Erməni mətbuatı yazır ki, deputat Hayk Mamicanyan Bakıya gəlmək istəyir. "Mənim qürurum var” fraksiyasının rəhbəri olan Mamicanyan arzusunu reallaşdırmaq üçün Azərbaycan Milli Məclisinin sədri Sahibə Qafarovaya müraciət etmək fikrindədir.
O, jurnalistlərə açıqlamasında qeyd edib ki, müraciətin mətni də artıq hazırdır:
"Azərbaycan Milli Məclisinin sədrinə rəsmi müraciət ünvanlayıb, Azərbaycanda həbsdə olan soydaşlarımızı (erməni terrorçular-red.) görmək, onların sağlamlıq durumu və saxlanma şəraiti ilə tanış olmaq üçün səfər təşkil etməyi xahiş edəcəm. Mən məktubla və səfərimlə bağlı MDB, Avropa Şurası və Avropa Parlament Assambleyalarının prezidentlərini, həmçinin ATƏT-in Minsk Qrupunun həmsədr ölkələrinin Ermənistandakı səfirlərini də məlumatlandıracağam”. Erməni deputatın Azərbaycanda hansısa təftiş keçirməsinə ehtiyac varmı?
Müstəqil siyasətçi Bünyamin Qəmbərli “Bakı-Xəbər”ə açıqlamasında bildirdi ki, erməni deputatın Azərbaycana gəlib burda saxlanılan terrorçularla maraqlanmaq istəməsində qeyri-adi bir şey yoxdur: “Bununla bağlı onun parlamentin sədrinə müraciət etməsi də normaldır. Biz istəsək də, istəməsək də belə gediş-gəlişlər olacaq. Hər iki tərəfin bir-birinin ərazisində olan vətəndaşları ilə maraqlanmasında zərərli nəsə görmürəm. Amma bu deputatın məhz indiki halda Azərbaycan ərazisində terror tötətməkdə təqsirli bilinən ermənilərlə maraqlanmaq istəməsi olduqca maraqlıdır. Yaxşı olardı ki, bundan əvvəl Mamicanyan birinci Qarabağ savaşında Ermənistanda əsir kimi saxlanılan 4 min azərbaycanlının taleyi ilə maraqlansın. Bura gəlməzdən əvvəl həmin 4 min adamdan heç olmasa 400 nəfərinin taleyi ilə bağlı bir məlumat versin. Bundan sonra gəlib öz terrorçuları ilə maraqlana bilər. Yaxşı olar ki, deputat bununla bağlı Qırmızı Xaç Cəmiyyətinə müraciət etsin. Onlarda erməni terrorçuların necə və hansı şəraitdə saxlandığı ilə bağlı məlumatlar var. Mən bunu ermənilərin növbəti təxribat cəhdi hesab edirəm. İndi də buradakı terrorçularla manipulyasiya edirlər. Azərbaycan buna icazə versə, gəlib-gedəndən sonra həqiqətə uyğun olmayan fikirlər işlədəcəklər. İcazə verməsə isə, bunu insan haqlarına olan hörmətsizlik kimi qabardacaqlar. İstənilən halda burada səmimiyyət yoxdur”.
Məhəmmədəli QƏRİBLİ
