Ötən həftə gündəmin əsas mövzusu FHN-in yüksək rütbəli zabitinin çəkdiyi iddia olunan intim videoların sosial mediada yayılması oldu. Nəzərə almaq lazımdır ki, sosial şəbəkədə yayılmış hər hansı bir materiala nəzarət etmək mümkün deyil. Sosial şəbəkələrə nəzarət qanunla təsbit olunmadığı üçün kim nə istəyir öz profilində paylaşır.
Ancaq məlum video tək sosial şəbəkədə, internet portallarında deyil, eyni zamanda, peşəkar xəbər saytlarında, informasiya agentliklərində də geniş şəkildə tirajlandı. Həmin media qurumlarında yayımlanan məlum videoda şəxslərin üzü açıq şəkildə görünürdü, həmçinin səbəbkarların ad və soyadları belə qeyd olunurdu.
Ekspertlər bildirir ki, məlum videonun peşəkar mediada açıq şəkildə yayımlanması media etikasına ziddir. Həmçinin, hadisənin detallarının video şəklində göstərilməsi ayrıca bir qanun pozuntusudur. Hadisənin özü informativ şəkildə işıqlandırılsa daha yaxşı olardı.
Peşəkar media orqanlarında bu hadisənin təkrar-təkrar tirajlanması, müxtəlif aspektlərdən işıqlandırılması nə dərəcədə düzgündür?
Müşfiq Ələsgərli: “Medianın məlum hadisəni ən xırda detalına qədər ictimailləşdirməsi etik baxımdan düzgün deyil”
Mətbuat Şurası sədrinin müavini Müşfiq Ələsgərli “Bakı-Xəbər”ə açıqlamasıda qeyd etdi ki, FHN-də baş vermiş hadisə təzadlıdır və çox maraq doğurur: “Məsələnin ilk tərəfi odur ki, bəzi şəxslər məlum məsələdə medianı qınadılar ki, media şəxsi həyat məsələsinə yer verməməlidir. Ancaq problem ondan ibarətdir ki, baş vermiş hadisə şəxsi həyat konteksindən çıxıb. Qanunvericiliyə əsasən, şəxsi həyat deyilən məsələ qanunların pozulması ilə müşayət olunmamalıdır. Məlum hadisə konkret olaraq qanunların pozulmasına səbəb olub. İştirak edən cütlüklər dövlət obyektini özlərinin şəxsi məqsədləri üçün istismar ediblər. Bu isə qanunla qadağandır. Buna görə də medianın məlum məsələyə geniş yer ayırması, faktı pisləməsi normaldır. Narahatlıq doğuran məqam hadisənin detallarının geniş formada sosial şəbəkədə və bəzi media qurumlarında yayılmasıdır. Əslində məlum hadisənin ən xırda detalına qədər ictimailləşdirilməsi etik baxımdan düzgün deyil. Orda iştirak edən şəxslərin qohumları, ailə üzvlərini də nəzərə almaq lazımdır. Onlar da bu məsələni pisləyənlər sırasında olsalar da, gələcəkdə onların cəmiyyət arasında görünmələri xoşagəlməz hallara səbəb olacaq”.
Şakir Ağayev: “Məsələnin detallı şəkillə dəfələrlə yayılması etik, media və mental baxımdan da düzgün deyil”
“Novoe vremya” qəzetinin baş redaktoru Şakir Ağayev bizimlə söhbətində qeyd etdi ki, məlum video sosial şəbəkə ilə yanaşı, media qurumlarında da yayımlandı. Ötən illərdən fərqli olaraq, bu gün oxucu zövqü fərqlidir. Bu günün oxucuları daha çox qalmaqal, məlum video tipli materiallata üstünlük verir. Təəssüf ki, bu, hazırki vəziyyətin reallığıdır.
Ş.Ağayev bildirdi ki, hadisə baş veribsə bu hal işıqlandırılmalıdır: “Fövqəladə Hallar Nazirliyində baş vermiş hadisə xəbər, informasiya formasında yayılmalı idi. Mediada məlum olayın təfərrüatı ilə təkrar-təkrar yayımlanması düzgün deyil. Tək FHN-də baş verən məlum video deyil, istənilən mövzunun mediada mütəmadi müzakirə edilməsi düzgün deyil. Bir məsələnin üzərinə dəfələrlə qayıtmaq peşəkar mətbuat üçün uyğun deyil”.
Həmsöhbətimiz hesab edir ki, Azərbaycanın mənəvi əxlaqına zidd hadisələr tirajlanan zaman çox diqqətli olmaq lazımdır: “Nəzərə almaq lazımdır ki, medianın işi xəbər verməkdir. Eyni məsələnin detallı şəkillə dəfələrlə yayılması etik, media və mental baxımdan da düzgün deyil”.
Günel CƏLİLOVA
