ABŞ Senatı Dövlət Departamentini Rusiyanı terrorçuluğa sponsorluq edən dövlət kimi tanımağa çağıran qətnamə qəbul edib.
Azərbaycan mətbuatının əldə etdiyi məlumata görə, bu barədə “Nyu York Tayms” nəşri bildirib. Qəzetin yazdığına görə, qətnamə iyulun 27-də keçirilən səsvermə zamanı yekdilliklə qəbul edilib. Sənəddə senatorlar Dövlət Departamentini Çeçenistan, Gürcüstan, Suriya və Ukraynada “saysız-hesabsız günahsız kişi, uşaq və qadınların” ölümünə səbəb olan hərəkətlərə görə Rusiya Federasiyasını terrorçuluğun sponsoru kimi tanımağa çağırır. Eyni qətnamə Konqresə də təqdim edilib. Sənədi Demokratlar Partiyasında böyük nüfuza malik olan Nümayəndələr Palatasının spikeri Nensi Pelosinin dəstəkləyəcəyi gözlənilir. Məlumata görə, lakin konqresmenlər Dövlət Departamentinin qərarı olmadan qətnamə qəbul edə bilməzlər.
ABŞ Senatı Rusiyanı terror dövləti kimi tanıdı, bəs sonra nə baş verəcək?
“Bu oyunlar nəticə etibarı ilə dünyanın sabitlik düzənini pozur, növbəti təhlükələrə, kataklizmlərə yol açır”
Siyasi ekspert Rövşən Rəsulov “Bakı-Xəbər”ə bildirdi ki, belə bir qərar verilməsi regionumuza da təsirsiz ötüşməyəcək. “Rusiyanın ABŞ Senatı tərəfindən terrorçu dövlət kimi tanınması artıq Qərblə Rusiya arasında olan-qalan bütün körpülərin yandırılması anlamını daşıyır və əslində belə bir qərarın verilməsi çoxqütblü dünyaya yaxşı heç nə vəd etmir. İlk növbədə, bu qərar onsuz da ciddi böhranlarla qarşı-qarşıya qalan qlobal iqtisadi sferaya öz mənfi təsirlərini göstərəcək. Nəzərə alsaq ki, Rusiya iqtisadiyyatı müştərək olaraq Çin kimi qüdrətli iqtisadiyyatı olan ölkə ilə paralel fəaliyyət göstərir, o cümlədən, Çin Rusiyaya qarşı tətbiq edilən sanksiyaların heç birində iştirak etmir, habelə Pekin Kremlin Ukraynada başlatdığı hərbi əməliyyata, birbaşa olmasa da, dolayısı ilə dəstək göstərir. Eləcə də, Çinin Tayvan məsələsində Rusiyadan siyasi dəstək alması da kimsəyə sirr deyil. İndi təsəvvürünüzə gətirin ki, bundan sonrakı proseslərdə daha hansı dəhşətli kataklizmlər yaşanacaq. Senatın belə bir qərar verməsi regionumuza da təsirsiz ötüşməyəcək”.
R.Rəsulovun sözlərinə görə, bildiyimiz kimi, Rusiyanın Cənubi Qafqaz regionuna iqtisadi təsirləri mövcuddur və eyni zamanda, geosiyasi gedişləri də müxtəlif vaxtlarda özünü göstərir: “Amma fakt budur ki, hazırda istər Azərbaycan, istər Türkiyə, istərsə də İran kimi dövlətlər Rusiya ilə münasibətlərini öz siyasi-iqtisadi maraqları kontekstində tarazlaşdırırlar və həmin siyasətin davam etdirilməsi ABŞ-ın qıcıqlanmasına səbəb ola bilər. Biz təkcə Türkiyənin Rusiya ilə son dövrlərdəki əməkdaşlıq səviyyəsinə nəzər salsaq və bu əməkdaşlığın müqabilində ABŞ-ın Türkiyəyə qarşı münasibətində verdiyi qərarları xatırlasaq nəyin necə olduğunu daha rahatlıqla dərk edə bilərik. Baxın, ABŞ NATO-dakı müttəfiqi Türkiyəyə nə F-35 qırıcılarını, nə “Partiot” komplekslərini verdi, Türkiyə isə bunun müqabilində Rusiyadan S-400 ZRK-larını əldə etdi. Fərq və onun ortaya çıxardığı gerçəkliklər də məhz budur.
Bəli, Rusiya Ukraynada müharibənin aparılması qaydalarına aid konvensiyaları pozur, mülki əhali hədəfə alınır və bütün bunlar, əlbəttə ki, təəssüf doğurur. Yəni Rusiyanın bu cür müharibə aparması dünya birliyinin haqlı narazılığına səbəb olmaqdadır. Lakin ABŞ da, necə deyərlər, az aşın duzu deyil və zaman-zaman Amerikanın “terror təhlükəsi” adı altında müxtəlif ölkələrdə hərbi əməliyyatlar aparması, həmin ölkələrin siyasi düzənini pozması və öz maraqlarını yürütməsi heç bir müsbət nəticələrlə yadda qalmayıb. Beləliklə, ABŞ Rusiya ilə açıq şəkildə va-banka gedir və qarşıdakı zamanlarda yarana biləcək təhlükələri sığortalaması üçün, daha dəqiq desək, Rusiyaya qarşı rəsmi müharibə elan etməsi üçün hazırlıq proseslərinə başlayır. Deyərdim ki, hər iki ölkə öz maraqlarını təmin etmək üçün ağlasığmaz siyasi oyunlara gedir və bu oyunlar nəticə etibarı ilə dünyanın sabitlik düzənini pozur, növbəti təhlükələrə, kataklizmlərə yol açır. Və ən əsası, əgər Rusiya bu ilin fevralında Ukraynada irimiqyaslı hərbi əməliyyatlara başlamaqla nə qədər ciddi səhvə yol veribsə də, ABŞ Senatının da Rusiyanı terrorçu dövlət elan etməsi həmin səhvdən heç də geri qalmayan acı bir reallıqdır. Ümumiyyətlə, iki hegemon ölkənin, qaba ifadə etsək, kəllə-kəlləyə gəlməsi artıq üçüncü dünya müharibəsinin ilk siqnallarını verir və bəşəriyyət də bu təhlükələrə hazırlaşmalıdır”.
İradə SARIYEVA
