Son günlər bəzi sosial media istifadəçiləri tərəfindən Azərbaycan Ordusunun işgüzar nüfuzuna xələl gətirmək, vətəndaşlar arasında süni ajiotaj yaratmaq, eləcə də dövlətin müdafiə qabiliyyətinin möhkəmləndirilməsi istiqamətində görülən işlərə kölgə salmaq məqsədilə həqiqətə uyğun olmayan informasiyalar tirajlanıb.
İctimai-siyasi sabitliyin, insan və vətəndaş hüquq və azadlıqlarının pozulmasına yönələn halların qarşısının alınması üçün bu cür hərəkətlərə yol verən şəxslər Baş Prokurorluğa dəvət olunub, onların barələrində təsirli tədbirlər görülüb. Belə ki, sosial media istifadəçiləri - “jamaz.info” saytının rəhbəri İbişbəyli Fikrət Fərəməz oğlu, “miq.az” saytının rəhbəri Alışov Aqil Balabəy oğlu, Şirvan şəhər sakini İsmayıl Elçin Xankərəm oğlu, Lənkəran rayon sakini Cabbarlı Əli Allahverdi oğlu və Xaçmaz rayon sakini Fətəliyeva Nuranə Etibar qızına “Prokurorluq haqqında” Qanunun 22-ci maddəsinə əsasən gələcəkdə bu kimi neqativ hallara yol verməmələri ilə bağlı xəbərdarlıq edilib.
Bundan başqa, "Facebook” sosial şəbəkəsində özünə məxsus olan səhifədə qanunla yayılması qadağan edilən informasiyanı yerləşdirdiyinə görə 1 ay müddətinə həbs edilib.
Azərbaycan Respublikasının Baş Prokurorluğu media subyektləri və sosial şəbəkə istifadəçilərinə müraciət edərək bildirir ki, dövlət qurumları ilə hər hansı dəqiqləşdirmə aparmadan yoxlanılmamış məlumatların yayılması yolverilməz olmaqla qanunvericiliklə nəzərdə tutulmuş məsuliyyətə səbəb olur.
Neqativ hallara yol vermiş şəxslər barəsində mövcud qanunvericiliyin tələblərinə uyğun olaraq müvafiq tədbirlər görüləcək.
“Bəzi şəxslər, sosial media istifadəçiləri məsuliyyət hədlərini hədsiz dərəcədə aşır, nəticə etibarı ilə ictimai rəyi çaşdırır”
Media eksperti Azər Həsrət bildirdi ki, uzun illər sosial media terroru hökm sürür. Təəssüf ki, bir çox insanlar konstitusion hüquqlardan xəbərsizdir: “Bəzi şəxslər, sosial media istifadəçiləri məsuliyyət hədlərini hədsiz dərəcədə aşır, nəticə etibarı ilə ictimai rəyi çaşdırır. Ölkədə ajiotaj yaratmaq, saxta informasiyalar yaymaq üçün nə lazımdırsa onu edirlər. Təəssüflər olsun ki, bir çox hallarda saxta informasiyalar Azərbaycan dövləti və dövlətçiliyi üçün zərərlidir. Bu məlumatları yaymaq istəyənləri məqsədi Azərbaycan dövlətinin imicini gözdən salmaqdır. Bu informasiyaları bəzən ölkənin daxilindən ya da xaricdən məqsədli şəkildə ortaya atır. Təəssüflər olsun ki, bəzi sosial media istifadəçiləri həmin məlumatın yayılmasının düzgün olmadığını bilmədən sosial şəbəkədə yayırlar. Bu səbəbdən də Baş Prokurorluq xəbərdarlıq etmək məcburiyyətində qalıb. Hesab edirəm ki, sosial medianın fəlsəfəsini anlayan şəxslər bu prosesdə dövlətin yanında olmalı, ona kömək etməlidir”.
Günel CƏLİLOVA
