Mətbuatda yayılan məlumata görə, Rusiya Ukraynanı “terrorçu dövlət” kimi tanımaq istəyir. “Ədalətli Rusiya” partiyasının lideri Sergey Mironov Teleqram kanalında məlumat verib ki, rəhbərlik etdiyi siyasi təşkilat Ukraynanın terrorçu dövlət kimi tanınması üçün qanun layihəsi hazırlayıb: “Dünən (25 iyul) fraksiya deputatları ilə birlikdə Ukraynanın terrorçu dövlət kimi tanınması üçün çox əhəmiyyətli qanun layihəsi təqdim etdik”.
Onun sözlərinə görə, bu gün Ukrayna Silahlı Qüvvələri Rusiya Federasiyası, “dxr”, “lxr” ilə sərhədyanı ərazilərdə “terror aktları”nın əlamətlərini özündə əks etdirən hərəkətlər həyata keçirir.
Mətbuatda gedən şərhlərdə qeyd edilir ki, Ukraynaya girən Rusiya ordusudur və müharibə də Ukrayna torpaqlarında gedir, “lxr” və “dxr” isə separatçı qurumlardır.
Maraqlıdır ki, Ukraynaya qarşı əsassız olaraq “terrorçu dövlət” iddiası irəli sürülür, amma gerçəkdən terrorçu dövlət olan və Azərbaycana qarşı saysız terror aktları törədən Ermənistana “gözün üstə qaşın var” deyən olmadı. Halbuki, əsl terrorçu dövlət Ermənistandır.
Mironov Ukraynanı terrorçu dövlət sayır, amma Ermənistanı görmür. Bu halda Rusiyanın siyasi partiya liderinin sərgilədiyi yanaşma necə ədalətli sayıla bilər?
“Rusiyanın daxilində də çox yaxşı bilirlər ki, Ermənistan terrorçu dövlətdir, lakin indiyə qədər buna qarşı hər hansı bir addım atılmayıb, atılmır da”
AMEA-nın Fəlsəfə və Sosiologiya İnstitutunun aparıcı elmi işçisi, fəlsəfə doktoru, BAO başqanının müavini, siyasi şərhçi Faiq Ələkbərli “Bakı-Xəbər”ə şərhində bildirdi ki, Rusiya dumasında təmsil olunan “Ədalətli Rusiya” partiyasının təmsilçilərinin və lideri Sergey Mironovun Ukraynanın “terrorçu dövlət” kimi tanınması üçün qanun layihəsi hazırlayıb təqdim etməsi absurddur: “Şübhəsiz ki, bu sırf marginal bir xarakter daşıyır. Çünki burada heç bir ədalətdən, beynəlxalq hüquqdan söhbət gedə bilməz. Ukrayna dövləti, xalqı özünü müdafiə edir. Hucumedici tərəf Rusiyadır və bu halda Ukraynanın özünü müdafiə etməsi təbiidir. Onlar özlərini hər şəkildə müdafiə edirlər, hətta partizan hərəkatına da başlayıblar, bu, ukraynalılar üçün vətən müharibəsidir. Bu halda “Ədalətli Rusiya” partiyasının Ukraynanın “terrorçu dövlət” adlandırlması üçün qanun layihəsi hazırlamaq anlamsızdır. Bunu yalnız Rusiya və Rusiyaya yaxın bir neçə dövlət təqdir edə bilər, demokratik dünya dövlətləri, ölkələrin əksəriyyəti, təbii ki, bunu heç cür qəbul etməyəcək. Əgər “Ədalətli Rusiya” partiyasının lideri terrorçu dövlət axtarışındadırsa bilsin ki, bu dövlət Ermənistandır. Mironov da, Rusiyanın başqa partiya sədrləri də bilməlidir ki, Ermənistan son 30 il ərzində yalnız Azərbaycanın torpaqlarını işğalda saxlamayıb, eyni zamanda da dinc insanlarımıza, uşaqlarımıza qarşı terror aktları törədib, şəhərlərimizi, kəndlərimizi dağıdıb. Ermənistan təkcə cəbhə bölgəsində deyil, müharibə gedən ərazidən xeyli uzaqda yerləşən şəhərlərimizi, kəndlərimizi raket atəşinə tutub, qadağan olunmuş silahlarla vurub, fosforlu, kasetli bomba atıb. Bunlar hamısı reallıqdır. Gəncədə, Bərdədə, Tərtərdə, Ağdamda, Bakıda belə Ermənistanın terror aktlarının dərin izləri var. Sözümün canı odur ki, əgər “Ədalətli Rusiya” və başqa partiyalar haqq-ədalət, hüquq axtarışındadırsa o zaman bu addımı çoxdan atıb Rusiya qarşısında Ermənistanı terrorçu dövlət kimi tanımaq barədə məsələ qaldırmalı idilər. Tələb etməli idlər ki, Ermənistan Azərbaycana qarşı terror həyata keçirib və o, terrorçu dövlət elan olunmalıdır. Amma biz nə gördük?. Biz onların ötən müddət ərzində daha çox Ermənistanı müdafiə etdiklərini müşahidə etdik”.
F.Ələkbərlinin sözlərinə görə, bu da onu göstərir ki, Rusiya siyasətində də ancaq Moskva öz maarqlarını güdür, terrorçu dövlətə terrorçu deyə bilmir, üstəlik özünü müdafiə edən, öz vətənini, millətini qoruyan Ukraynanı “terrorçu dövlət” kimi qələmə verməyə çalışır. F.Ələkbərli hesab edir ki, bütün bunlar Rusiyanın siyasətindəki ziddiyyəti büruzə verir və bunu da hər kəs görür. Bu cür çıxışlarının Rusiyanın daxili auditoriyasına hesablandığını vurğulayan F.Ələkbərlinin sözlərinə görə, Rusiyanın daxilində də Ukraynanın yox, daha çox Ermənistanın terrorçu dövlət olduğu məlumdur: “Rusiyanın daxilində də çox yaxşı bilirlər ki, Ermənistan terrorçu dövlətdir, lakin indiyə qədər buna qarşı hər hansı bir addım atılmayıb, atılmır da. Ona görə də, Rusiyanın daxilinə hesablanan bu məsələyə dünya ictimaiyyətindən elə də ciddi reaksiya olmayacaq, rusiyalı partiya sədrinin bu layihəsi gülünc hal kimi qəbul ediləcək”.
İradə SARIYEVA
