Azərbaycanlıların bu gün ən sıx məskunlaşdığı, yaşadığı ölkələrdən biri də şimal qonşumuz olan Rusiya Federasiyasıdır. Ona görə də bu ölkədə diasporumuzun daha mütəşəkkil, daha koordinasiya edilmiş şəkildə fəaliyyət göstərməsi günün tələbidir. Ancaq biz görürük ki, hazırda Rusiyada mütəşəkkil fəaliyyət göstərən diaspor təşkilatımız yoxdur.
Bir çox qurumlarımız parçalanıb, ən böyük diaspor təşkilatımız olan Ümumrusiya Azərbaycanlıları Konqresinin isə qeydiyyatı ləğv edilib. Hazırda ermənilərin hər vəchlə Rusiya ilə Azərbaycanın arasını vurmaq istiqamətində fəaliyyət göstərdiyi bir zamanda Azərbaycanın Rusiyadakı fəaliyyətinə ciddi ehtiyac var. Bəs diasporumuzun təşkilatlanmasına nə mane olur?
Samir Adıgözəlli: “Çox təəssüflər olsun ki, Diaspor Komitəsi də bu istiqamətdə lazımi fəaliyyət ortaya qoya bilmir”
Diaspor fəaliyyətində kifayət qədər təcrübəsi olan İSBAM sədri Samir Adıgözəlli “Bakı-Xəbər”ə açıqlamasında bildirdi ki, ÜAK bağlanandan sonra Rusiyadakı Azərbaycan diasporunu bir araya gətirən təşkilat yoxdur: “Çox təəssüflər olsun ki, Rusiyada kifayət qədər imkanlı və nüfuzlu azərbaycanlılar olsa da, bu istiqamətdə heç bir fəaliyyət ortaya qoymurlar. Vaxtı ilə isə Azərbaycanın milli maraqlarına qarşı yönələn “Milyarderlər İttifaqı” adlı təşkilata ikiəlli dəstək verdilər. Çox təəssüflər olsun ki, Diaspor Komitəsi də bu istiqamətdə lazımi fəaliyyət ortaya qoya bilmir. Rusiyada bu işi görməyə böyük ehtiyac var. Bilirsiniz ki, ayrı-ayrı regionlarda diaspor təşkilatlarımız fəaliyyət göstərir. Onların da çoxunun adı var, özləri isə yoxdur. Bu vəziyyətdən ermənilər özlərinə lazım olan səviyyədə istifadə edir. Təcili şəkildə bu istiqamətdə işləri sürətləndirməliyik. Sanki hər kəs yuxarıdan əmr gözləyir. Rusiyada bu addımı müstəqil şəkildə ata biləcək şəxslər kifayət qədərdi”.
Nazir Hətəmov: “Azərbaycan diasporunun rəhbəri səfir, səfirlik əməkdaşlarını, hər bir diaspor nümayəndəsini üzdən tanımalı və hər birinə sahib çıxmalıdır”
Saxalin vilayətində fəaliyyəti dayandırılmış Ümumrusiya Azərbaycan Konqresinin sədri Nazir Hətəmov “Bakı-Xəbər”ə açıqıamasında bildirdi ki, Rusiyada Azərbaycan diasporunun vəziyyəti zamanında çox güclü idi, ancaq bugünkü gündə çox zəifdir: “Bu zəiflik də ümumi diaspor rəhbərimizin olmamasından irəli gəlir. Digər tərəfdən onu qeyd edə bilərəm ki, artıq Rusiyada yeni diaspor qurumlarının yaradılmasi mənasızdır. Biz azərbaycanlılar yetərincə özümüzü Rusiyada lazımı səviyyədə, yaxşı mənada tanıda, təbliğ edə bilmişik. Rusiya dovləti burada Azərbaycan diasporunun yaranmasına heç bir maneə törətmir.
Məlum hadisədən sonra diasporumuzda çətinlik oldu və bugünə kimi də heç bir irəliləyiş yoxdur. Əsas səbəblərdən biri ondan ibarətdir ki, diaspor fəaliyyətindən anlayışı olan şəxslər diaspora təşkilatlarının sədrləri olmur. Azərbaycan diasporunun rəhbəri səfir, səfirlik əməkdaşlarını, hər bir diaspor nümayəndəsini üzdən tanımalı və hər birinə sahib çıxmalıdır. Təəssüflər olsun ki, nə səfirlik, nə də diaspor rəhbərimiz heç bir diasporu nə üzdən, nə də xarakterindən tanımır. Bu istiqamətdə ciddi addımlar atılmalıdır”.
Məhəmmədəli QƏRİBLİ
