Azərbaycan son 30 ildə dünyada, sözün əsl mənasında, tam müstəqil siyasət yürüdərək, siyasi dəst-xətti, dövlətçilik siması, tərəqqi yolu ilə nüfuz qazanıb, milli inkişaf strategiyasını, siyasi-iqtisadi, mədəni-mənəvi təkamül konsepsiyasını, vahid ideologiyasını uğurla formalaşdırıb.
Dövlətimizin milli maraqlara əsaslanan diplomatiyası, demokratikləşdirmə, hüquqi prinsiplərin reallaşdırılması istiqamətlərində ardıcıl və məqsədyönlü fəaliyyəti də məhz milli müstəqilliyin praktik olaraq tam gerçəkləşdirilməsini təmin edib. Ulu Öndər Heydər Əliyevin Azərbaycanda siyasi hakimiyyətə qayıdışından sonra ölkəmiz çoxşaxəli, balanslaşdırılmış xarici siyasət kursuna önəm verərək, beynəlxalq aləmə uğurla inteqrasiya olunub. Region və dünya ölkələri ilə səmimi, qarşılıqlı hörmətə, əməkdaşlığa əsaslanan çoxtərəfli əlaqələr qurub.
“Dünyada ölkəmizin tərəfdaşlarının sayı getdikcə artır”
Möhkəm təməl üzərində yaradılan güclü iqtisadi potensial, toplanmış maliyyə resursları, cəmiyyət həyatının bütün sahələrinin dinamik tərəqqisi, enerji, ərzaq təhlükəsizliyi kimi məsələlərin uğurla həlli Azərbaycana tam müstəqil, milli maraqlara hesablanan xarici siyasət yürütməyə imkan verir. Prezident İlham Əliyevin reallaşdırdığı xarici siyasət kursunun həyata keçirilməsi nəticəsində dünyada ölkəmizin tərəfdaşlarının sayı getdikcə artır. Azərbaycan regionun aparıcı ölkəsi kimi çıxış etməklə bərabər, beynəlxalq arenada mövqeyi nəzərə alınan söz sahibinə çevrilmiş, qlobal məsələlərin həllinə cəlb olunub. Beynəlxalq təşkilatlarda Azərbaycan ciddi söz sahibidir. Azərbaycan həm beynəlxalq, həm də regional müstəvidə uğurlu əməkdaşlıq platformalarında təmsil olunur. 2019-cu ildən Azərbaycan Qoşulmama Hərəkatına rəhbərlik edir. Ölkəmizə olan hörmətin nəticəsidir ki, Azərbaycan gələn il də Hərəkata sədrlik edəcək.
“Yeni önəmli addımlar atılıb və Azərbaycanın beynəlxalq nüfuzu daha da artıb”
Prezident İlham Əliyevin sədrliyi ilə iyulun 15-də bu ilin altı ayının yekunlarına həsr olunan müşavirə keçirildi. Müşavirədə ölkə başçısı Azərbaycanın xarici siyasəti ilə bağlı bir sıra məqamlara toxundu. Prezident İlham Əliyev xüsusi vurğuladı ki, bu il bizim xarici siyasətimiz çox fəal olub: “Yeni önəmli addımlar atılıb və ölkəmizin beynəlxalq nüfuzu daha da artıb. Nəticələr arasında, əlbəttə ki, Qoşulmama Hərəkatındakı uğurlu sədrliyimizi qeyd etmək istərdim. Bizim sədrliyimiz bildiyiniz kimi, 2023-cü ilə qədər yekdil fikirlə bir il uzadılıb. Bu, onu göstərir ki, ölkəmiz 120 ölkə arasında çox böyük nüfuz qazanmışdır və bizə olan inam bu illər ərzində daha da artmışdır. Biz də məsuliyyətli ölkə olaraq və Qoşulmama Hərəkatının fəal sədri olaraq bu təsisatın institusional inkişafına da böyük töhfə vermişik. Önəmli addımlardan biri bu il Bakıda keçirilmiş Qoşulmama Hərəkatının Parlament Şəbəkəsinin toplantısı və Parlament Şəbəkəsinin yaradılması idi. Bakıda keçirilmiş bu önəmli tədbir bir daha göstərdi ki, bu Hərəkatın çox böyük potensialı var, həmrəyliyi dərinləşdirmək, əməkdaşlığı genişləndirmək və qarşılıqlı beynəlxalq dəstək üçün bu, çox önəmli platformadır. Bu, bizim təşəbbüsümüz idi və bu təşəbbüs artıq özünü real həyatda göstərir. Eyni zamanda, Gənclər Platforması da yaradılır. Gənclər forumu keçiriləcək və Qoşulmama Hərəkatının Gənclər Şəbəkəsi yaradılacaqdır”.
