkmək istəmir. Bu problem artıq birdəfəlik həll edilib və Ermənistan Azərbaycanın ərazi bütövlüyünü qəbul etmək məcburiyyətindədir”.
Millət vəkilinin sözlərinə görə, sülh mətninin hazırlanması ilə bağlı Xarici İşlər Nazirliyinə tapşırığın verilməsi bu problemin birdəfəlik həll olunmasında yeni bir səhfə açıldığını göstərir: “Avropa İttifaqı Şurasının Prezidenti Şarl Mişel tərəfləri uzunmüddətli sülhə çağırıb. Azərbaycan sülhə hazır olduğunu hər zaman nümayiş etdirib. Sərhədlərin tanınması Ermənistan iqtisadiyyatının bərpa edilməsinə, Azərbaycan və Türkiyə ilə yaxşı münasibətlər qurmasına səbəb ola bilər. Ermənistanın buna nə dərədə hazır olduğunu gələcək göstərəcək. Ermənistan tərəfinin razılaşdığı ilkin kövrək anlaşmalardan imtina etməsi bizim üçün yenilik deyil”. A.Mirzəzadə hesab edir ki, xalqları sülhə hazırlamaq Ermənistan üçün olduqca vacibdir. Ancaq bu proses həmin ölkədə böyük çətinliklərlə üzləşir. Tək müxalifət deyil, elə iqtidar tərəfin özü də Azərbaycanla münasibətlərdə beynəlxalq normalara riayət etir. Onların nə istəməyindən asılı olmayaraq, Azərbaycan öz suverenliyini qoruyacaq. Ermənistan Azərbaycanın ərazi bütövlüyünü tanımağa məcbur olacaq.
Azər Həsrət: “Ermənistan hakimiyyətinin başında olan şəxs öz xalqını tam olaraq sülhə hazırlaya bilmir”
Siyasi şərhçi Azər Həsrət bildirdi ki, Ermənistan hakimiyyətinin bu iradəsini tam olaraq müşahidə etmək mümkün deyil: “Bəlkə də Nikol Paşinyan bu prosesin baş tutmasının tərəfdarıdır. Onun davranışları xəbər verir ki, həqiqətən də Azərbaycan Türkiyə ilə normal münasibətlər müstəvisinə keçməyə can atır. Ancaq onun ipinin ucu başqasının əlində olduğu üçün bu proses ləngiyir. Danılmaz faktdır ki, Ermənistan Rusiyadan asılıdır. Ermənistanın baş naziri nə qədər müstəqil siyasət yürütməyə çalışsa da, Rusiya öz təsir imkanlarını saxlayır. Yəni Rusiya burada əvvəlki kimi pozuculuq fəaliyyətini davam etdirir. Bu səbəbdən də Ermənistan hakimiyyətinin başında olan şəxs öz xalqını tam olaraq sülhə hazırlaya bilmir. Əslində Ermənistan xalqı da bu durumdan çox yorulub. Onlar sülh istəyir, ancaq Rusiya faktoru buna imkan vermir. Ona görə də Brüsseldə məlum görüş keçirilən zaman irəliləyişə ümidlər yarandı ki, ancaq Rusiya prosesə dərhal müdaxilə edir”.
Akif Nağı: “Ermənistan cəmiyyətində hələ də revanşist hisslər üstünlük təşkil edir”
Azad Vətən Partiyasının sədri Akif Nağı bizimlə söhbətində bildirdi ki, Ermənistan hakimiyyəti artıq başa düşür ki, reallıqla hesablaşmaq lazımdır: “Azərbaycanın kifayət qədər güclü olduğunu və beynəlxalq səviyyədə dəstəkləndiyini görürlər. Ermənistan cəmiyyətində hələ də revanşist hisslər üstünlük təşkil edir. Müxtəlif siyasi qüvvələr əhalinin əhval-ruhiyyəsindən istifadə edərək aksiyalar keçirməyə çalışır. Bu səbəbdən də Brussel görüşündə “xalqların sülhə” hazırlanması əbəs yerə deyilmədi. Brüssel bu istiqamətdə addımların atılmasının tərəfdarıdır”.
Günel CƏLİLOVA
