Qarabağdakı separatçılar son günlər quyruğu yanmış siçan kimi o tərəfə, bu tərəfə vurnuxurlar ki, bəlkə kimsə onları növbəti dəfə xilas edə, amma görünür, daha dadlarına çatan olmayacaq. Qarabağ separatçıları da, Ermənistan mediası da yenə boylarından hündürə tullanıb ağıllarına gələni danışırlar.
“Aysor.am”ın yaydığı məlumata görə, “Arsax” “Təhlükəsizlik Şurasının katibi” Vitali Balasanyan Rusiya sülhməramlılarına müraciət edərək azərbaycanlı jurnalistlərin “Arsax” “Təhlükəsizlik Şurasının” razılığı olmadan onların məsuliyyət zonasına daxil olmasını qadağan etməyi tələb edib. Separatçıların “Təhlkəsizlik Şurası” məlumat yayıb ki, azərbaycanlı jurnalist “onların xəbəri olmadan” Laçına gəlib, onlar “Haqqin.az” saytının rəhbəri Eynulla Fətullayevin səfərindən möhkəm narahat olduqlarını dilə gətiriblər.
“...Bizim ermənilərdən, yaxud başqalarından icazə almaq kimi bir öhdəliyimiz yoxdur”
Qeyd edək ki, bir neçə gün əvvəl “Haqqin.az” saytının rəhbəri Eynulla Fətullayev Laçın dəhlizində və Laçının Zabux kəndində olub. Məsələyə münasibət bildirən siyasi şərhçi Azər Həsrət “Bakı-Xəbər”ə bildirdi ki, bu, separatçıların son çırpıntılarının göstəricisidir. “Bu, separatçıların son çırpıntılarıdır və burada qeyri-adi bir şey yoxdur. Özlərini elə aparırlar ki, guya nəsə edə bilərlər, yaxud nəsə edirlər. Amma bütün dünya bilir ki, Qarabağda, bütövlükdə o bölgədə onların edə biləcəyi heç nə qalmayıb. Sadəcə olaraq, indiki şəraitdə Azərbaycan dövləti üçtərəfli bəyanata uyğun olaraq hələlik nəzarəti tam ələ keçirmir. Azərbaycan dövləti bu işi sakitcə, dinc yolla həyata keçirmək üçün özünün öhdəliklərinə sadiqdir. Ona görə də hər hansı sərt hərəkətlərə yol vermir. Azərbaycan jurnalistlərinin hazırda ermənilərin yaşadığı bölgəyə getməsinə gəlincə isə, burada bizim ermənilərdən, yaxud başqalarından icazə almaq kimi bir öhdəliyimiz yoxdur. Çünki Azərbaycan jurnalistləri Ermənistan ərazisinə deyil, Azərbaycan ərazisinə gediblər. Yəni konkret Eynulla Fətullayev məhz Azərbaycan ərazisinə gedib. İşğalçı Ermənistanın xaricdən gətirib ora erməniləri yerləşdirməsi o demək deyil ki, biz ora getməməliyik. Ora bizim torpağımızdır, Azərbaycan dövlətinin beynəlxalq səviyyədə tanınan ərazisidir. Bu Vitali Balasanyan adlı psevdoməmurun “bəyanatına” gəlincə isə, o da özü özünü aldadır, indiki halda Ermənistan ictimai rəyinə, yaxud da Qarabağdakı bir ovuc erməniyə yalan satır. Oralara gedəndə biz ondan da icazə alası deyilik”.
A.Həsrətin sözlərinə görə, Azərbaycan dövləti də, Azərbaycan jurnalistləri də, istənilən Azərbaycan vətəndaşı da o torpaqlara gedib-gəlməkdə sərbəstdir, sadəcə, indiki şəraitdə müəyyən məsələlər var ki, onların həllni gözləyirik, o məsələni həll etdikdən sonra biz istədiyimiz vaxt Xankəndi də daxil olmaqla bütün o ərazilərə gedib-gələcəyik, buna görə hər hansı bir ermənidən icazə alası deyilik: “Bunların rus sülhməramlılarına göndərdiyi bəyanat tamamilə yersiz və əsassızdır. Orada səsləndirilən iddialar, sadəcə, çox gülüncdür. Rus sülhməramlıları da çox gözəl bilir ki, Azərbaycan vətəndaşı, Azərbaycan jurnalisti öz ərazisinə gedib-gəlir. Bu səbəbdən də biz ora getdiyimiz üçün nə sülhməramlılardan, nə də başqalarından icazə almağa borclu deyilik”.
İradə SARIYEVA
