Rusiya ABŞ sanksiyalarına qarşı əks hücuma hazırlaşır, buna görə Vaşinqton Alyaskanı itirə bilər. Bu barədə Çinin Sohu nəşri məlumat yayıb.
Nəşrin rəyçiləri hesab edirlər ki, Vaşinqton “Rusiyanı iflasa sürükləmək və iqtisadiyyatını məhv etmək” istəyir və bəzi ABŞ rəsmilərinin Rusiya Federasiyasını da terrorizmi himayə edən ölkələr siyahısına daxil etmək istəyini qeyd edir. Nəşr qeyd edir ki, ABŞ Rusiya iqtisadiyyatına zərər vurmağı və Rusiya Federasiyasını dünyadan təcrid etməyi planlaşdırır: “Rusiya dövlətlərin istədiklərini etməyə icazə verməyəcək. Moskva əks hücum hazırladı. Bu yaxınlarda Rusiya Federasiyası Dövlət Dumasının sədri Vyaçeslav Volodin Rusiyanın geri qaytaracağı bir şeyin olduğunu bildirdi - məsələn, Alyaskanın”.
Rusiya Xarici İşlər Nazirliyinin rəsmi nümayəndəsi Mariya Zaxarova da CNN müxbiri ilə Donbası müzakirə edərkən Alyaskanın tarixi mənsubiyyətini xatırladıb: “CNN nümayəndəsinin niyə bu qədər narahat olduğunu başa düşürəm. Tarixi torpaqlardan heç nə anlamadım. Alyaskadan danışırsan, yoxsa nə?”.
Müəlliflər onu da əlavə ediblər ki, Vaşinqton heç vaxt nə Rusiya, nə də SSRİ ilə birbaşa münaqişədə olmayıb, lakin çinli müşahidəçilərin fikrincə, ABŞ sərt tədbirlər görəcəyi təqdirdə Moskva cavab verə biləcək.
Bütün bu deyilənlərin fonunda ola bilərmi ki, Rusiya Alyaskanı ABŞ-dan tələb etsin? Rusiya bunu tələb etsə, o zaman nə baş verəcək?
“Alyaskanı geri almağa Rusiyanın elə bir gücü də yoxdu”
Məsələyə münasibət bildirən Aydınlar Partiyasının sədr müavini Qorxmaz İbrahimlinin fikrincə, bu kimi məsələlərin gündəmə gətirilməsi ictimai rəyə hesablanıb: “Bu gün Rusiya ABŞ-dan nə tələb edirsə, bu, ölkə daxilində ictimai rəyə hesablanmış bir siyasətdir. Velekarus düşüncəsini artırmaq üçün, Ukraynadakı müharibəni unutdurmaq və daha da təşəbbüskar olmaq üçün belə məsələlər ortalığa atılıb. Alyaska məsələsi vaxtilə həll edilib. Bəlli miqdarda qızıl müqabilində ABŞ Alyaskanı Rusiyadan alıb. Rusiyanın belə bir təşəbbüslə çıxış etməsi mənasız müzakirəyə səbəb ola bilər. Ona görə də Kreml ölkədaxili ictimai rəyi idarə etmək üçün bunu ortaya atır. Çin və yaxud da digər xarici media orqanlarının bu barədə yazmasının elə bir xüsusi əhəmiyyəti yoxdur. Alyaskanı geri almağa Rusiyanın elə bir gücü də yoxdu. Rusiya ordusunun Ukraynada necə dirənişlə üzləşdiyini hamımız görürük. Üstəlik, İkinci Dünya müharibəsindən sonra cızılan sərhədlərin kəskin dəyişəcəyi real deyil. Düzdür, 1991-ci ildə SSRİ dağıldı, sərhədlər dəyişdi, amma bu o demək deyil ki, sərhədlər yenidən cızılacaq”.
Bu baxımdan sədr müavini Alyaskaya görə Rusiya ilə ABŞ arasında hansısa qarşıdurmanın yaranacağını düşünmür.
Vidadi ORDAHALLI
