Rusiya Dövlət Dumasının MDB işləri və həmvətənlərlə əlaqələr komitəsi sədrinin birinci müavini Konstantin Zatulindən növbəti həyasızlıq. Bu dəfə Zatulin əndazəni bir qədər də aşaraq Qarabağla bağlı Putinin də adından danışıb: “Azərbaycan Qarabağ ərazisinə girdi və heç vaxt təsəvvür edə bilməzdim, Şuşanı ələ keçirdi. Mən bilmirəm bu necə baş verdi, kimdir günahkar? Bunu ermənilər özləri araşdırmalıdır. Mən də, prezident Putin də hadisələrin bu cür inkişafını gözləmirdik”.
Zatulinin Azərbaycana qarşı qərəzli mövqedən çıxış etməsi təəccüblü deyil. Çünki o, əzəldən bizə qarşı olub. Erməni lobbisindən bəsləndikcə, Azərbaycana qarşı ritorikanı sərtləşdirib. Zatulinin yeni fikri yalnız “Azərbaycan Qarabağı, Şuşanı geri qaytardı” fikridir. O, Putin üçün də bu məsələnin “gözlənilməz” olduğunu vurğulayır. Həyasızlığın dərəcəsinə bax ki, Zatulin Putinin adından da danışır. Sanki Putinin mətbuat xidmətinə Dmitri Peskov yox, Zatulin rəhbərlik edir. Düzdür, Zatulin hakim “Vahid Rusiya” Partiyasında təmsil olunur. Ancaq Zatulinin Azərbaycana qarşı olan nifrətinə Putini də ortaq edib onun adından danışması təəccüb doğurmaya bilməz.
“Bu dəfə də Zatulin cəzasız qalsa, o zaman Kremlin bunda maraqlı olması ortaya çıxacaq”
Məsələyə münasibət bildirən politoloq Tural İsmayılovun fikrincə, Zatulinin birbaşa erməni lobbisinin təsiri altında olması hamıya bəllidir: “Bütövlükdə Zatulin daim erməni fondları tərəfindən maliyələşdirilən siyasi personadır. O üzdən Azərbaycana qarşı qərəzli, faşist mövqedən çıxış edir. Zatulin indiki dövrdə dünya siyasətinin tələb etmədiyi formada müstəsna şəkildə riyakarlıq göstərən siyasətçilərdən biridir. Təəssüflər olsun ki, Zatulin Rusiya Dövlət Dumasında önəmli vəzifə tutmaqla yanaşı, hakim partiyanın adından danışır. Onun bu biabırçı bəyanatlarına qarşı bugünə qədər Rusiya rəhbərliyi tərəfindən konkret etiraz edilməyib. Heç olmasa Zatulin hakim “Vahid Rusiya” Partiyası tərəfindən bir dəfə ciddi tənbeh olunsaydı, bu dərəcədə həyasızlıq etməzdi. Rusiya kimi regionda önəmli gücə malik ölkə öz siyasətçilərinin davranışlarına, digər ölkələrlə münasibətlərin pozulmasına yönəlik cəhdlərə nəzarət etməlidir. Ancaq əfsuslar olsun ki, Zatulinə münasibətdə belə mövqe ortaya qoyulmur. Baxmayaraq ki, dəfələrlə Zatulinin fikirləri Azərbaycanda etirazlarla qarşılanıb. Halbuki, Zatulinin Ermənistanla olan çirkli əlaqələri bəllidir. Buna rəğmən, Zatulin Rusiya tərəfindən cəzalandırılmayıb. Bu dəfə də Zatulin cəzasız qalsa, o zaman Kremlin bunda maraqlı olması ortaya çıxacaq. Bununla belə, biz nəzərə almalıyıq ki, Zatulin qeyri-ciddi siyasətçidir. Zatulinin Putinin adından danışacaq səlahiyyəti yoxdur. Zatulinin bu fikirləri Ermənistan ictimai rəyinə hesablanıb. Zatulin erməni lobbisinə göstərmək istəyir ki, verdikləri pul müqabilində boş dayanmır”.
Bir sözlə, politoloq hesab edir ki, Zatulinin davranışları Rusiyanın imicinə zərbə vurduğu üçün ölkə rhbərliyi onu cəzalandırmalıdır.
Vidadi ORDAHALLI
