Baş Prokurorluğun Mətbuat xidməti məlumat yayaraq bildirib ki, son günlər bəzi sosial media istifadəçiləri tərəfindən Azərbaycan Ordusunun işgüzar nüfuzuna xələl gətirmək, vətəndaşlar arasında süni ajiotaj yaratmaq, eləcə də dövlətin müdafiə qabiliyyətinin möhkəmləndirilməsi istiqamətində görülən işlərə kölgə salmaq məqsədilə həqiqətə uyğun olmayan informasiyalar tirajlanıb. İctimai-siyasi sabitliyin, insan və vətəndaş hüquq və azadlıqlarının pozulmasına yönələn halların qarşısının alınması üçün bu cür hərəkətlərə yol verən şəxslər Baş prokurorluğa dəvət olunub, onlar barəsində təsirli tədbirlər görülüb:
“Belə ki, sosial media istifadəçiləri “jamaz.info” saytının rəhbəri İbişbəyli Fikrət Fərəməz oğlu, “miq.az” saytının rəhbəri Alışov Aqil Balabəy oğlu, Şirvan şəhər sakini İsmayıl Elçin Xankərəm oğlu, Lənkəran rayon sakini Cabbarlı Əli Allahverdi oğlu və Xaçmaz rayon sakini Fətəliyeva Nuranə Etibar qızına “Prokurorluq haqqında” Qanunun 22-ci maddəsinə əsasən gələcəkdə bu kimi neqativ hallara yol verməmələri ilə bağlı xəbərdarlıq edilib.
Bundan başqa, “Facebook” sosial şəbəkəsində özünə məxsus səhifədə qanunla yayılması qadağan edilən informasiyanı yerləşdirdiyinə görə "Prokurorluq haqqında” Qanunun 24-cü maddəsi rəhbər tutulmaqla Şahmuradov Tofiq Təhmuraz oğlunun barəsində İnzibati Xətalar Məcəlləsinin 388-1.1.1-ci (internet informasiya ehtiyatında və ya informasiya-telekommunikasiya şəbəkəsində yayılması qadağan edilən informasiyanın yerləşdirilməsi, habelə belə informasiyanın yerləşdirilməsinin qarşısının alınmaması) maddəsi ilə inzibati xəta haqqında iş üzrə icraat başlanaraq baxılması üçün Bakı şəhəri, Nizami rayon Məhkəməsinə göndərilib.
Məhkəmənin qərarı ilə Tofiq Şahmuradov barəsində 1 ay müddətinə inzibati həbs tənbehi seçilib. Azərbaycan Respublikasının Baş Prokurorluğu media subyektləri və sosial şəbəkə istifadəçilərinə müraciət edərək bildirir ki, dövlət qurumları ilə hər hansı dəqiqləşdirmə aparmadan yoxlanılmamış məlumatların yayılması yolverilməz olmaqla qanunvericiliklə nəzərdə tutulmuş məsuliyyətə səbəb olur.
Neqativ hallara yol vermiş şəxslər barəsində mövcud qanunvericiliyin tələblərinə uyğun olaraq müvafiq tədbirlər görüləcək".
Bu məlumatdan sonra cəmiyyətdə yenidən ordu ilə bağlı məlumatlarla ehtiyatlı davranmanın vacibliyi ətrafında müzakirələr qızışıb. Təbiidir ki, bu heç də “ordu ilə bağlı heç nə yazmaq olmaz” anlamına gələ bilməz. Çünki orduya ictimai nəzarət vacibdir. Belə olmasa, büdcədən ən çox vəsait ayrılan bu sahədə neqativlik baş alıb gedər. Bu məsələyə ekspertlərin münasibəti necədir?
Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki, çox təəssüflər olsun, bu məsələ ilə bağlı düzgün olmayan manipulyasiyalar edilir: “Hərbi sirr kateqoriyasına aid olan məlumatlar mediada tirajlana bilməz. Bu kateqoriyaya aid olan məlumatların yayılmasında eyni zamanda onu qorumalı olan şəxslər və qurumlar da məsuliyyət daşıyır. Hərbi sirr mühafizə olunmalıdır. Təəssüflər olsun ki, bəzən ordu ilə bağlı başqa mövzilarda yazan jurnalistlər də qınağa tuş gəlir. Hətta bəzən təqib də olunurlar. Təbiidir ki, belə hallar daha çox əvvəllər yaşanırdı. Ordu ilə bağlı ictimai nəzarət zəif oldu ki, əsgərə ayrılan vəsaitlər mənimsənildi. Mən bu dəlili rəsmi məlumatlara istinadən deyirəm. DTX-nın Müdafiə Nazirliyində keçirdiyi son əməliyyatlar əsasən maliyyə sektorunu əhatə edib. Əminəm ki, ordudakı maliyyə maxinasiyaları zamanında ictimailəşsəydi, belə hallar yaşanmazdı. Bir də var ordu ilə bağlı dezinformasiyalar yayanlar. Bəzən bu cür xəbərlər məqsədli olaraq tirajlanır. Təbiidir ki, onlarla bağlı lazımi addımlar atılmalıdır. Çünki biz kifayət qədər həssas ölkədə yaşayırıq. Düşmənlə hər an müharibə alovlana bilər. Hərbi ilə bağlı qadağan olunan məlumatları əsasən hərbi qulluqçular öz telefonları ilə çəkib paylaşırdılar. Bu cür əməllərə görə bir sıra hərbçilər barədə tədbir görüldü. Bir sözlə, jurnalistlər ordu ilə bağlı ictimai nəzarəti ciddi şəkildə təmin etməlidir. Bu istiqamətdə onlara heç kim mane ola bilməz”.
Məhəmmədəli QƏRİBLİ
