Azərbaycanda jurnalistlər güzəştli şərtlərlə ipoteka krediti almaq hüququ olan şəxslər siyahısına əlavə olunub. Bu, Prezident İlham Əliyevin imzaladığı fərmanla “Azərbaycan Respublikası İpoteka və Kredit Zəmanət Fondunun vəsaiti hesabına ipoteka kreditinin, o cümlədən güzəştli ipoteka kreditinin verilməsi Qaydası”nda edilən dəyişiklikdə əksini tapıb.
Dəyişikliyə əsasən, gənc ailənin üzvü olub, 5 illik jurnalist stajına malik olub Media Reyestrinə daxil edilmiş şəxslər, eyni zamanda ən azı 15 il jurnalist işləyən və Media Reyestrinə daxil edilmiş şəxslər də güzəştli ipoteka kreditindən istifadə etmək hüququna malik olacaqlar.
Məlumdur ki, son illər media sahəsində islahatlar aparılır. Media sahəsində görülən işlərdən biri də jurnalistlərin güzəştli şərtlərlə ipoteka kreditindən yararlanmasıdır.
Qeyd edək ki, jurnalistlərin güzəştli ipoteka əldə edən vətəndaşlar sırasına daxil edilməsi böyük uğurdur. Məlumdur ki, indiyə qədər jurnalistlər ipoteka və ya sosial evlərdən yararlanmaq istəyərkən çətinliklə üzləşirdilər. Bu məsələnin qanunla təsbit olunması onu deməyə əsas verir ki, media əhli güzəştli ipotekadan istifadə etməklə mənzil sahibi olacaq. Gənc jurnalistlərin əksəriyyəti evsizlikdən əziyyət çəkirdi. Mənzili olmadığı üçün ailə qura bilməyən jurnalistlər yetərincədir. Bu dəyişiklik jurnalistlərin ev problemini həll edəcək.
“Cəmi 4 faizlə ev ala bilmək şansı yarandı və burada həm uzun illər mediada çalışmış şəxslərin, həm də gənclərin nəzərə alınması sevindiricidir”
“Novoye vremya” qəzetinin baş redaktoru Şakir Ağayev “Bakı-Xəbər”ə açıqlamasınfda qeyd etdi ki, jurnalistlərin sosial vəziyyətinin yaxşılaşması üçün Medianın İnkişafı Agentliyi media nümayəndələrinin güzəştli şərtlərlə ipoteka şərtlərindən yararlanmasına çalışır. Artıq bu istiqamətdə müəyyən işlər görülür, inşallah sentyabrdan jurnalistlər güzəştli şərtlərlə ipoteka ilə mənzil sahibi olacaq: “Evi olmayan, ailə qurmaq istəyən gənc jurnalistlər bu haldan istifadə edə biləcək. Məlumdur ki, jurnalistlərin çoxu kirayədə yaşayır. Xüsusilə peşəmizin gəncləri. Elə mexanizm tapmaq lazımdır ki, onun hər ay ödədiyi o vəsait havaya getməsin. Öz evinə ödəsin. Həm də daha az miqdarda. Ona görə bu yeniliyi müsbət dəyərləndirirəm. Ümumiyyətlə, Media Reyestrinə daxil edilmiş şəxslər güzəştli ipoteka şərtlərindən yararlana bilər. Beləliklə, cəmi 4 faizlə ev ala bilmək şansı yarandı və burada həm uzun illər mediada çalışmış şəxslərin, həm də gənclərin nəzərə alınması sevindiricidir. Yəni heç kim kənarda qalmır, nə narazılıq olur, nə də inciklik. 5 il jurnalist kimi işlədikdən sonra mənzil probleminin həlli imkanı yaranır”.
Günel CƏLİLOVA
