Avropa Parlamenti timsalında yenə ikili və ümumi yanaşma. Yenə də işğalçı ilə işğala məruz qalan tərəfə fərq qoyulmadı. Necə ki, illərlə bunu etdilər.
Avropa Parlamentinin Xarici Əlaqələr Komitəsinin sədri Devid MakAlister bəyan edib ki, Cənubi Qafqaz regionunda davamlı sülh yalnız hərtərəfli həll yolları nəticəsində bərqərar ola bilər və bunun üçün hər iki tərəfdən real, səmimi səylər lazımdır: “Erməni həmkarlarımızla aparılan müzakirələr Ermənistanın hazırkı vəziyyətdə təhlükəsizlik və humanitar məsələlər kontekstində narahatlığını daha yaxşı başa düşmək baxımından çox faydalı oldu. Aydındır ki, davamlı sülhə hərtərəfli həll yolu ilə nail olmaq olar. Bunun üçün hər iki tərəfdən real və səmimi səylər lazımdır. Bu səylər siyasi iradə və bugünə qədər əldə edilmiş razılaşmaların həyata keçirilməsi öhdəliyinə əsaslanmalıdır”.
Daha sonra D.MakAlister xatırladıb ki, Avropa Parlamenti bu məsələyə münasibətini bir neçə qəbul edilmiş qətnamə ilə ifadə edib. Xüsusilə 2021-ci ilin mayında Avropa Parlamenti erməni hərbi əsirlərlə bağlı qətnamə qəbul edərək Azərbaycandan erməni hərbi əsirlərin və mülki şəxslərin heç bir ilkin şərt olmadan azad edilməsini tələb edib.
Məgər məlum deyil hansı tərəf danışıqlarda səmimi deyil? Bugünə qədər əldə edilmiş razılaşmaların həyata keçirilməsi öhdəliyinə hansı tərəfin sadiq olmaması məlum deyil?
“Hər vəchlə postmünaqişə dövründə yenidən sülh deyil, gərginliyə xidmət edirlər”
Sözügedən məsələni “Bakı-Xəbər”ə şərh edən politoloq Məhəmməd Əsədullazadə hesab edir ki, Avroparlament Azərbaycana münasibətdə qərəzli yanaşmadan əl çəkmək istəmir: “İlk növbədə onu nəzərə almalıyıq ki, Avropa Parlamenti Azərbaycana münasibətdə daima qərəzli mövqe tutub. Orada bəzi parlamentarilər erməni lobbisinin təsirindədir. Erməni lobbisinin sifarişlərinə uyğun olaraq Azərbaycana qarşı fəaliyyət göstərirlər. Hər vəchlə postmünaqişə dövründə yenidən sülh deyil, gərginliyə xidmət edirlər. Qeyd edim ki, bir müddət bundan əvvəl Azərbaycana səfərə gələn Avropa Parlamentinin bir qrup üzvünə Prezident İlham öz haqlı tənqidini çatdırdı. Biz ümid edirdik ki, bu tənqiddən sonra qurum ədalətli mövqe ortaya qoyacaq. Ancaq göründüyü kimi, qurum təmsilçiləri yenə ermənipərəst mövqe sərgiləyir. Azərbaycanla Avropa İttifaqı arasında son aylarda əlaqələr yüksək inkişafdadır. Erməni lobbisi də bundan narahatdır. Çalışırlar ki, istənilən bir variantla əlaqələrə kölgə salsınlar, amma bu mümkün olmayacaq. Avropa Parlamenti ədalətli deyil, qərəzli mövqe ortaya qoyursa, bu, İrəvanın maraqlarına zərbədir. Çünki Azərbaycan istədiyini əldə edib. Bu kimi yanaşmalar qurumun reputasiyasını korlayir. Ona görə də D.MakAlisterin fikirləri regionda sülhə xidmət etmir”.
Politoloq onu da əlavə etdi ki, Azərbaycan növbəti dəfə öz iradlarını Avroparlamentə bildirməlidir.
Vidadi ORDAHALLI
