44 gün davam edən və qələbə ilə nəticələnən Vətən müharibəsi Azərbaycan jurnalistikası üçün də bir sınaq oldu. Sevindirici haldır ki, Azərbaycan mediası bu sınaqdan üzüağ çıxdı. Məlumdur ki, medianın əsas missiyası cəmiyyətin informasiya ilə təmin olunması və təhlükəli informasiyaların zərərsizləşdirilməsidir.
Onu da qeyd edək ki, 44 günlük Vətən savaşı dövründə Prezident İlham Əliyevin xarici media nümayəndələrinə müsahibələr verməsi bu sahədə böyük rol oynadı: “Prezidentin çıxışlarından ruhlanan Azərbaycan jurnalistikası da öz missiyasını Vətən müharibəsi dövründə yüksək səviyyədə icra etdi. Azərbaycan mediası Vətən müharibəsi və müharibədən sonrakı dövrdə öz missiyasını layiqincə yerinə yetirdi. 44 günlük Vətən müharibəsində Azərbaycan Prezidentinin ölkəmiz haqqında həqiqətlərin dünyaya çatdırılması istiqamətində yorulmaz fəaliyyətindən ruhlanan jurnalistlərimiz də öz peşə borclarını ləyaqətlə yerinə yetirdilər. Azərbaycanın Birinci vitse-prezidenti Mehriban xanım Əliyevanın informasiya savaşında rolu və çağırışlarına, Prezident İlham Əliyevin işğaldan azad edilmiş rayonlara səfərləri zamanı çəkdiyi video və fotolarla erməni vəhşiliyini həm də öz sosial media hesablarında paylaşmasına və bu istiqamətdəki çoxsaylı fəaliyyətinə media orqanları xüsusi diqqət ayırdı, obyektivlik, yüksək peşəkarlıq və prinsipiallıq nümayiş etdirərək ölkə reallıqlarını bütün dünyaya çatdırdılar”.
Vüqar Rəhimzadə: “Müharibə zamanı Azərbaycan mediası vahid bir mövqedən çıxış etdi”
“İki sahil” qəzetinin baş redaktoru, Əməkdar jurnalist Vüqar Rəhimzadə “Bakı-Xəbər”ə açıqlamasında qeyd etdi ki, Azərbaycan mediası 44 günlük Vətən savaşında kifayət qədər aktivlik və peşəkarlıq nümayiş etdirdi: “Müharibə zamanı Azərbaycan mediası vahid bir mövqedən çıxış etdi. Ölkə başçısı İlham Əliyevin arxasında Azərbaycan ordusu, ölkə əhalisi, media cameəsi dəmir yumruq kimi dayandı. Ölkə mediası müharibə zamanı və ondan sonrakı dövrdə öz işini ləyaqətlə yerini yetirdi”.
V.Rəhimzadə onu da əlavə etdi ki, Azərbaycan jurnalistikası son illər uğurlu layihələrə imza atır.
Azər Həsrət: “Azərbaycan mediası 44 günlük Vətən müharibəsi dövründə və ondan sonrakı müddətdə də milli, dövlət maraqlarına xidmət etdi və etməkdə davam edir”
Vətən müharibəsində və ondan sonrakı dövrdə Azərbaycan mediasının öz işini necə icra etməsi ilə bağlı fikir bildirən media eksperti Azər Həsrət dedi ki, Azərbaycan mediası 44 günlük Vətən müharibəsi dövründə və ondan sonrakı müddətdə də milli, dövlət maraqlarına xidmət etdi və etməkdə davam edir: “Azərbaycan mediası bu sahədə öz üzərinə düşən işi yüksək səviyyədə icra etdi. Vətən müharibəsi dönəmində Azərbaycan mediası həqiqətən də ciddi şəkildə öz məsuliyyətini dərk elədi. Media nümayəndələri kifayət qədər yüksək səviyyədə istər cəbhə xəttində baş verənləri, istərsə də arxa cəbhədə baş verənləri informasiya müharibəsində geniş şəkildə işıqlandıraraq cəmiyyətə öz töhfəsini verdi. Jurnalistlərimiz, həqiqətən də, bu dönəmdə gecə-gündüz usanmadan çalışdılar. Əllərindən gələni etdilər ki, dünya qlobal səviyyədə Azərbaycan həqiqətlərini eşidə bilsin. Hesab edirəm ki, Azərbaycan mediası üzərinə düşənlərin öhdəsindən layiqincə gələ bildi”.
Günel CƏLİLOVA
