Erməni rəsmilərin ard-arda yalan danışmaları diqqəti cəlb edir. Onlar bu kimi açıqlamalarla dünya ictimaiyyətini aldatmaq istəyirlər.
Bu arada Ermənistan parlamentinin spikeri Alen Simonyan Almaniya Bundestaqının sədr müavini Katrin Görinq-Ekkardt ilə görüşdə bəyan etdi ki, guya ölkəsinin qonşularına heç bir ərazi iddiası yoxdur: “Ermənistan regionda sülh və sabitliyin bərqərar olması gündəliyinə sadiqdir. Ermənistan regional infrastrukturların və nəqliyyat marşrutlarının açılması, Azərbaycanla sərhədin delimitasiyası üçün səylər göstərir. Ermənistanın qonşularına heç bir ərazi iddiası yoxdur”.
Eyni gündə baş nazirin müavini Mqer Qriqoryan bəyan edib ki, Ermənistanla Azərbaycan arasında yol əlaqəsi məsələsində konsensus yoxdur: “Hazırda yalnız sovet dövründən qalan dəmir yolunun marşrutu ilə gedəcək Yerasx-Horadiz dəmir yolu ilə bağlı konsensusdan danışmaq olar. Digər yollar məsələsində hələ yekun razılıq əldə olunmayıb”. Halbuki, həmin bu M.Qriqoryan iyun ayında TASS agentliyinə müsahibəsində demişdi ki, Ermənistan və Azərbaycan sərhəd-gömrük nəzarətinin bir çox məsələlərində, habelə nəqliyyat vasitələrinin və yüklərin avtomobil, dəmir yolu ilə ərazilərdən təhlükəsiz hərəkəti ilə bağlı mövqelərini yaxınlaşdıra bilib. İndi isə tamam başqa bir şey deyir. Yollarla bağlı konsensusun olmadığını bəyan edir.
Görünən odur ki, Ermənistan hakimiyyətinin post-Qarabağ problemlərinin həllində dünyanı aldatmaq və vəziyyəti yanlış, ziddiyətli şərh etmək cəhdi davam edir. Yuxarıda iki erməni rəsmisinin açıqlamaları bir daha bunu sübut edir. Simonyan Almaniya Bundestaqının sədr müavinini aldadaraq əmin etməyə çalışır ki, guya Ermənistan regionda sülhün bərqərar olmasında və digər məsələlərdə maraqlıdır. Bu tərəfdən də M.Qriqoryan iyunda tərəflərin çox yaxın olduğunu deyirdi, indi isə konsensusun olmadığından bəhs edir. Bütün bunlar həm də Ermənistan hakimiyyəti içində dünyanı aldatmaq cəhdinin növbəti təzahürüdür. Eyni zamanda,bu, vəziyyəti ziddiyətli şərh etmək və qiymətləndirmək tendensiyasıdır. Əfsuslar olsun ki, Ermənistanın bu riyakar siyasəti hələ də davam edir.
“Bütün bunlar Azərbaycanla Ermənistan arasında vasitəçi olan tərəflərə inamı sarsıdır”
Sözügedən məsələ ilə bağlı fikirlərini “Bakı-Xəbər”lə bölüşən politoloq Tural İsmayılovun fikrincə, 2020-ci ilin 10 noyabrında imzalanan üçtərəfli bəyanatdan indiyə qədər Ermənistan üzərinə götürdüyü öhdəlikləri yerinə yetirmir: “Bununla bağlı 10 noyabr razılaşmasının üçüncü tərəfi olan Rusiya da Ermənistana ciddi təzyiqlər göstərmir. Avropa Şurasının moderatorluğu ilə bir neçə dəfə Brüsseldə görüşlər keçirilib, müəyyən anlaşmalar əldə edilib. Əfsuslar olsun ki, Avropa Şurası da Brüssel razılaşmasının müddüalarının yerinə yetirilməsi ilə bağlı Ermənistana hansısa ciddi təzyiqlər etmir. Bu da, öz növbəsində, hər dəfə Ermənistan rəsmilərinin yalan bəyanatlarla çıxış etməsinə zəmin yaradır. Bütün bunlara görə isə hansısa məsuliyyət daşımırlar. Ermənistan parlamentinin spikeri A.Simonyan həyasızcasına deyir ki, ölkəsinin qonşularına heç bir ərazi iddiası yoxdur. O zaman bir belə həngamə nə deməkdir? Niyə üzərlərinə götürdükləri öhdəlikləri yerinə yetirmirlər? Erməni rəsmilərin riyakarlığına Rusiya və Qərbin göz yumması qarşı tərəfin həyasızlığına rəvac verir. Bütün bunlar Azərbaycanla Ermənistan arasında vasitəçi olan tərəflərə inamı sarsıdır. Qarabağda az sayda erməni yaşayır, amma əfsuslar olsun ki, vasitəçi tərəflər məsələnin birdəfəlik həllinə səy göstərmir”.
Politoloq onu da əlavə etdi ki, qarşı tərəf nəticə çıxarmasa, üçüncü Qarabağ müharibəsinin nəticələri Ermənistan üçün daha dağıdıcı olacaq.
Vidadi ORDAHALLI
