Laçın şəhərində, Zabux və Sus kəndlərində qanunsuz məskunlaşmış ermənilərin əksəriyyəti yaşayış məskənini tərk edib. Rusiya sülhməramlılarının nəzarətində olan Azərbaycan ərazilərində bir neçə ailə qalıb. Digərləri Ermənistanın müxtəlif regionlarına göndərilib.
Qondarma “Laçın administrasiyası” ermənilərə 20 avqusta qədər yaşadıqları əraziləri tərk etməyi tapşırıb. Bu müddət ərzində köçməyə macal tapmayanlara avqustun 25-nə qədər vaxt verilib.
Məlumata görə, ermənilərin tərk edəcəkləri bütün ərazilərdə elektrik və rabitə əlaqəsi kəsilib.
Özünü “Laçın administrasiyası”nın nümayəndəsi kimi təqdim edən Muşeq Alaverdiyan bildirib ki, Laçın şəhəri avqustun 25-də Azərbaycanın nəzarətinə veriləcək. Zabuxun “meri” Andranik Çauşyan isə Xankəndiyə köçüb.
“Hazırda Zabuxda 30 nəfər qalıb. Onlar əşyalarının daşınması ilə məşğuldurlar. Sülhməramlılar dedilər ki, avqustun 25-nə qədər vaxtımız var” - deyə Çauşyan vurğulayıb.
Laçında mağaza işlədən Aida Balikyan deyib ki, işğal zamanı Laçında məskunlaşıb: “Ermənistan hakimiyyəti bizə dedi ki, bizi Laçına təcrübə prosesi kimi köçürdürlər. Biz də hökumətə inandıq və bu yerlərə gəldik. Məlum oldu ki, onların vədi yalan imiş”.
Bu nəticəyə gəlirik ki, Laçın dəhlizi tam olaraq bizim nəzarətə keçir. Ermənilər bundan sonra bizim inşa etdiyimiz alternativ yoldan istifadə edəcək. Bu amil bizə Qarabağdakı separatçılarla mübarizədə hansı üstünlükləri vəd edir?
Politoloq Yeganə Hacıyeva “Bakı-Xəbər”ə açıqlamasında bildirdi ki, avqustun 25-dək Laçın şəhərini, Zabux və Sus kəndlərini işğal dövründə qanunsuz məskunlaşdırılmış ermənilər tərk edəcək: “Qarabağdakı qondarma qurum köçə görə hər ailəyə 100 dollar təzminat və ev almaq üçün 24 min dollarlıq arayış vəd edib. Onlara əşyalarını daşımaları üçün yük maşınları verilib və ən əsası isə, onlara məskunlaşdıqları evləri salamat qoyub tərk etmələri barədə xəbərdarlıq edilib. 2020-ci ilin noyabrında Vətən müharibəsi başa çatdıqdan sonra Laçın şəhərində 50 nəfərə yaxın erməni qalıb. Laçın rayonunun böyüklüyünə görə üçüncü yaşayış məntəqəsi – Sus kəndini isə sakinlər artıq tərk edib. 1992-ci ilin mayında ermənilər tərəfindən zəbt edilmiş Zabux kəndində isə hələ də 200 nəfər Suriyadan gətirilərək məskunlaşdırılan erməni qalıb. Qeyd edim ki, Laçının ermənilər tərəfindən süni məskunlaşdırılması beynəlxalq humanitar donarların vəsaiti hesabına həyata keçirilib. Laçın dəhlizi tam olaraq bizim nəzarətə keçir və ermənilər bizim inşa etdiyimiz alternativ yoldan istifadə edəcək. Bu bizə Qarabağdakı separatçılarla mübarizədə bir sıra üstünlükləri qazandıracaq. Bölgənin demoqrafik vəziyyətinin sabit olmasına, süni məskunlaşma məsələsinin qarşısının alınmasına səbəb olacaq.
Ən əsası, bölgədə silahli terror qrupları və terror miqrasiyasının izlənməsi üçün imkanlar əldə ediləcək. Vacib üstünlüklərdən biri də xarici jurnalist və media mənsublarının adı altında Qarabağa “xüsusi təyinatlı səfərlərin” qarşısının alınacağıdır. Qanunsuz yükdaşımaların və regionun ekoloji resurslarının talanması və s. kimi vacib məsələlərin qarşısının tam alınması və bir sıra başqa mexanizmlər də əldə ediləcək”.
Məhəmmədəli QƏRİBLİ
