Rusiya Xarici İşlər Nazirliyi Azərbaycan-Ermənistan sərhədinin delimitasiyası üzrə ikitərəfli komissiyanın iclası ilə bağlı məlmat yayıb.
Məlumatda qeyd edilir ki, Moskvada Rusiyanın məşvərətçi yardımı ilə Azərbaycan-Ermənistan sərhədinin delimitasiyası və onun sonradan demarkasiyası üzrə ikitərəfli komissiyanın iclası keçirilib. Bildirilib ki, görüşdə Azərbaycan baş nazirinin müavini Şahin Mustafayev, Ermənistan baş nazirinin müavini Mqer Qriqoryan və Rusiya baş nazirinin müavini Aleksey Overçuk iştirak edib: “Görüşdən əvvəl Azərbaycanla Ermənistan arasında dövlət sərhədinin delimitasiyası üzrə dövlət komissiyası və Ermənistanla Azərbaycan arasında dövlət sərhədinin delimitasiyası və sərhəd təhlükəsizliyi üzrə Komissiya yaradılıb. Eləcə də, bu il mayın 24-də iki ölkənin sərhədində Azərbaycan və Ermənistan nümayəndə heyətlərinin ilk görüşü keçirilib. Rusiya nümayəndə heyəti Azərbaycan və Ermənistan nümayəndə heyətləri arasında iki ölkə arasında dövlət sərhədinin delimitasiyası, sərhəd zonasında sabitlik və təhlükəsizliyin səviyyəsinin artırılması ilə bağlı aparılan danışıqlarda bundan sonra da məsləhət və texniki yardım göstərməyə hazır olduğunu bildirib. Yeni görüşün tarixləri diplomatik kanallar vasitəsilə əlavə olaraq razılaşdırılacaq”.
O da məlumdur ki, may ayında keçirilən ilk görüşdən sonra növbəti görüşün keçirilməsi yubanırdı. Prosesin uzanması bir ara belə gümanlara səbəb oldu ki, növbəti görüşdə ciddi məsələlər razılaşdırılacaq. Ancaq Rusiya XİN-in açıqlamasının məzmunundan belə təəssürat yaranır ki, ortada elə də ciddi razılaşma yoxdur.
Maraqlıdır, bəs ekspertlər bunu necə dəyərləndirir? Üç aylıq fasilədən sonra bu cür nəticəni məqbul hesab etmək olarmı?
“Yaxın perspektivdə olmasa da, bir müddət sonra məsələ yoluna düşəcək”
Məsələyə münasibət bildirən Aydınlar Partiyasının sədr müavini Qorxmaz İbrahimli hesab edir ki, Rusiyanın vasitəçiliyi ilə keçirilən görüşdən bundan artığını gözləməyə dəyməz: “O işin içində Moskva varsa, o zaman istənilən proses uzanacaq. Bugünə qədər olan təcrübə bunu bir neçə dəfə sübut edib. Bu da ondan irəli gəlir ki, Rusiya problemin birdəfəlik həllində maraqlı deyil. Rusiya bu minvalla hər iki ölkəni öz təsir dairəsində saxlamağa çalışır. Ona görə də Moskvanın siyasi maraqlarına cavab verdiyinə görə, delimitasiya prosesinin tez bir zamanda nəticə verməsi çətin məsələdir. Ancaq bütün çətinliklərə rəğmən, sərhədlərin delimitasiyası ilə bağlı danışıqlar davam etdirilməlidir. Fikrimcə, yaxın perspektivdə olmasa da, bir müddət sonra məsələ yoluna düşəcək. Çünki Ermənistan Rusiyadan uzaqlaşdıqca, Azərbaycan bir o qədər Türkiyə ilə yaxınlaşacaq. Bu isə məsələnin həllini tezləşdirə bilər”.
Vidadi ORDAHALLI
