ABŞ Mərkəzi Kəşfiyyat İdarəsinin (CIA) direktoru Vilyam Börns Ermənistanın paytaxtı İrəvanda səfərdədir. Bu barədə erməni mediası məlumat yayıb. Məlumata görə, onun yüksək səviyyəli görüşlər keçirməsi planlaşdırılır. V.Börnsün səfəri ilə bağlı ABŞ-ın Ermənistandakı səfirliyi heç bir açıqlama yaymayıb. Ermənistandakı siyasi analitiklər hesab edir ki, CİA direktorunun Ermənistana səfəri təsadüfi xarakter daşıya bilməz.
Qeyd edilir ki, belə bir səfər 1994-cü ildə də olub. Həmin vaxt da Erənistana səfər edən CİA rəhbəri bu ölkənin başçısı ilə görüşüb və ondan Yaxın Şərqlə bağlı konkret xahiş edib. Maraqlıdır ki, Rusiya bu səfərə sakit yanaşır, heç bir narahatlığını ifadə etmir. Bütün bu baş verənləri necə xarakterizə etmək olar?
Təhlükəsizlik qurumlarının sabiq əməkdaşı Elşən Həsənov “Bakı-Xəbər”ə açıqlamasında bildirdi ki, ABŞ xəfiyyə başçısının Ermənistana səfəri təsadüfi xarakter daşımır: “Ermənistan səfəri, yəqin ki, müəyyən mənada İranda baş tutacaq üçtərəfli görüşün nəticələri haqqında daha dolqun məlumatın əldə edilməsi baxımından əhəmiyyətlidir. Bildiyimiz kimi, Ermənistan kəşfiyyat sahəsində əsasən Türkiyə istiqamətində fəaliyyət göstərir. Lakin onun İranda da külli miqdarda məlumat mənbəyi var. İndiki həssas məqamda İrandaxili vəziyyət Qərbi və əsasən də İsrail dövlətini əsas hədəflərdən biri edir. Buna görə də, ABŞ-ın Ermənistan vasitəsilə İran barədə məlumat əldə etmək istəyi də təbiidir.
Bundan savayı, alternativ olaraq Avropaya qaz ixrac edəcək Azərbaycan tərəfi üçün qarant kimi tövsiyələr ola bilər. Hər halda, maraq kəsb edən hadisədir. Səfər zamanı gəlmiş nümayəndə heyətinin tərkibi haqqında məlumat olsaydı, mənzərəyə bir az da aydınlıq gətirmək olardı. Erməni ekspertlərin səfərlə bağlı söylədiyi fikirlər məsələyə birtərəfli baxışı əks etdirir və bu onların subyektiv fikridir. Düzdür, istər Azərbaycan-Ermənistan, istərsə də Türkiyə-Ermənistan arasındakı münasibətlərin normallaşması regionda vəziyyətin sabitləşməsi baxımından mühüm əhəmiyyət kəsb edən məsələlərdəndir. Amma yaddan çıxarmaq lazım deyil ki, İranın nüvə silahı əldə etməsi istiqamətində atılan addımların bir addımlığında olduğu bir zamanda yuxarıda söylədiyim münasibətlər prioritet təşkil edəcək. Yəni İran mövzusu ABŞ və müttəfiqləri, eləcə də region dövlətləri üçün ilk növbədə həllini tapması vacib olan məsələdir.
Digər addımlar - Rusiyanın Ermənistan üzərində təsir qüvvəsinin azaldılması və onun ümumiyyətlə Qafqazdan sıxışdırılıb çıxarılması sonrakı mərhələlərə aid olan məsələlərdəndir. Amma bu da danışıqlar mövzusunu təşkil edən elementlər siyahısına daxil ola bilər. Rusiyanın bu səfərə seyrçi qaldığını deyə bilmərik. Hər halda, Ermənistanda geniş kəşfiyyat şəbəkəsinə aid olan bu ölkənin öz kanalları ilə məsələni araşdırdığını əminliklə deyə bilərik”.
Məhəmmədəli QƏRİBLİ
