Az əvvəl Rusiyanın Xİ naziri Lavrov Azərbaycanla Ermənistan arasında kommunikasiyaların açılması üzrə baş nazirlərin müavinləri səviyyəsində yaradılmış işçi qrupun Moskvadakı danışıqları barədə belə fikir işlətmişdi ki, Zəngəzur dəhlizində dəmiryolunun açılması razılaşdırılıb, avtomobil yolunun isə marşrutları dəqiqləşdirilir.
Bunu “Bakı-Xəbər” Media Qrupunun rəhbəri, politoloq Aydın Quliyev öz Facebook səhifəsində yazıb.
A.Quliyev yazır ki, Lavrov bu il iyunun 3-də Moskvada olmuş iclası nəzərdə tuturdu: “Sonra Rusiya XİN-in ayrıca bir açıqlaması da oldu ki, konkret detallar müzakirə olunur və nəticələr olan kimi bəyan olunacaq. Rusiya XİN rəsmisi isə həmin komissiyanın 20 iyun Moskva iclasını nəzərdə tuturdu. Hər iki açıqlamadan belə görünürdü ki, Zəngəzur dəhlizi ilə Naxçıvana yolun açılması elə bu anlarda baş tutacaq... Ancaq yox...
Prezident İlham Əliyev bizim üçün daha etibarlı mənbə olduğundan onun üç gün əvvəl dedikləri daha mötəbər məlumatlar sayılmalıdır və sayılır da... İlin 6 ayının yekunlarına dair müşavirədə Prezidentin söylədiklərini bir də izləyin. Prezident dedi ki, Zəngəzurdakı dəmiryolunun texniki-iqtisadi əsaslandırması hələ başlamayıb və bu iş azı bir neçə ay vaxt aparan işdir.
Texniki-iqtisadi əsaslandırma aparılandan sonra dəmiryolunun çəkilişinə başlanması da böyük vaxt aparacaq. Demək, Prezident əsaslı olaraq dedi ki, Ermənistanda bu istiqamətdə bir iş görüldüyünü hələ görmürük. Sonra Prezident Zəngəzurda avtomobil yolunun da məsələsinə toxundu. İroniya ilə dedi ki, orada nə qədər marşrut ola bilər ki?! Cəmi 40 neçə km yoldur, həm də ilin bütün gün və saatlarında işləyə biləcək marşrutlar da çox deyil... Üstəlik, hələ bu günə kimi Azərbaycana heç bir marşrutun layihəsi verilməyib. Demək, Prezident çox haqlı qənaətə gəldi ki, Ermənistan Naxçıvanla kommunikasiyalarla əlaqəli 10 noyabr öhdəliyini də icra etmək istəmir. Bu, Prezident Əliyevin arqumentli qənaətləridir.
Bizim isə mühakiməmiz budur ki, Ermənistan öz öhdəliyini icra etmir, Rusiya XİN yanlış və azdırıcı bəyanatlar verir...”
