Qarabağ separatçılarının "Müdafiə Ordusunun" keçmiş komandanı, general-leytenant Mikayel Arzumanyan həbs edilib. Ermənistan İstintaq Komitəsinin yaydığı məlumata görə, o, “Şuşa şəhəri və ona bitişik ərazilərin müdafiəsində səhlənkarlıq” işi ilə bağlı saxlanılıb.
İşin materiallarına görə, general-leytenant (İstintaq Komitəsinin hesabatında onun adı M.A. kimi göstərilib) oktyabrın 30-dan noyabrın 9-dək Şuşa və ona bitişik ərazilərin müdafiəsi üzrə üzərinə düşən vəzifələri lazımınca yerinə yetirməyib. O, qüvvələrin döyüş imkanlarından səmərəli istifadəni, qoşunların qarşılıqlı fəaliyyətini təmin etməyib. Bundan başqa, general tapşırıqların yerinə yetirilməsinə nəzarət etməyib, vəziyyətin dəyişməsinə operativ və çevik reaksiya verməyib. Xüsusilə, o, cəbhənin mühafizə olunmayan sektorunda qoşunların yerləşdirilməsinə əmr verməyib, qonşu bölmələr arasında məlumat ötürülməsinə nəzarət etməyib. 31 oktyabr 2020-ci il tarixdə cəbhənin bir hissəsində, eləcə də Şuşa-Turşsu avtomobil yolunun bir hissəsində lazımi müdafiəni təmin etməyib. Halbuki, 27-28 oktyabr tarixindən 95 nəfərdən ibarət xüsusi atıcı tağım, habelə o dövrdə həlledici döyüş tapşırıqlarına qatılmayan 365 hərbçidən ibarət iki batalyon onun sərəncamında olub. Noyabrın 5-də isə o, bir atıcı batalyonu Şuşa ilə Daşaltı kəndinin kəsişməsinə, “İsa bulağı” ərazisinə göndərib. Lakin buna qədər Azərbaycan birləşmələri artıq Daşaltı kəndini, bir sıra mövqeləri - "İsa bulağı" da daxil olmaqla Şuşa-Turşsu yolunun ərazisini nəzarətə götürmüşdü. Bu şəraitdə göndərilən batalyon sabit müdafiə təşkil etməyə vaxt tapmadı, mühasirəyə düşmə təhlükəsi ilə üzləşdi və itki verərək müdafiə mövqeləri qurmaq əvəzinə sağ qalmaq üçün təcili özünümüdafiəyə keçib. Eyni zamanda, bu batalyon noyabrın 1-dən döyüş əməliyyatlarında iştirak etməyə hazır imiş. Məlumatda o da vurğulanır ki, Şuşanın müdafiəsi zamanı daim dəyişən döyüş şəraitində komandirlərin öz qoşunlarının yerləşdiyi yerləri araşdırmağa və onlar arasında əlaqə yaratmağa vaxtları olmurmuş. Buna görə də Azərbaycan hərbçiləri bölmələrdən yan keçərək şəhəri mühasirəyə ala bilib. Eyni zamanda, bölmələrdən birinin komandiri noyabrın 2-si günortadan sonra Arzumanyana məlumat verib ki, Azərbaycan ordusu sağ istiqamətdə, mühafizə olunmayan ərazidə erməni mövqelərindən yan keçib. Bundan sonra noyabrın 4-də gecə saat 2 radələrində Azərbaycan Silahlı Qüvvələrinin bölmələri “İsa bulağı” yaxınlığındakı yüksəklikdə möhkəmləniblər. Daha sonra hərbçilər Şuşa-Daşaltı kəsişməsində yerləşən bölmələrdən də yan keçiblər, 5 noyabrda isə Şuşa-Xankəndi avtomobil yolunun yanacaqdoldurma məntəqəsinin kəsişməsindən Şuşaya yaxınlaşıblar. Noyabrın 7-də şəhər tamamilə nəzarətə götürülüb. Arzumanyan Ermənistan Cinayət Məcəlləsinin 375-ci maddəsinin 3-cü bəndi (hərbi xidməti vəzifələrini yerinə yetirərkən səhlənkarlıq) ilə ittiham olunub. İstintaq Komitəsinin məlumatında qeyd edilir ki, general-leytenant Arzumanyan barəsində həbs qətimkan tədbiri seçilməsinə ehtiyac olduğu üçün saxlanılıb. Xatırladaq ki, Arzumanyan keçmiş qondarma nazir Cəlal Arutyunyanın müharibə zamanı şəxsi avtomobilində partladılaraq vurulmasından sonra Qarabağdakı separatçı ordunun komandanı təyin edilmişdi.
Belə qənaətə gəlmək olarmı ki, Paşinyam bu adla müharibə tərəfdarı olan şəxsləri sıradan çıxarır?
Hərbi-siyasi ekspert, istefada olan polkovnik-leytenant Daşdəmir Əliyev “ Bakı-Xəbər”ə açıqlamasında bildirdi ki, ötən il Xankəndidəki separatçı-terrorçu rejimin qondarma “müdafiə naziri”, general-mayor Mikael Arzumanyan istefa ərizəsini qondarma “rəhbəri” Araik Arutyunayana təqdim edən gündən aradan çıxmağın, nəinki Qarabağdan, həmçinin Ermənistandan qaçıb uzaqlaşmağın yollarını axtarırdı: “Bunu Araik Arutyunayan da anlamışdı ki, onu özünün baş müşaviri təyin etdi.
1973-cü ildə Xankəndidə doğulan Arzumanyan gəncliyindən, Xankəndidə 1988-ci illərdə baş verən münaqişələrdə separatçı fəaliyyət göstərib. 1991-1995-ci illərdə rota komandirinin müavini, batalyon komandiri, alay komandiri olub. 1995-1999-cu illərdə ayrıca kəşfiyyat batalyonuna komandirlik edib. Füzuli, Ağdərə, Əsgəran, Kəlbəcər rayonlarını işğal və qırğınlarında yaxından iştirak edib. Arzumanyanın məhz bu məqamda həbs edilməsi təsadüfi deyil. Bununla Paşinyan mühüm görüş ərəfəsində həm də müharibə tərəfdarlarına mesaj verdi ki, onları da Arzumanyanın taleyi gözləyə bilər. Bu, eyni zamanda, Ermənistan rəhbərliyinin Qarabağdakı separatçı silahlı qalıqlarının tam zərərsizləşdiriləcəyinə dair verilən bir mesajdır. Çünki Arzumanyanın bütün hərbi karyerası Ermənistan deyil, məhz Qarabağla bağlı olub. Bu, eyni zamanda Arayik Arutunyan və onun ətrafına göndərilən xəbərdarlıqdır ki, müharibədəki məğlubiyyətə görə onların hamısı məsuliyyət daşıyır və istənilən vaxt onları da həbs edə bilərlər. Paşinyan bu addımı ilə Brüssel görüşündəki nəticələrdən doğa biləcək etirazları kompensasiya edir. Bununla həm də Ermənistanın Qarabağda müharibə apardığını təsdiqləyirlər. Qabaq deyirdilər ki, orada “özünümüdafiə ordusu” döyüşür. Şuşadakı uğursuzluğa görə generalı Ermənistanda istintaqa cəlb edirlərsə, deməli, İrəvan müharibənin onun tərəfindən aparıldığını da boynuna almış olur”.
Məhəmmədəli QƏRİBLİ
