Məlum olduğu kimi, Prezident İlham Əliyev Avropa Parlamentinin Xarici Əlaqələr Komitəsinin sədri Devid MakAlisterin başçılıq etdiyi nümayəndə heyətini qəbul edib. Görüşdə bir sıra məsələlər müzakirə olunub.
Prezident İlham Əliyev görüşdə Avropa Parlamentinin Azərbaycana qarşı qərəzli mövqe tutmasını tənqid edib: “Siz Avropa Komissiyasının Prezidenti xanım Ursula Fon der Lyayenin dünənki səfəri haqqında yəqin məlumatlısınız. Bizim çox yaxşı müzakirələrimiz oldu. Bu, Azərbaycanla Avropa İttifaqı arasında ikitərəfli münasibətlərin əhəmiyyətini bir daha vurğulayır. Eyni zamanda, Avropa İttifaqı Şurasının Prezidenti cənab Şarl Mişel Azərbaycan ilə Ermənistan arasında münasibətlərin normallaşdırılması prosesinə fəal şəkildə cəlb olunub. O, artıq Ermənistan və Azərbaycan rəhbərlərinin və özünün iştirakı ilə üç üçtərəfli görüşə ev sahibliyi edib. Beləliklə, bu çox müsbət kontekstdir. Lakin bunu nəzərə alaraq, biz Avropa Parlamentinin hərəkətlərini başa düşə bilmirik. Əslində, Avropa Parlamenti Ermənistan parlamenti ilə müqayisədə Azərbaycana qarşı daha çox aqressivdir. Bəzən elə gəlir ki, bu qətnamələri Ermənistan parlamenti qəbul edir və ya ola bilsin, bəzi erməni lobbi qruplarının onların üzərində müəyyən təsiri var. Əks halda, bunu başa düşmək çox çətindir”.
Məsələ ondadır ki, ümumən Azərbaycanın Avropa İttifaqı ilə münasibətləri normaldır. O baxımdan Prezidentin bu çıxışı heç də Azərbaycanın Avropa İttifaqı ilə əməkdaşlığı qaralaması kimi başa düşülməməlidir. Çünki Avropa Komissiyası ilə, Avropa İttifaqı Şurasının Prezidenti Şarl Mişellə münasibətlər normaldır. Münasibətlərin normal olmasının nəticəsi idi ki, Azərbaycanla Avropa Komissiyası arasında saziş imzalandı. Tərəflər arasında iqtisadi əlaqələrin genişləndirilməsi prioritetdir. Sadəcə, Avropa Parlamentində bir qrup adam var ki, onlar təsir altında Aİ ilə Azərbaycanın münasibətlərini zorlamağa çalışırlar. Ona görə də Avroparlamentdə sözügedən qrup zərərsizləşdirilməlidir ki, münasibətlərə xələl gəlməsin.
Maraqlıdır, həmin qrupu necə zərərsizləşdirmək olar?
“Avroparlamentdə Azərbaycanın maraqlarını qoruyan lobbi qrupları yaratmalıyıq”
Məsələyə münasibət bildirən Aydınlar Partiyasının sədri Qulamhüseyn Əlibəylinin fikrincə, Avropa Parlamentində Azərbaycana qarşı olan qrupları neytrallaşdırmaq üçün bir sıra işlər görmək lazımdır: “Onların münasibətini dəyişmək üçün müəyyən tədbirlər görmək lazımdır. Ən azından, Azərbaycana qarşı olan deputatlarla daimi əlaqə saxlamaq lazımdır. Nəinki bizim səfirlik təmsilçilərimiz, həm də QHT-lər, siyasi partiya təmsilçiləri onlarla əlaqə saxlamalıdır. Azərbaycan haqqında məlumat verməlidilər. Düzdür, Azərbaycanda müəyyən problemlər var. Avroparlamentin həmin üzvləri bu problemlərdən sui-istifadə etməyə çalışırlar. O üzdən, sui-istifadəyə əsas verən məlum problemləri aradan qaldırmaq lazımdır. Avropa Parlamentində Azərbaycanla bağlı qərəzli qətnamələrin qəbulunda erməni təbliğatının da rolu böyükdür. Bu üzdən Avroparlamentdə Azərbaycanın maraqlarını qoruyan lobbi qrupları yaratmalıyıq. Mütəmadi olaraq onlarla təmasda olmalıyıq. Hesab edirəm ki, bütün bunlardan sonra qərəzli qərarların qəbul olunmasını önləmək olar. Onu da nəzərə almaq lazımdır ki, Avroparlamentin qətnamələri bir sıra hallarda hüquqi qüvvəyə malik deyil. Avropa İttifaqının siyasətini bütövlükdə Avropa Komissiyası müəyyən edir. Avropa Komissiyasının da bu gün Azərbaycanla bağlı xeyli müsbət addımları var. Hesab edirəm ki, bunu davam etdirmək lazımdır”.
Bir sözlə, partiya sədri hesab edir ki, qərəzli qətnamələrin qəbul olunmasını önləmək üçün təbliğat-təşviqat işini gücləndirmək lazımdır.
Vidadi ORDAHALLI
