ABŞ Konqresindən biabırçı addım. Erməni lobbisinin təsiri altına düşən Konqres Birləşmiş Ştatların milli maraqlarına qarşı addımlar atmaqda davam edir.
Söhbət ondan gedir ki, ABŞ Konqresinin Nümayəndələr Palatasının Prosessual Komitəsi Milli Təhlükəsizlik Ayrılmaları Aktına təqdim edilmiş ermənipərəst dörd düzəlişi təsdiqləyib və Palatanın yekun müzakirəsinə təqdim edib.
Bu barədə Amerika “Hay Dat” Komitəsi məlumat yayıb.
Düzəlişlər Azərbaycanı erməni hərbi əsirləri dərhal azad etməyə, Türkiyənin pilotsuz təyyarələrinin istehsalında ABŞ texnologiyalarından istifadə edilməsinin məhdudlaşdırılmasına, habelə terrorçu muzdluların köməyi ilə törədilmiş antierməni hərbi cinayətləri araşdırmağa çağırır. Bununla yanaşı, “F-16” qırıcılarının və onların modernləşdirilməsi üçün avadanlıqların Türkiyəyə çatdırılmasının dayandırılması ilə bağlı ABŞ prezidentinə də müraciət edilib. Düzəlişlərin Konqresin müzakirəsinə çıxarılacağı deyilir.
Görünən odur ki, Konqres məlum qərəzli yanaşması ilə ABŞ-ın dövlət maraqlarına qarşı gedir. İki ildir erməni tərəfi belə bir uydurma ortaya atıb ki, guya Azərbaycan Vətən müharibəsində xarici muzdlulardan istifadə edib. Ermənipərəst konqresmenlər də bu yalanı “əsas” götürüblər. Halbuki, indiyə qədər bununla bağlı ortada bir dənə fakt yoxdur. O zaman Qarabağda hansı “hərbi cinayətlərdən” söhbət gedir?
“Qarabağ müharibəsində xarici muzdlu döyüşçülərdən Azərbaycan istifadə etsəydi...”
Məsələyə münasibət bildirən Demokratik Dəyişim Partiyası Təşkilat Komitəsinin sədri Əli Mustafayevin fikrincə, ABŞ kimi dövlətin bir sıra lobbilərin maraqlarına önəm verməsi təəssüf doğurur: “Fikrimcə, ABŞ daha çox lobbi və maraqlar ölkəsidir. Orada lobbi fəaliyyəti çox önəmlidir. Söhbət ondan gedir ki, lobbi hakimiyyəti inandıra bilirsə, o zaman qərar qəbul olunur. Ermənilərlə bağlı məlum düzəlişlər tamamilə əsassızdır. Ən azından ona görə ki, ABŞ dünyanın ən güclü kəşfiyyat imkanlarına malikdir. Qarabağ müharibəsində xarici muzdlu döyüşçülərdən Azərbaycan istifadə etsəydi, o zaman bununla bağlı onların əlində dəqiq məlumatlar olardı. Çünki belə bir halı gizlətmək mümkün deyil. O üzdən, Konqresin erməni lobbisinə inanaraq belə bir təşəbbüslə çıxış etməsi absurddur. Başqa bir tərəfdən, Azərbaycanda saxlanılan ermənilər hərbi əsir yox, diversantdılar. Bunu ABŞ-da da yaxşı bilirlər. Ona görə də Konqresin qəbul etdiyi qərarlar maksimum obyektiv olmalıdır, digər dövlətlərin marağına toxunmamalıdır. Ən azından neytral olmağı bacarmalıdılar. ABŞ-ın Cənubi Qafqazdakı maraqlarını, Azərbaycanın Avropanın enerji təchizatında oynadığı rolu nəzərə almalıdılar. Çünki bu kimi düzəlişlər ABŞ-ın strateji maraqlarına zərbə vurur. Əfsuslar olsun ki, çoxdandır dünya maraqlar üzərində qurulub və bu düzən üzərində idarə olunur. Bu baxımdan hesab edirəm ki, Azərbaycan hökuməti öz lobbi fəaliyyətini gücləndirməlidir. Xüsusən də Konqreslə işləməlidir. İşimizi elə qurmalıyıq ki, erməni lobbisi Azərbaycana qarşı qərarlar qəbul edə bilməsin”.
Bu baxımdan Əli Mustafayev hesab edir ki, Azərbaycan sözügedən istiqamətdə səylərini artırmalıdır.
Vidadi ORDAHALLI
