Xamneyi Zəngəzur dəhlizinə dair daha bir təhdid dolu paylaşım edib. Belə ki, İranın dini rəhbəri öz Tvitter hesabında ikinci dəfə Ermənistan-İran sərhədindən yazıb.
O, Zəngəzur dəhlizinin açılmasını nəzərdə tutaraq hədələyici tonda yazıb: “İslam Respublikası İran-Ermənistan sərhədinin bağlanmasına səbəb olacaq siyasət və ya planlara dözməyəcək”.
Məlumat üçün qeyd edək ki, bundan əvvəl də Türkiyə Prezidenti ilə görüşdən sonra Əli Xamneyi “Biz Qarabağın Azərbaycana qayıtmasına sevinirik. Amma əgər İran-Ermənistan sərhədinin bağlanması siyasəti olarsa, İran buna qarşı çıxacaq. Ona görə ki, bu sərhəd bir neçə min illik əlaqə yoludur”, - deyə paylaşım etmişdi.
Onu da qeyd edək ki, Xamneyinin bu paylaşımı həm İranda, həm də Azərbaycanda narazılığa səbəb olub. Ona yönəlik tənqidi fikirlər artıb. Xamneyinin növbəti dəfə belə aqressiv mövqe sərgiləməsinin səbəbi maraq doğurur.
Maraqlıdır, İranın Ali Dini lideri niyə Zəngəzur dəhlizinə görə bu qədər narahatdır? Nədir bu hikkə?
“Azərbaycanın Cənubi Qafqazda və dünyada artan nüfuzu İranın dini liderinin hikkəsini ortaya çıxardı”
Sözügedən məsələ ilə bağlı fikirlərini “Bakı-Xəbər”lə bölüşən AMİP-in sədr müavini Afsəddin Nəbiyev İranın Zəngəzur dəhlizi məsələsində aqressiv mövqedən çıxış etməsini bir sıra amillərlə əlaqələndirdi: “İran İslam Respublikasının dini lideri Əli Xamneyi İran-Ermənistan sərhədi məsələsindən danışarkən beynəlxalq hüququn fundamental prinsiplərinə söykənməyən absurd fikirlər səsləndirib. Bu açıqlamanın heç bir hüquqi və məntiqi əsası yoxdur. Birincisi, Azərbaycan dövləti region dövlətlərinin, o cümlədən İran və Ermənistanın da faydalanması üçün Zəngəzur dəhlizinin açılması istiqamətində danışıqlar aparır. Hətta bu məsələ 2020-ci il noyabrın 10-da qəbul edilmiş üçtərəfli bəyanatda belə əksini tapıb. Bu baxımdan Azərbaycan nəqliyyatın blokadasının aradan qaldırımasının tərəfdarıdır. İkincisi, dəhlizin açılmasına əsas mane Ermənistan sayılırdı. Ancaq Xamenei bu tviti ilə İranın da dəhlizin açılmasının, yaxud başqa nələrinsə önündə əngəl olduğunu göstərməklə Ermənistanın işğalçılıq siyasətinə, eyni zamanda separatçılığa dəstək olduqlarını açıq şəkildə ortaya çıxardı. 44 günlük Vətən müharibəsi Azərbaycan dövlətinin qələbəsi ilə nəticələndikdən sonra üç dövlətin imzasıyla Ermənistan tərəfi Azərbaycanla Naxçıvan arasında Zəngəzur dəhlizini açacağına dair öhdəlik götürdü. Bu öhdəliyin imzalanmasından iki ilə yaxın bir dövr keçsə də, Ermənistan tərəfi bu məsələ ilə bağlı heç bir real iş görməyib. İndi aydın olur ki, İran dövləti bölgədə geosiyasi üstünlüklərə nail olmaq üçün Ermənistanın rəhbərliyinə siyasi təzyiqlər göstərir. Məsələnin əsl mahiyyəti ondan ibarətdir ki, Azərbaycanın Cənubi Qafqazda və dünyada artan nüfuzu, İranın dini liderinin hikkəsini ortaya çıxardı. Ancaq bizim üçün ən önəmli olan məsələ, qarşımıza qoyduğumuz məqsədlərə nail olmaqdır. Buna da ən yüksək səviyyədə nail olacağıq. Zəngəzur dəhlizi açılacaq, bu birmənalıdır. İran dövləti yaxşı olar ki, ermənipərəst siyasətindən əl çəksin”.
Partiyanın sədr müavini onu da qeyd etdi ki, Azərbaycan dövləti Cənubi Qafqazın təhlükəsizlik arxitekturasını öz gücünə bərpa edəcək.
Vidadi ORDAHALLI
