Iyulun 19-dan əhalinin ilk qrupunun Zəngilanın Ağalı kəndinə köçürülməsinə başlanıb. Qeyd edək ki, proses 4 mərhələdə həyata keçiriləcək. Prosesin birinci mərhələsində 40-dan çox ailənin Ağalıya köçürülməsi planlaşdırılıb. Onlar arasında orta yaşlı sakinlər üstünlük təşkil edir. Vətəndaşların məşğulluq, sosial, təhsil, tibbi məsələləri müvafiq qurumlar tərəfindən təmin olunacaq.
Kənddə reallaşdırılan layihənin icrası yaşayış, istehsal, sosial xidmətlər, "ağıllı kənd təsərrüfatı", alternativ enerji sahələri üzrə həyata keçirilib. Ağalıda inşa olunan 200 evdən ibarət kəndin enerjiyə olan tələbatı yalnız alternativ enerji mənbələrindən əldə ediləcək. Kənddə DOST Agentliyinin "Şərqi Zəngəzur və Qarabağ" proqramı çərçivəsində "Smart DOST" xidmət məntəqəsi də fəaliyyətə başlayacaq. Ağalıda "Dost Aqropark" fəaliyyət göstərəcək.
Onu da bildirək ki, kənddə sakinlərin rahatlığı üçün hər cür şərait yaradılıb. Ağalı kənd meydanında otuz ilə yaxın müddətdə işğal altında qalan əzəli torpaqlarda sülhün əbədi gerçəkləşdirilməsini təcəssüm etdirən göyərçin abidə-fəvvarə kompleksi ucaldılıb. Qəsəbədə, eyni zamanda, “Azərpoçt” MMC-nin rayon şöbəsi, “ASAN xidmət” və DOST, həmçinin Kiçik və Orta Biznesin İnkişafı mərkəzləri təsis olunub.
Bir sözlə, Ağalıda yaşayacaq sakinlərin rahatlığı üçün hər bir şərait yaradılıb.
Sakin Allahverdi Məmmədov: “Hisslərimi sözlə ifadə edə bilmirəm, çox qürurluyam”
Zəngilanın Ağalı kəndinə köçən Allahverdi Məmmədov təəssüratlarını bizimlə bölüşdü: “Bu gün 41 ailə öz doğma torpağına geri qayıdır. Onlardan biri də mənəm. Mərhələli şəkildə bütün ailələr köçəcək. Bu sevinci bizə yaşatdığı üçün Ali Baş Komandana təşəkkür edirik, şəhidlərimizə Allah rəhmət etsin, qazilərimizə can sağlığı arzulayıram. Öz torpağıma geri qayıtdığım üçün inanılmaz sevincliyəm. Allaha çox şükürlər olsun ki, bizə bu böyük günü qismət etdi. Hisslərimi sözlə ifadə edə bilmirəm, çox qürurluyam”.
Ağalı sakini onu da əlavə etdi ki, yaşadığı hissi ancaq onu yerində olanlar anlayar: “Çünki 30 ilə yaxın müddətdə elimizdən, obamızdan ayrı düşmüşdük. Bu anları yaşamaq olduqca ağır idi. Buna baxmayaraq, tarixi ədalət bərpa olundu. Prezident İlham Əliyevin rəhbərliyi ilə Azərbaycan Ordusu torpaqlarımızı erməni işğalından azad etdi”.
İmamverdi İsmayılov: “Belə bir qüruru ifadə etmək həqiqətən çətindir”
Zəngilanlı deputat İmamverdi İsmayılov "Böyük Qayıdış"ın ilk mərhələsi haqqında bildirdi ki, ölkə başçısının uzaqgörən siyasəti və rəşadətli Ordumuzun məharəti nəticəsində 30 il düşmən tapdağı altında qalan torpaqlarımız erməni tapdağından azad olundu: “Hazırda işğaldan azad olunan Zəngilan rayonunun Ağalı kəndinə qayıdış başlayıb. Bu, 44 günlük Zəfər tariximizin bizə bəxş etdiyi Böyük Qayıdış imkanının ilk mərhələsidir və tariximizə qızıl hərflərlə yazılır. Ata-baba torpaqlarından didərgin salınan, dəhşətli faciələrin bir addımlığından can qurtaran, illərlə məcburi köçkün adını öz çiyinlərində ağır yük kimi daşıyan insanlar bu gün doğma torpaqlarına qayıdırlar. Belə bir qüruru ifadə etmək həqiqətən çətindir. Biz Vətən müharibəsindən sonra Müdafiə Nazirliyimizin azad edilmiş ərazilərdən yaydığı kadrlara ürək ağrısı ilə baxırdıq. O kadrlarda zəngilanlıların, qarabağlıların, bütün Azərbaycanın ağrı-acısı əks olunmuşdu. 30 ilə qədər düşmən tapdağında qalan torpaqlarımızı, bizim arxamızda qoyduğumuz evlərimizi, şəhərlərimizi, kəndlərimizi düşmən viran etmişdi. Çox qısa müddətdə həmin ərazilərdə dünyada analoqu olmayan bir kənd salındı. Cənab Prezidentin şəxsən tapşırığı və nəzarəti ilə həyata keçirilən quruculuq işlərinin ilkin nəticəsi ortadadır. Zəngilanlıların öz doğma yurd-yuvasına qayıdışı bütün Azərbaycanın sevinci, hətta ikinci Zəfər bayramıdır. Mən öz adımdan, bütün Zəngilan və Ağalı kəndinin sakinləri adından bir daha Prezident İlham Əliyevə təşəkkürümü bildirirəm. Düşünürəm ki, əsrlər keçsə belə, Azərbaycan Ordusunun şücaəti, qazandığımız şanlı Zəfərimiz, bu Zəfərin müəllifi olan Müzəffər Ali Baş Komandan və Ordumuz unudulmayacaq. Torpaqlarımızın azad olunması uğrunda canından keçən bütün şəhidlərimizə Allahdan rəhmət diləyirik, qazilərimizə şəfa arzu edirik. Bu gün onların sayəsində dədə-baba yurdumuza qayıda bildik”.
Günel CƏLİLOVA
