Ermənistanın Baş naziri Nikol Paşinyana qarşı müxtəlif iddialar irəli sürülür. Bu iddialardan biri də onun xarici xüsusi xidmət orqanları tərəfindən əməkdaşlığa cəlb edilməsi ilə bağlıdır. Bu gün nəinki Ermənistanda, Rusiyada və başqa ölkələrdə də Paşinyana agent kimi yanaşmalar sərgilənir.
Erməni siyasi xadim Artur Hambartsumyan da Paşinyanı cəsusluqda ittiham edir və bildirir ki, bununla bağlı Serj Sarkisyanın əlində sənədlər var: “Serj Sarkisyan Nikol Paşinyanla Milli Təhlükəsizlik Xidməti arasında əlaqəni təsdiq edən sənədləri dərc edə bilər”.
O qeyd edib ki, Nikol Paşinyan, Ararat Mirzoyan və digər şəxslərin xarici xidmətlər tərəfindən cəlb olunduğu barədə ictimaiyyət arasında şayiələr dolaşır. “Onların davranışı, fəaliyyəti və fəaliyyətinin nəticələri də bunu göstərir. Əminəm ki, Serj Sarkisyanın bununla bağlı deyəcəkləri və ya dərc edəcəkləri olacaq. Müstəqillik bəyannaməsində, konstitusiyada yazılıb ki, bizdə hakimiyyət xalqdır. Xalqın isə bilməyə haqqı var. Biz sabah İrəvanın Respublika meydanında toplaşacağıq. Ondan tələb edəcəyik ki, faciə fonunda komanda yoldaşlarının necə multimilyonçu olmasının necə baş verdiyinə cavab versin. O, oktyabrın 10-da atəşkəs rejimini niyə pozdu, niyə Baş Qərargahın hesabatlarının əksinə olaraq Putinin İlham Əliyevlə razılaşdığı müharibəni dayandırmaq təkliflərini rədd etdi?”, - deyə Hambartsumyan bildirib.
Qeyd edək ki, bir neçə gün əvvəl isə Rusiyanın erməni əsilli media meneceri Aram Qabrielyanov Paşinyanın ABŞ Dövlət Departamenti ilə birbaşa məxfi əlaqələrinin olduğuna dair fikirlər irəli sürüb.
“Bir müddət əvvəl öndə Köçəryan idi, indi Sarkisyanı da üzə çıxarmağa çalışırlar”
AMEA-nın Fəlsəfə və Sosiologiya İnstitutunun aparıcı elmi işçisi, fəlsəfə doktoru, BAO sədrinin müavini, siyasi şərhçi Faiq Ələkbərli “Bakı-Xəbər”ə bildirdi ki, şübhəsiz, bütün bunların hamısı Paşinyanın hakimiyyətdən getməsinə yönəlib. F.Ələkbərli hesab edir ki, Rusiyayönümlü qüvvələr, xüsusilə də fəallıq göstərmiş Robert Köçəryan da, Serj Sarkisyan da Paşinyanı hakimiyyətdən devirib yerinə gəlmək istəyir. “Son zamanlar Serj Sarkisyan da bu məsələdə daha çox fəallıq göstərir. Bir müddət əvvəl öndə Köçəryan idi, indi Sarkisyanı da üzə çıxarmağa çalışırlar. Bütün bunların arxasında da Rusiya dayanır. Əslində, Paşinyanın agent olması, xarici xüsusi xidmət orqanları ilə əlaqəsi barədə söhbətlər çox yayılır. Son vaxtlar bu məsələ daha çox qabardılır ki, Paşinyanın xarici xidmət orqanları ilə əlaqəsi var, onlarla əməkdaşlıq edir. Fikrimcə, bu söhbətin ortaya atılması Paşinyanın hakimiyyətdən getməsinə hesablanıb. Məlumdur ki, Paşinyan Qərb dövlətləri, xüsusən də ABŞ-la əməkdaşlıq etməyə can atır, yaxud da əməkdaşlıq edir. Bu Rusiyayönümlülər və ya Rusiyanın nəzarəti altında olan qüvvələr Paşinyanı agent, yaxud xaricə işləyən casus kimi qələmə verirlər. Bu məsələdə Rusiya mətbuatı da xeyli dərəcədə fəallıq göstərir. Rusiya tərəfindən Qərb dövlətləri ilə əməkdaşlıq edən Paşinyan, yaxud başqası agent kimi qələmə verilir. Ona görə də, məsələni ancaq bu yöndən qiymətləndirmək olar ki, burada əsas məqsəd Paşinyanın nüfuzuna zərbə endirməkdir, Ermənistan ictimaiyyəti arasında onu ABŞ-a, yaxud Qərbə işləyən bir agent kimi təqdim etməklə gözdən salmaq istəyirlər. Bütün hallarda Rusiya Ermənistanda yenidən öz rolunu oynamaq, daha doğrusu, itirilmiş nüfuzunu bərpa etmək istəyir. Son illər Ermənistanda Rusiyanın nüfuzu kifayət qədər aşağı düşüb. Bunu bərpa etməyin çarəsi isə Paşinyanı hakimiyyətdən göndərməkdir”.
“Bunun üçün də Rusiyaya xidmət edən Köçəryandan, Sarkisyandan və başqalarından istifadə edirlər” - deyən F.Ələkbərli qeyd etdi ki, Rusiya bu üsuldan bir çox postsovet ölkələrində istifadə edib və əsasən də nail olub. “Əsas məqsəd Ermənistan ictimaiyyətini Paşinyana qarşı qaldırmaq və ona qarşı müxalifəti gücləndirməkdir, onu devirməkdir. Məncə, Qərb də geri çəkilməyəcək, onu müdafiə edəcək. Bu məsələdə Ermənistan ictimaiyyətində Qərbpərəstlərlə Rusiyapərəstlər arasında gedən mübarizədə kimin daha çox güc toplamasından çox şey asılı olacaq. Yaxın aylarda yəqin ki, bu öz mahiyyətini ortaya qoyacaq. Serj Sarkisyanın Nikol Paşinyanla Milli Təhlükəsizlik Xidməti arasında əlaqəni təsdiq edən sənədləri dərc edə biləcəyi ilə bağlı deyilənlər də sırf Rusiyanın hesabladığı addımlardır. Bu mənada, şübhəsiz ki, Sarkisyanın əlində Paşinyanın əleyhinə sənədlərin olması məsələsinin gündəmə gətirilməsi təsadüfi deyil. Biz demirik ki, Paşinyan süddən çıxmış ağ qaşıqdır, sadəcə son zamanlar ona yönəlik casusluq ittihamının genişlənməsi bunu deməyə əsas verir”-deyə F.Ələkbərli qeyd etdi.
İradə SARIYEVA
