Media haqqında yeni qanunda çağdaş jurnalistikanın bir sıra prinsipial yenilikləri ilk dəfə hüquqi cəhətdən təsbit olunub. Bu sənəddə indiyə qədər mövcud olmuş KİV haqqında qanunvericilikdə əksini tapmamış yeni müddəalar da yer alıb. Media haqqında qanunun yeniliklərindən biri də media reyestrinin yaradılmasıdır.
Media reyestrinin yaradılması ilə bağlı bu günlərdə Medianın İnkişafı Agentliyinin icracı direktoru Əhməd İsmayılov ASAN Radionun "QəbuldASAN" verilişində bu məsələyə toxunub. Ə.İsmayılov bildirib ki, Media Reyestrinin fəaliyyətə başlaması üçün normativ hüquqi bazanın formalaşması artıq təmin olunub və layihələr təqdim olunub: “Müvafiq ekspertizalar həyata keçirildikdən sonra təsdiq edilməsi üçün aidiyyəti üzrə təqdim olunacaq. Biz paralel şəkildə media reyestrinin texniki tapşırığını hazırladıq. Bu, ASAN Xidmətlə birlikdə həyata keçirilir. Qarşılıqlı əməkdaşlıq nəticəsində texniki tapşırıq yekunlaşıb, layihə icra səviyyəsindədir. Proqram təminatı qurulmalıdır. Media Reyestri elektron hökümətə ineqrasiya olunmuş şəkildə fəaliyyət göstərəcək. Bunun üçün artıq işlərin bir çox hissəsi görülüb. Proqram təminatı yekunlaşdıqdan sonra ictimaiyyətə məlumat veriləcək”.
Artıq Media Reyestrinin yaradılması reallığa çevrilir. Bu iş ölkədə media mənafeyinin daha yüksək səviyyədə qorunmasında necə rol oynacaq?
Vüsal Məmmədov: “Media Reyestrinin ən böyük faydası odur ki, jurnalist olanlarla olmayanları, özü özünü "jurnalist" elan edənləri, qələm uzurpatorlarını ayırd etmək mümkün olacaq”
“AzVision.az" saytının baş redaktoru Vüsal Məmmədov bildirdi ki, Media Reyestrinin ən böyük faydası o olacaq ki, jurnalist olanlarla olmayanları, özü özünü "jurnalist" elan edənləri, qələm uzurpatorlarını ayırd etmək mümkün olacaq. Bundan sonra jurnalistikanın təmizlənməsi və inkişafı prosesi başlayacaq: “İndiki vəziyyətdə jurnalistika “çəmənliyini” alaq otları o dərəcədə basıb ki, onları təmizləmədən çiçəkləri böyütmək mümkün deyil”.
Vasif Həsənli: “Reyestrin formalaşmasından sonra jurnalistlər üçün əlavə imkanlar yaranacaq, o cümlədən, “reket jurnalistika” problemindən xilas ola biləcəyik”
“Demokrat.az” xəbər portalının baş redaktoru Vasif Həsənli bildirdi ki, Azərbaycanda söz və məlumat azadlığının, plüralizmin və medianın iqtisadi müstəqilliyin əsasını məhz ulu öndər Heydər Əliyev qoyub. Ulu öndərin dəstəyi nəticəsində milli mətbuatımızın peşəkar fəaliyyətinin təməlləri atıldı. Bu siyasəti davam etdirən Prezident İlham Əliyev isə medianın inkişafını yeni mərhələyə daşıdı: “Danılmaz faktdır ki, Azərbaycan mediası artıq informasiya müharibəsinin aparıcı oyunçusuna çevrilib. Milli mətbuatımız beynəlxalq platformalarda uğurla təmsil olunur və bütün bunlarla yanaşı, ölkə mediasında yayımlanan informasiya təkcə Azərbaycan ictimai rəyinə yox, beynəlxalq ictimai rəyə də təsir edir. Son il yarım ərzində medianın inkişafı ilə bağlı silsilə layihələr həyata keçirilir. Bu sahədə görülən işlərdən ən əsası Media Reyestrinin formalaşdırılmasıdır. Avropa ölkələrində geniş istifadə olunan təcrübələrə əsasən yaradılacaq Media Reyestrinin formalaşdırılması, proqram təmninatının hazırlanması üzərində hazırda iş davam etdirilir. Həmçinin, Reyestr Elektron Hökumət İnformasiya Sisteminə inteqrasiya olunacaq. Bu Reyestrin formalaşmasından sonra jurnalistlər üçün əlavə imkanlar yaranacaq, o cümlədən, “reket jurnalistika” problemindən xilas ola biləcəyik”.
Günel CƏLİLOVA
