Prezident İlham Əliyev Fransa Prezidenti Emmanuel Makrona təbrik məktubu ünvanlayıb. Fransa Respublikasının milli bayramı münasibətilə Makronu təbrik edən İlham Əliyev məktubda bir sıra məqamlara toxunub.
Məktubda qeyd edilir ki, ölkələrimiz arasında diplomatik münasibətlərin qurulmasının 30 illiyini qeyd etdiyimiz cari ildə biz ötən dövr ərzində əldə etdiyimiz nailiyyətlərə nəzər salır, iqtisadiyyat, energetika, mədəniyyət, təhsil və digər sahələrdə formalaşmış səmərəli əməkdaşlıq əlaqələrinin daha da genişləndirilməsi imkanlarını araşdırırıq. Bununla belə, təbrik məktubunda belə bir məqam var: “Cənubi Qafqazda bərqərar olmuş yeni geosiyasi reallıq davamlı sülh və regional iqtisadi əməkdaşlıq üçün əlverişli zəmin yaratmışdır. Torpaqlarının 30 illik işğalına son qoyan Azərbaycan müharibə səhifəsini çevirmək, Ermənistanla münasibətləri normallaşdırmaq və sülh müqaviləsi imzalamaq istəyindədir. Beynəlxalq hüquqa söykənərək tərəfimizdən təqdim olunan beş prinsip əsasında Ermənistan ilə Azərbaycan arasında sülh müqaviləsinin hazırlanması prosesinə Fransanın dəyərli töhfə verə biləcəyinə inanırıq”.
Fransanın Ermənistana bəlli təsir imkanları var. O baxımdan Fransa öz imkanlarından istifadə edərək tərəflər arasında sülhün əldə olunmasına töhfə verə bilər.
“Fransaya ünvanlanmış mesajlar da bu qəbildəndi”
Sözügedən məsələni “Bakı-Xəbər”ə şərh edən AMİP-in sədr müavini Afsəddin Nəbiyev bununla bağlı bir sıra məqamlara toxundu: “2020-ci ilin dünya ölkələri üçün çətin və mürəkkəb olmasına baxmayaraq, Azərbaycanın tarixinə silinməz izlərlə həkk olundu. 27 sentyabr tarixindən başlanan 44 günlük Vətən müharibəsi Ermənistanın işğalçılıq siyasətinə ağır zərbə vurulması ilə nəticələndi. Azərbaycan tarixi qələbə qazandı. Elə həmin vaxtdan etibarən Azərbaycanın nəinki bölgədə, eyni zamanda dünyada böyük nüfuza sahib oldu. Azərbaycan dövlətinin yaratdığı yeni geosiyasi reallıq işğalçı Ermənistanı son iki yüz il ərzində apardıqları yanlış siyasətin nəticəsi ilə üz-üzə qoydu. Ermənistanın siyasi çevrəsi anlamağa başladı ki, bölgədə siyasi düzən dəyişib, geosiyasi reallıq Azərbaycanın xeyrinədir. Ermənistanda məğlubiyyəti həzm etməyən revanşist qüvvələr dünyada fəaliyyət göstərən erməni siyasi dairələri və lobbilərinin onlara dəstək olacağına arxayın idilər. Lakin onlar bu köməyi də görmədikdə anladılar ki, yeni dünya düzənində Cənubi Qafqazda Azərbaycan dövləti geostrateji üstünlüyü əldə edərək bölgənin sülh və təhlükəsizlik arxitekturasını yaradır. Bu üstünlüyü Azərbaycana qazandıran ən mühüm amil dövlətimizin beynəlxalq nəqliyyat- kommunikasiya, enerji layihələrinə verdiyi töhfələri oldu. Prezident İlham Əliyevin son aylarda bölgədə sülhün təmin olunması üçün dünya liderlərinə açıq-aydın mesajları Cənubi Qafqazda sülhün təmin olunmasına şərait yaradacaq. Bu gün yaşadığımız dünyada xaotik bir dövrün davam etdiyini çox açıq -aydın görməkdəyik. Bu baxımdan Azərbaycan beynəlxalq hüququn prinsiplərinə söykənərək bölgəmizdə münaqişələrsiz "Qafqaz evi" nin yaradılmasına səmimi yanaşan dövlət olduğunu davranışlarında dünyaya sübut edib. Fransaya ünvanlanmış mesajlar da bu qəbildəndi”.
Bu baxımdan sədr müavini hesab edir ki, Fransa bu məsələdə öz imkanlarından istifadə etməlidir.
Vidadi ORDAHALLI