“Türk dövlətləri ilə əlaqələr prioritet məsələlərdən biridir”
Ölkə başçısı qeyd edib ki, digər beynəlxalq təşkilatlarla da fəal əməkdaşlıq aparılıb: “Bu yaxınlarda İslam Əməkdaşlıq Təşkilatının yeni Baş katibi Azərbaycana səfər etmişdir. Biz bu təşkilatla çox fəal əməkdaşlıq edirik. Əslində, biz bu təşkilatın çox fəal üzvüyük və bizim təşəbbüsümüzlə Azərbaycanda bir çox tədbirlər keçirilmişdir. Bu il Avropa İttifaqı ilə fəal əməkdaşlıq aparılmışdır. Bildiyiniz kimi, biz yeni saziş üzərində işləyirik. Sazişin böyük hissəsi razılaşdırılıb və razılaşdırılmamış məsələlər də müzakirə olunur. Avropa İttifaqı-Azərbaycan əlaqələrinin gələcək inkişafı ilə bağlı geniş müzakirələr aparılır. Yaxın günlərdə Avropa İttifaqı ilə Azərbaycan arasında önəmli sənəd - enerji təhlükəsizliyi ilə bağlı sənəd imzalanacaq və bizim əməkdaşlığımızı daha yüksək səviyyəyə qaldıracaqdır. Digər beynəlxalq təşkilatlarla da fəal əməkdaşlıq aparılıb. Əlbəttə, Türk Dövlətləri Təşkilatı çərçivəsində Azərbaycan hər zaman fəallıq göstərmişdir və həm təşkilat çərçivəsində, həm üzv ölkələr arasında təmaslar genişlənir. Türk dövlətləri ilə əlaqələrimiz bizim üçün prioritet məsələlərdən biridir və həm siyasi dəstək qarşılıqlı surətdə ifadə olunur, önəmli layihələr üzərində müzakirələr aparılır - həm ikitərəfli, həm çox tərəfli formatda. Qonşu ölkələrlə əlaqələrimiz hər zaman bizim üçün əsas prioritetlərdən biri olub və bu il bu istiqamətdə addımlar atılıb – mənim Rusiya, İran, Gürcüstan prezidentləri ilə görüşlərim bir daha bunu göstərir. Eyni zamanda, Amerika-Azərbaycan əlaqələrinin inkişafı istiqamətində önəmli addımlar atılmışdır, yüksəkvəzifəli şəxslərin qarşılıqlı səfərləri təşkil edilmişdir”.
“Bütün bu uğurların kökündə müstəqil siyasət dayanır”
Məsələyə münasibət bildirən AMİP funksioneri Əli Orucovun fikrincə, Azərbaycan beynəlxalq və regional müstəvidə uğurlu inteqrasiya siyasəti aparır: “Fikrimcə, bütün bu uğurların kökündə müstəqil siyasət dayanır. Məsələ ondadır ki, Azərbaycan hansısa hərbi bloklarda təmsil olunmur. Ölkələrlə bərabər tərəfdaşlığa önəm verir. Bu səbəbdən regional və beynəlxalq çərçivədə əməkdaşlıq alınır. Azərbaycan Avropa İttifaqı ilə əməkdaşlıq edir. O cümlədən, 3+3 formatını fəal şəkildə dəstəkləyir. Azərbaycanda müxtəlif məzmunlu beynəlxalq tədbirlər keçirilir. Müşahidələr göstərir ki, aparılan siyasət nəticə etibari ilə uzlaşmaya xidmət edir. Bu, hansısa konfrantasiyaya gəturib çıxarmır. Bu baxımdan dünya birliyinə inteqrasiyanı müsbət dəyərləndirirəm”.
Vidadi ORDAHALLI Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
