Prezident İlham Əliyev Masallı, Lerik və Göygöl rayonlarının yeni təyin olunmuş başçılarını qəbulu zamanı deyib ki, rayonların inkişafı ilə bağlı onların özləri təşəbbüs göstərməlidir.
Prezident bildirib ki, bəzi hallarda yerli icra orqanları bir qədər tənbəllik edir, ya gözləyirlər ki, dövlət tərəfindən hansısa layihələr icra ediləcək, ya da ki, sahibkar gəlib onların qapısını döyəcək: “Belə olan halda, bəzi hallarda sahibkarlar qarşısında müəyyən qanunsuz, əsassız tələblər irəli sürülür. Siz özünüz sahibkarları rayonlarınıza cəlb etməlisiniz, həm yerli sahibkarları, həm də xarici sahibkarları. Xüsusilə nəzərə alsaq ki, Göygöl, Masallı və Lerik rayonlarının turizm potensialı çox zəngindir və bu rayonların füsunkar təbiəti bizim böyük sərvətimizdir – meşələr, dağlar, bulaqlar, çaylar, şəlalələr. Yəni bu rayonları sözün əsl mənasında turizm mərkəzinə çevirmək, hesab edirəm ki, əsas vəzifələrdən biridir”.
Yeni icra başçıları sahibkarlarla qeyri-sağlam münasibətləri aradan qaldırmaq üçün hansı addımları atmalıdır?
Beynəlxalq standartlaşdırma üzrə mütəxəssis Asif İbrahimov qəzetimizə açıqlamasında bildirdi ki,
miqyasından asılı olmayaraq, hər bir müəssisə və ya təşkilat canlı orqanizmdir və onu idarə etmək lazımdır: “ İdarə etmək üçün isə, bunu necə adlandırırsan fərqi yoxdur, əlində idarəetmə vasitəsi, üsullar, metodlar olmalıdır ki, bu idarəetməni həyata keçirə biləsən. Necə ki insan orqanizmində qan dövranı normal olmadıqda və beyinə qan normal işləmədikdə müəyyən fəsadlar yaranır, təşkilatlarda da hər hansı bir proses düzgün təşkil edilməyibsə, idarə edilə bilmirsə, ümumi idarəetmə sisteminə problemlər yaradacaq. Təşkilatın proseslərində problemlər olduğu təqdirdə bu, ümumilikdə İdarəetmə Sisteminə ciddi təsir edir. Hər bir təşkilatın (fərqi yoxdur dövlət qurumudur, yoxsa özəl təşkilat) özünün strukturu, bölmələri, daxili personalı, xarici əhəmiyyətli maraqlı tərəfləri var.
Ölkəmizdə ümumi idarəetmədə ciddi problemlər var. İstər özəl, istərsə də dövlət təşkilatlarında. Ümumilikdə götürəndə, özəl şirkətlərin özünəməxsus çatışmazlıqlarının mövcud olmasına baxmayaraq, düşünürəm ki, özəl şirkətlərdə vəziyyət dövlət qurumlarına nisbətən daha yaxşıdır. Çünki sahibkar qurduğu, yatırım etdiyi sahibkarlıq subyektindən daim az yatırım edib daha çox fayda əldə etmək istəyir və anlayır ki, daim inkişaf etməli və böyüməlidir. Bu baxımdan da özəl şirkətlər dinamik işləməyə məcburdur. Dövlət qurumlarında isə vəziyyət nisbətən qəlizdir. Heç təsadüfi deyil ki, ölkə başçısı dövlət şirkətlərinin hər ili zərərlə başa vurması məsələsinə toxunur. Həqiqətən də dövlət qurumlarında köklü islahatların aparılması şərtdir.
Xarici investorlar dünyada mötəbər araşdırma təşkilatlarının reytinqlərinə nəzər yetirmədən həmin ölkəyə yatırım etmək haqqında heç vaxt düşünmür. Bu reytinqlər içərisində ən mötəbəri isə Dünya Bankının reytinqi olan “Doing Business” reytinqidir ki, xarici investor bu reytinqdə əsas kriteriya kimi ölkədə mövcud məhkəmə-hüquq sisteminə, lisenziya və icazələrin əldə olunması məsələlərinə diqqət yetirir. Yalnız bundan sonra həmin ölkəyə yatırım etmək haqqında düşünür. Biz reytinq üzrə son illər ərzində əhəmiyyətli dərəcədə ön sıralara yüksəlmişik. Lakin anlamalıyıq ki, bununla iş bitmir. İcra qurumları bu istiqamətdə ölkəmizin ciddi şəkildə tanıtımını həyata keçirməli, daha çox investorla ünsiyyətdə olmalı, onları inandırmalıdırlar. Bu bizim son illərdə müşahidə etdiyimiz qaydada olmamalı, yəni investorların ölkəyə dəvət edilməsi ölkə başçısı yox, yerli özünüidarəetmə orqanları tərəfindən həyata keçirilməlidir. Eləcə də yerli sahibkarlarla düzgün əməkdaşlıq modeli seçilməlidir ki, onlar rayona investisiya qoymaqda maraqlı olsunlar”.
Məhəmmədəli QƏRİBLİ
