Ermənistan müxalifəti sentyabrın 2-də Qarabağa qanunsuz səfər etmək istəyir. Bu barədə Ermənistan parlamentinin “Hayastan” fraksiyasının deputatı Qeqam Manukyan öz Facebook səhifəsində yazıb. Onun sözlərinə görə, Qarabağdakı separatçı rejimin rəhbərliyi onlara dəvət göndərib: “Biz gedəcəyik. Amma hakim partiyanın deputatlarını bilmirəm. Onlar keçən dəfə də Qarabağa getmədilər”.
Qeyd edək ki, sonuncu dəfə rus sülhməramlıları erməni müxalifətini təmsil edən deputatları Qarabağa buraxmamışdı. Qarabağdakı separatçılar sentyabrın 2-ni “Azərbaycandan ayrılma günü” kimi qeyd edirlər. Amma həmin tarix revanşist qüvvələrdən başqa heç kim üçün “əlamətdar tarix” deyil. Qeyd edək ki, Qarabağdakı Rusiya sülhməramlıların əsas vəzifələrindən biri də nəzarət etdikləri əraziyə qanunsuz səfərlərin qarşısını almaq, Azərbaycan ərazisində etnik münaqişənin yenidən alovlanmasına imkan verməməkdir. Bu baxımdan gözlənilir ki, erməni deputatların bu dəfə də Qarabağa səfərlərinin qarşısı alınsın. Sülhməramlılar bunun məsuliyyətini dərk edə-edə fərqli addım atıb, erməni müxalif deputatları Azərbaycan ərazisinə buraxsalar nə baş verə bilər?
Hərbi-siyasi ekspert Emin Həsənli “Bakı-Xəbər”ə açıqlamadında bildirdi ki, Ermənistan və Rusiyanın ərazimizdə yerləşdirilən sülhməramlıları 10 noyabr bəyanatına əməl etmir:
“ Çünki Rusiya sülhməramlıları bölgəyə gələndən sonra erməni silahlıları dərhal bölgədən çıxarılmalıydı. Sual olunur: axı, bu qondarma rejim bizim ərazimizdə niyə fəaliyyət göstərməlidir ki, hələ onlar da Ermənistandan nümayəndə dəvət edə bilsin? Bütün bu fəaliyyətlər imzalanan üçtərəfli bəyanatın ruhuna ziddir. Rusiya icazə verərmi ki, öz ərazisində hansısa separatçılar tədbir keçirsin? Qeyri-qanuni hadisədir, Azərbaycan gec-tez bütün bunlara öz lazımi reaksiyasını verəcək. Rusiya müttəfiqlik amilini nəzərə almalıdır. Üzərinə götürdüyü öhdəliyi tam yerinə yetirməlidir. Prezident İlham Əliyev açıq şəkildə dedi ki, Rusiya Müdafiə Nazirliyinin yüksək rütbəli zabitləri və vəzifəli şəxsləri erməni silahlılarının konkret vaxtda Qarabağdan çıxarılması ilə bağlı öhdəlik götürüblər. Bir dəfə Ermənistandan gəlmək istəyən deputatları sülhməramlılar Qarabağa buraxmadı. Bu dəfə də buraxmamalıdırlar. Xaricdən Ermənistana gələn nümayəndə heyətlərinin də Qarabağa səfərinə qadağa qoyulmalıdır. Azərbaycan dövlətinin icazəsi olmadan heç bir nümayəndə heyəti Qarabağa buraxıla bilməz. Rusiya nə qədər tez qanunsuz silahlıları çıxarıb qondarma rejimin ləğvinə nail olarsa, bölgəyə sülh o qədər tez gələr. Əks halda Azərbaycanın özü bu problemi həll edəcək. Yaxşı olar ki, vasitəçiliyi üzərinə götürən Rusiya özü bu məsələni həll etsin”.
Məhəmmədəli QƏRİBLİ
